Hebribii 7 - ŊMALƐ KRƆŊKRƆŊ LƐ

Melkizedek fe Abraham kɛ Levibii lɛ

¹ Shi Melkizedek nɛɛ, lɛ ji Salem maŋtsɛ, Nyɔŋmɔ Ofe lɛ osɔfo, ni kɛ Abraham yakpe be ni eku esɛɛ kɛjɛ maŋtsɛmɛi lɛ agbee ní ejɔɔ lɛ lɛ,

² ni Abraham hã lɛ nomŋɔɔnii lɛ fɛɛ mlijai nyɔŋma mli ekome. Klɛŋklɛŋ lɛ egbɛi lɛ shishitsɔɔmɔ ji “Jalɛ Maŋtsɛ;” no sɛɛ lɛ eji Salem Maŋtsɛ hu, ni no shishi ji “Hejɔlɛ Maŋtsɛ.”

³ Ebɛ tsɛ lɛ, ebɛ nyɛ, ebɛ wekukpãa, ebɛ gbii ashishijee loo wala naagbee tete; shi tamɔ Nyɔŋmɔ Bi lɛ, ehiɔ shi akɛ osɔfo daa nɛɛ.

⁴ Agbɛnɛ nyɛkwɛa bɔ ni mɔ nɛ da hã, akɛ blematsɛ Abraham lɛ tete ŋɔ nomŋɔɔnii kpakpai lɛ amlijai nyɔŋma mli ekome ehã lɛ!

⁵ Levibii lɛ ateŋ mɛi ni tsuɔ osɔfoi anitsumɔ lɛ hu yɛ kitã ko akɛ amɛhe mlijai nyɔŋma mli ekome yɛ maŋ lɛ dɛŋ yɛ Mla lɛ naa, no ji yɛ amɛnyɛmimɛi lɛ adɛŋ, tsɛ amɛ hu amɛjɛ Abraham mli;

⁶ shi mɔ ni bɛ wekukpãa ko yɛ amɛteŋ nɛɛ, ehe mlijai nyɔŋma lɛ mli ekome yɛ Abraham tete dɛŋ, ni ejɔɔ mɔ ni yɔɔ shiwoi lɛ tete.

⁷ Shi ebɛ ŋwanejee ko kwraa akɛ mɔ ni da fe mɔ lɛ, lɛ ejɔɔ mɔ ni edaaa lɛ.

⁸ Ni asaŋ, biɛ lɛ, gbɔmɛi ni gboiɔ lɛ ji mɛi ni heɔ mlijai nyɔŋma mli ekome lɛ, shi jɛi lɛ, mɔ ko ni aye ehe odase akɛ ehiɔ shi daa lɛ he.

⁹ Ni, kɛ makɛɛ nakai lɛ, kɛtsɔ̃ Abraham nɔ lɛ ahe mlijai nyɔŋma mli ekome lɛ yɛ Levi ni heɔ no lɛ hu dɛŋ,

¹⁰ ejaakɛ eyɛ etsɛ lɛ mli lolo, be ni Melkizedek kɛ lɛ bakpe lɛ.

Melkizedek osɔfoyeli lɛ guɔ Levibii anɔ lɛ

¹¹ Agbɛnɛ kɛji emuuyeli tsɔ̃ Levibii asɔfoyeli lɛ nɔ kɛba lɛ (ejaakɛ no nɔ atsɔ̃ awo maŋ lɛ Mla lɛ), mɛɛ hiamɔ ehia lolo akɛ osɔfo kroko ate shi yɛ Melkizedek gbɛjianɔtoo lɛ naa, ni awooo lɛ yɛ Aaron gbɛjianɔtoo lɛ naa?

¹² Ejaakɛ kɛ atsake osɔfoyeli lɛ, belɛ ehe ehĩa akɛ atsake Mla lɛ hu.

