Hebribii 4 - ŊMALƐ KRƆŊKRƆŊ LƐ

Hejɔɔmɔ yɛ hã heyelɔi

¹ No hewɔ lɛ, ni ashi ehejɔɔmɔ lɛ mlibotemɔ he shiwoo ahã wɔ nɛɛ, nyɛhãa wɔkwɛa jogbaŋŋ koni ekaba akɛ eŋmɛɛ nyɛteŋ mɔ ko.

² Ejaakɛ wɔ hu ajaje Sanekpakpa lɛ atsɔ̃ɔ wɔ tamɔ bɔ ni ajaje atsɔ̃ɔ amɛ lɛ nɔŋŋ; shi kɛ̃lɛ wiemɔ ni amɛnu lɛ he eyabaaa sɛɛnamɔ ko hãaa amɛ, ejaakɛ mɛi ni nu lɛ kɛ hemɔkɛyeli mɔɔɔ mli.

³ Ejaakɛ wɔ mɛi ni wɔhe wɔye lɛ wɔmiibote nakai hejɔɔmɔ lɛ mli, tamɔ bɔ ni Nyɔŋmɔ kɛɛ, “No hã mikã kitã yɛ mimlifu lɛ mli akɛ, ‘Kɛ amɛbote mihejɔɔmɔ lɛ mli fii’ ” tsɛ agbe nitsumɔi lɛ anaa kɛjɛ jeŋ shishijee.

⁴ Ejaakɛ bɔ ni ewie yɛ he ko yɛ gbi ni ji kpawo lɛ he nɛ, “Ni Nyɔŋmɔ jɔɔ ehe yɛ gbi ni ji kpawo lɛ nɔ kɛjɛ enitsumɔi lɛ fɛɛ mli.”

⁵ Ni biɛ nɛɛ esaa ekɛɛ, “Kɛ amɛbote mihejɔɔmɔ lɛ mli fii!”

⁶ No hewɔ lɛ, akɛni ekã shi faŋŋ akɛ mɛi komɛi baabote mli, ni mɛi ni ajaje Sanekpakpa lɛ atsɔ̃ɔ amɛ tsutsu lɛ boteee mli yɛ he ni amɛheee amɛyeee hewɔ lɛ,

⁷ esaa eto gbi ko ekoŋŋ, ni etsɛ lɛ “Ŋmɛnɛ” yɛ nɔ ni etsɔ̃ David nɔ ewie be babaoo nɛɛ sɛɛ lɛ mli, ni atsĩ tã momo lɛ, akɛ, “Ŋmɛnɛ, kɛji nyɛnu egbee lɛ, nyɛkawajea nyɛtsui.”

⁸ Ejaakɛ eji Yoshua na hã amɛ hejɔɔmɔ kulɛ, fee sɛɛ lɛ Nyɔŋmɔ ewieŋ yɛ gbi kroko he dɔŋŋ.

⁹ No hewɔ lɛ, hejɔɔmɔ gbiyeli ko kã shi kɛhã Nyɔŋmɔ maŋ lɛ.

¹⁰ Ejaakɛ mɔ fɛɛ mɔ ni ebote ehejɔɔmɔ lɛ mli lɛ, lɛ diɛŋtsɛ hu ejɔɔ ehe kɛjɛ enitsumɔi lɛ amli, tamɔ bɔ ni Nyɔŋmɔ jɔɔ ehe kɛjɛ lɛ diɛŋtsɛ enɔ lɛ mli lɛ.

¹¹ No hewɔ lɛ, nyɛhãa wɔbɔa mɔdɛŋ koni wɔbote nakai hejɔɔmɔ lɛ mli, ni mɔ ko akagbee toigbele ni he okadi nɛ lɛ nɔŋŋ mli.

¹² Ejaakɛ Nyɔŋmɔ wiemɔ hiɛ kã ni eyɛ hewalɛ ni enaa ba fe klante kɛ enaa nta, ni egbuɔ kɛboteɔ mli aahu kɛyashɛɔ susuma kɛ mumɔ lɛ, kɛ talɔi kɛ wuiaŋfɔi lɛ akpeehei lɛ ni eji tsuiiaŋ susumɔi kɛ jwɛŋmɔi lɛ akojolɔ.

¹³ Ni ateee bɔɔnɔ ko yɛ ehiɛ, shi nibii fɛɛ yɛ faŋŋ ni agbele nɔ yɛ lɛ mɔ ni wɔkɛyɔɔ sane lɛ hiɛ.

Wɔyɛ osɔfonukpa mɔbɔnalɔ

¹⁴ Agbɛnɛ, akɛni wɔyɔɔ osɔfonukpa kpeteŋkple, ni efoŋ kɛtsɔ̃ ŋwɛiiaŋ, ni ji Yesu, Nyɔŋmɔ Bi lɛ nɛɛ, nyɛhãa wɔmɔa jajemɔ lɛ mli ni awaa.

¹⁵ Ejaakɛ wɔsɔfonukpa ni wɔyɔɔ lɛ ejeee mɔ ni nyɛ̃ɛɛ anu wɔgbedemɔi lɛ ahe ahã wɔ, shi eji mɔ ko ni aka lɛ yɛ nibii fɛɛ agbɛfaŋ tamɔ wɔ, ni kɛ̃lɛ esha ko esha ko bɛ ehe.

¹⁶ Hewɔ lɛ nyɛhãa wɔkɛ ekãa atsia abɛŋkɛa dromɔ sɛi lɛ, koni wɔnine ashɛ mɔbɔnalɛ nɔ ni wɔna dromɔ ni aaaye abua wɔ yɛ be ni sa mli.