Hebribii 2 - ŊMALƐ KRƆŊKRƆŊ LƐ

Yiwalaheremɔ kpeteŋkple lɛ

¹ No hewɔ lɛ, esa akɛ wɔjwɛŋmɔ ahi nii ni wɔnu lɛ anɔ jogbaŋŋ, koni wɔkakplaŋ kɛje he be ko.

² Ejaakɛ kɛ wiemɔ ni awie yɛ ŋwɛi bɔfoi anaa lɛ ma shi shiŋŋ, ni awo nɔtɔmɔ fɛɛ nɔtɔmɔ kɛ toigbele fɛɛ toigbele he nyɔmɔ bɔ ni ja lɛ,

³ te wɔ lɛ wɔbaafee tɛŋŋ wɔjo nyɔmɔwoo naa foi hu, kɛji wɔbuuu nɛkɛ yiwalaheremɔ kpeteŋkple nɛɛ lɛ? Nuŋtsɔ lɛ tsutsu wie he, ni mɛi ni nu lɛ hu ma nɔ mí amɛhã wɔ,

⁴ ni Nyɔŋmɔ diɛŋtsɛ hu kɛ okadii kɛ naakpɛɛnii kɛ hewalɛnii srɔtoi kɛ Mumɔ Krɔŋkrɔŋ hãmɔ lɛ miiye odase miishi nɔ, yɛ lɛ diɛŋtsɛ esuɔmɔ naa.

Yiwalaheremɔ Tatsɛnukpa lɛ

⁵ Ejaakɛ jeee ŋwɛi bɔfoi ashishi akɛ jeŋ ni baaba ni wɔwieɔ he lɛ wo.

⁶ Shi mɔ ko ye odase faŋŋ yɛ he ko akɛ, “Mɛni ji gbɔmɔ adesa ni okaiɔ lɛ? Aloo gbɔmɔ bi hu ni ojwɛŋɔ enɔ?

⁷ Shwɛ fioo kɛkɛ ni ohã ekɛ ŋwɛi bɔfoi aye egbɔ; okɛ anunyam kɛ woo efi lɛ akekre, Ni oŋɔ lɛ oto oninenaa nitsumɔi lɛ anɔ.

⁸ Oŋɔ nibii fɛɛ kwa owo enajiaŋshi.” Kɛ akɛɛ “ekɛ nibii fɛɛ ewo enajiaŋshi” lɛ, etsɔ̃ɔ akɛ eshwɛɛɛ nɔ ko nɔ ko ni akɛwooo eshishi. Shi amrɔ nɛɛ wɔnako wɔna akɛ nibii fɛɛ yɛ eshishi.

⁹ Shi mɔ ni be kuku ko mli lɛ ahã shwɛ fioo ni ekɛ ŋwɛi bɔfoi aye egbɔ lɛ, wɔna akɛ Yesu ni, mɔ ni gbele mli nɔnaa hewɔ ni akɛ anunyam kɛ woo fi lɛ akekre lɛ, bɔ ni afee ni Nyɔŋmɔ dromɔ naa lɛ esa enaa gbele ehã mɔ fɛɛ mɔ.

¹⁰ Ejaakɛ esa Nyɔŋmɔ mɔ hewɔ ni nii fiaa yɔɔ kɛ mɔ nɔ ni tsɔ̃ ni nii fiaa yɔɔ lɛ akɛ, bɔ ni afee ni eŋɔ bii babaoo kɛba anunyam mli lɛ, ehã amɛyiwalaheremɔ Tatsɛnukpa lɛ atsɔ̃ amanehului amli ahi kɛwula shi.

¹¹ Ejaakɛ mɔ ni tsuuɔ mɛi ahe lɛ kɛ mɛi ni atsuuɔ amɛhe lɛ fɛɛ jɛ mɔ ko mli; no hewɔ jɛ ni ehiɛ gbooo akɛ eeetsɛ amɛ nyɛmimɛi lɛ.

¹² Ni ekɛɛ, “Matsĩ ogbɛi lɛ tã matsɔ̃ɔ minyɛmimɛi lɛ; asafo mli hu mala majie oyi yɛ.”

¹³ Ekɛɛ ekoŋŋ akɛ, “Maŋɔ mihiɛ mafɔ̃ enɔ.” Ni asaŋ, “Naa mi kɛ bii ni Nyɔŋmɔ kɛhã mi lɛ!”

¹⁴ No hewɔ lɛ, akɛni bii lɛ hiɛ heloo kɛ lá kome hewɔ lɛ, lɛ hu eŋɔ no nɔŋŋ eko tamɔ amɛ, koni etsɔ̃ gbele nɔ ekpãtã mɔ ni yɔɔ gbele nɔ hewalɛ ni ji abonsam lɛ hiɛ,

¹⁵ ni ekpɔ̃ mɛi fɛɛ ni gbele gbeyeishemɔ hewɔ lɛ amɛtsɔ̃mɔ nyɔji yɛ amɛwala be fɛɛ mli lɛ.

¹⁶ Ejaakɛ lɛɛlɛŋ, jeee ŋwɛi bɔfoi eyeɔ ebuaa, shi moŋ Abraham shwiei.

¹⁷ No hewɔ lɛ, nibii fɛɛ gbɛfaŋ lɛ esa akɛ etamɔ enyɛmimɛi lɛ, koni etsɔ̃ mɔbɔnalɔ kɛ anɔkwa osɔfonukpa yɛ Nyɔŋmɔ hiɛ, koni ekpãtã ehã maŋ lɛ yɛ amɛhe eshai lɛ ahewɔ.

¹⁸ Ejaakɛ akɛni lɛ diɛŋtsɛ lɛ ena kaa mli amanehulu hewɔ lɛ, enyɛɔ eyeɔ ebuaa mɛi ni akaa amɛ lɛ.