Hebribii 13 - ŊMALƐ KRƆŊKRƆŊ LƐ

Kristofoi ashihilɛ

¹ Nyɛhãa nyɛmimɛi asuɔmɔ ahĩa shi daa.

² Gbɔfeemɔ hu, nyɛhiɛ akakpaa nɔ; ejaakɛ no nɔ mɛi komɛi tsