Hebribii 6 - ŊMALƐ KRƆŊKRƆŊ LƐ

¹ No hewɔ lɛ, nyɛhãa wɔshĩa Kristo he nitsɔɔmɔ lɛ shishijee nibii lɛ, ni wɔfo mli kɛya tsɔ̃ɔmɔi ni sa onukpai ahe; ni wɔkakã he wɔto nitsumɔi ni egboi ahe tsuitsakemɔ kɛ Nyɔŋmɔ nɔ hemɔkɛyeli,

² kɛ baptisimɔi ahe nitsɔɔmɔ kɛ niji kɛ nɔshwiemɔ, kɛ gbohiiashitee kɛ naanɔ kojomɔ he saji lɛ ashishi ekoŋŋ.

³ Ni wɔɔfee enɛ aahu, kɛ Nyɔŋmɔ aaaŋmɛ gbɛ lɛ.

⁴ Ejaakɛ mɛi ni la etso amɛnɔ pɛŋ ni amɛsa amɛnaa ŋwɛi nɔkeenɔ lɛ ni amɛna Mumɔ Krɔŋkrɔŋ lɛ eko

⁵ ni amɛsa Nyɔŋmɔ wiemɔ kpakpa lɛ kɛ jeŋ ni baaba lɛ mli hewalɛi lɛ anaa,

⁶ ni no sɛɛ ni amɛgbee shi lɛ, anyɛŋ amɛ atsake afee ehee ekoŋŋ ahã tsuitsakemɔ, akɛni amɛmiisɛŋ Nyɔŋmɔ Bi lɛ ekoŋŋ amɛmiihã amɛhe, ni amɛmiibɔ lɛ ahora amɛmiitsɔ̃ɔ lɛ.

⁷ Shikpɔŋ ni miiɔ nu ni nɛɔ shwieɔ enɔ kpitiokpitio ni ebaa nii ni hi hã mɛi ni huɔ nɔ lɛ, enaa Nyɔŋmɔ jɔɔmɔ lɛ eko.

⁸ Shi kɛ ŋmei kɛ aŋlɛŋlɛ ekwɛ̃ɔ lɛ, ehe bɛ sɛɛnamɔ, ni ebɛŋkɛ Nyɔŋmɔ loomɔ, ni enaagbee ji shãa.

⁹ Shi wɔsuɔmɔ mɛi, wɔmiikɛɛ nɛkɛ moŋ, shi kɛ̃lɛ wɔhiɛ kã nyɛnɔ akɛ nyɛsane hi fe nakai, ni yiwalaheremɔ aaanyiɛ sɛɛ.

¹⁰ Ejaakɛ Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛnitsumɔ lɛ nɔ kɛ suɔmɔ ni nyɛjie kpo yɛ egbɛi lɛ hewɔ, ni nyɛkɛsɔ̃mɔ mɛi krɔŋkrɔŋi lɛ, ni nyɛsaa nyɛsɔ̃mɔɔ amɛ lolo lɛ.

¹¹ Shi wɔmiitao akɛ nyɛteŋ mɔ fɛɛ mɔ ajie nɛkɛ mɔdɛŋbɔɔ nɛɛ nɔŋŋ kpo, koni nyɛna hiɛnɔkãmɔ lɛ nɔmimaa kɛyashi naagbee,

¹² koni nyɛkafee kpɔkee, shi moŋ nyɛkɔ mɛi ni tsɔ̃ɔ hemɔkɛyeli kɛ tsuishitoo nɔ naa shiwoi lɛ anane.

Nyɔŋmɔ shiwoo ni ma shi shiŋŋ

¹³ Ejaakɛ be ni Nyɔŋmɔ wo Abraham shi lɛ, akɛni ebɛ mɔ ko ni fe lɛ diɛŋtsɛ ni eeekã lɛ kitã hewɔ lɛ, ekã lɛ diɛŋtsɛ ehe kitã

¹⁴ ekɛɛ, “Lɛɛlɛŋ, jɔɔmɔ majɔɔ bo ni fa hu mahã oshwiei afa.”

¹⁵ Ni akɛni Abraham to etsui shi hewɔ lɛ, enine shɛ shiwoo lɛ nɔ.

¹⁶ Ejaakɛ gbɔmɛi yɔɔ nɛɛ, mɔ ni fe amɛ lɛ, lɛ kitã amɛkãa, ni amɛŋwanejee fɛɛ naagbee ji kitãkãmɔ ni akɛmaa sane nɔ aduatsɔ lɛ.

¹⁷ No hewɔ hu ni be ni Nyɔŋmɔ tao akɛ etsɔ̃ɔ shiwoo lɛ yelɔi lɛ akɛ eyiŋtoo lɛ tsakeee kwraa lɛ, ekɛ kitã damɔ mli

¹⁸ koni wɔtsɔ̃ saji enyɔ ni tsakeee ni Nyɔŋmɔ nyɛŋ emale yɛ mli lɛ anɔ wɔna miishɛjemɔ ni wa, ni wɔ mɛi ni wɔyaba abo lɛ wɔkɛmɔ hiɛnɔkãmɔ ni kã wɔhiɛ lɛ mli;

¹⁹ nɔ ni wɔhiɛ tamɔ wɔsusuma sɛkɛ ni tseee ni efi shi shiŋŋ ni ebote mli kɛtee muhɔɔ lɛ sɛɛ tɔ̃ɔ,

²⁰ he ni hiɛnyiɛlɔ lɛ ni ji Yesu, mɔ ni tsɔ̃ naanɔ osɔfonukpa yɛ Melkizedek gbɛjianɔtoo lɛ naa lɛ, bote hã wɔ lɛ.