Hebribii 3 - ŊMALƐ KRƆŊKRƆŊ LƐ

Yesu fe Mose

¹ Enɛ hewɔ lɛ, anyɛmimɛi krɔŋkrɔŋi ni ena ŋwɛi tsɛmɔ lɛ eko, nyɛjwɛŋa wɔhemɔkɛyeli jajemɔ lɛ he bɔfo kɛ osɔfonukpa ni ji Kristo Yesu lɛ he,

² mɔ ni ye mɔ ni to lɛ nakai gbɛhe lɛ anɔkwa, tamɔ bɔ ni Mose hu ye anɔkwa yɛ Nyɔŋmɔ we lɛ fɛɛ lɛ.

³ Ejaakɛ tamɔ bɔ ni mɔ ko ni ema shĩa woo fa fe shĩa lɛ nɔ lɛ, nakai nɔŋŋ Yesu hu hiɛ yɔɔ nyam fe Mose.

⁴ Ejaakɛ shĩa fɛɛ shĩa lɛ, mɔ ko kɛ̃ ma, shi mɔ ni maa nɔ fɛɛ nɔ ji Nyɔŋmɔ.

⁵ Ni Mose lɛ, eye anɔkwa yɛ eshĩa muu lɛ fɛɛ mli akɛ sɔ̃ɔlɔ, koni eye nii ni abaawie lɛ ahe odase.

⁶ Shi Kristo lɛ, eye anɔkwa akɛ Bi yɛ lɛ diɛŋtsɛ ewe; lɛ ewe ji wɔ, kɛji wɔhiɛ nɔhiɛkãmɔ mli ekãa kɛ shwãa lɛ mli kpɛŋŋ kɛyashi naagbee lɛ.

Ŋwanejee he kɔkɔbɔɔ

⁷ Hewɔ lɛ, tamɔ bɔ ni Mumɔ Krɔŋkrɔŋ lɛ kɛɛ lɛ, “Ŋmɛnɛ, kɛji nyɛnu egbee lɛ,

⁸ nyɛkawajea nyɛtsui, tamɔ bɔ ni nyɛtsɛmɛi lɛ fee yɛ mlilawoo gbi lɛ nɔ lɛ,

⁹ he ni nyɛtsɛmɛi lɛ tsɔ̃ minaa, ni amɛka mi, ni amɛna minitsumɔi lɛ, afii nyɔŋmai ejwɛ yɛ lɛ.

¹⁰ Hewɔ lɛ mimli wo nakai yinɔbii lɛ ala ni mikɛɛ, ‘Amɛduɔ gbɛ yɛ amɛtsui amli daa. Shi amɛleee migbɛi lɛ.’

¹¹ No hã mikã kitã yɛ mimlifu lɛ mli akɛ, ‘Kɛ amɛbote mihejɔɔmɔ lɛ mli fii!’ ”

¹² Nyɛkwɛa ni ahia, anyɛmimɛi, koni nyɛteŋ mɔ ko akahi tsui fɔŋ ni heee yeee ni ekpale kɛje Nyɔŋmɔ, hiɛkãalɔ lɛ, he.

¹³ Shi moŋ nyɛwiea nyɛtsɔ̃tsɔ̃ɔa nyɛhe gbi fɛɛ gbi ni atsɛɔ lɛ “ŋmɛnɛ” lɛ, koni esha lakamɔ akahã nyɛteŋ mɔ ko tsui kpliŋ.

¹⁴ Ejaakɛ wɔtsɔ̃mɔ Kristo nanemɛi niyelɔi, kɛji wɔhiɛ wɔhe ni wɔkɛfɔ̃ɔ enɔ kɛjɛ shishijee lɛ mli kpɛŋŋ kɛyashi naagbee lɛ.

¹⁵ Ni akɛɛ akɛ, “Ŋmɛnɛ, kɛji nyɛnu egbee lɛ, Nyɛkawajea nyɛtsui, tamɔ bɔ ni nyɛtsɛmɛi lɛ fee yɛ mlilawoo lɛ mli” lɛ,

¹⁶ namɛi nu ni amɛwo emli la lɛ? Ani jeee mɛi ni kɛ Mose je Ijipt lɛ fɛɛ ni?

¹⁷ Ni namɛi emli fu afii nyɔŋmai ejwɛ lɛ? Ani jeee mɛi ni fee esha ni amɛtswia shi amɛgboi yɛ ŋa lɛ nɔ lɛ?

¹⁸ Ni namɛi akitã ekã akɛ amɛboteŋ ehejɔɔmɔ lɛ mli lɛ? Ani jeee mɛi ni gbo toi lɛ?

¹⁹ Ni wɔnaa akɛ he ni amɛheee amɛyeee lɛ hewɔ amɛnyɛɛɛ mli amɛbote lɛ.