¹³ Ejaakɛ mɔ he ni akɛɛ nii nɛɛ yɛ lɛ ejɛ akutso kroko mli, nɔ mli ni mɔ ko jɛko ebasɔ̃mɔko yɛ afɔleshãa latɛ he pɛŋ;

¹⁴ ejaakɛ eyɛ faŋŋ akɛ Yuda mli wɔNuŋtsɔ lɛ jɛ, shi nakai akutso lɛ Mose ewieee he nɔ ko yɛ osɔfoyeli hewɔ.

¹⁵ Ni ejeɔ kpo faŋŋ kwraa fe nɛkɛ kɛji osɔfo kroko te shi ni tamɔ Melkizedek,

¹⁶ osɔfo ni jeee heloo kitã mla naa awo lɛ yɛ, shi moŋ wala ni fiteee lɛ hewalɛ naa.

¹⁷ Ejaakɛ aye odase akɛ, “Osɔfo ji bo kɛmiiya naanɔ yɛ Melkizedek gbɛjianɔtoo lɛ naa.”

¹⁸ Ejaakɛ kitã ni tsɔ̃ hiɛ lɛ, akɛni ebɛ hewalɛ ni ehe bɛ sɛɛnamɔ ko hewɔ lɛ agu,

¹⁹ ejaakɛ Mla lɛ hãaa nɔ ko nɔ ko aye emuu, shi agbɛnɛ ahã hiɛnɔkãmɔ ni hi fe no eba, nɔ nɔ ni wɔtsɔ̃ɔ wɔbɛŋkɛɔ Nyɔŋmɔ.

Kristo osɔfoyeli lɛ damɔ Nyɔŋmɔ kitã nɔ

²⁰ Ni babaoo ni ashiii kitãkãmɔ sɛɛ lɛ, ejaakɛ amɛ lɛ, awo amɛ osɔfoi moŋ shi akãaa kitã ko,

²¹ Shi Kristo lɛ, kitãkãmɔ akɛwo lɛ, yɛ mɔ ni kɛɛ lɛ akɛ, “Nuŋtsɔ lɛ ekã kitã ni eshwaŋ ehe, akɛ, ‘Osɔfo ji bo kɛmiiya naanɔ,’ ” lɛ wiemɔ lɛ naa lɛ,

²² babaoo ni kpãŋmɔ ni Yesu ji sɛɛdaamɔlɔ yɛ mli lɛ hi fe no ji no.

²³ Ni amɛ lɛ, akɛni gbele hãaa amɛwo shihilɛ hewɔ lɛ, amɛyi pii amɛye osɔfoi;

²⁴ shi mɔ nɛ lɛ, akɛni ehiɔ shi kɛyaa naanɔ hewɔ lɛ, esɔfoyeli lɛ sɛɛ efooo.

²⁵ No hewɔ hu lɛ enyɛɔ mɛi ni tsɔ̃ɔ enɔ kɛbaa Nyɔŋmɔ ŋɔɔ lɛ ayiwala ehereɔ kwraa, akɛni eyɛ daa koni edamɔ mli ehã amɛ lɛ.

²⁶ Ejaakɛ Yesu lɛ Osɔfonukpa ni sa wɔ pɛ nɛ. Mɔ ni he tse, ni efɔŋ ko bɛ ehe, ni ehe bɛ kpa ko, ni etse ehe kɛjɛ esha he, ni awo enɔ ahã ekwɔ fe ŋwɛii.

²⁷ Ehe Ehĩaaa lɛ, tamɔ nakai osɔfonukpai lɛ, akɛ gbi fɛɛ gbi lɛ eshã lɛ diɛŋtsɛ ehe eshai ahe afɔle tsutsu, dani eshã maŋ lɛ hu nɔ. Ejaakɛ efee enɛ shi kome nyɔŋlo, be ni eŋɔ lɛ diɛŋtsɛ ehe eshã afɔle lɛ!

²⁸ Ejaakɛ Mla lɛ, gbɔmɛi gbedelɔi eŋɔ woɔ osɔfonukpai lɛ, shi wiemɔ ni akɛkã kitã yɛ Mla lɛ sɛɛ lɛ ewo Bi ni eye emuu kɛyaa naanɔ lɛ Osɔfonukpa.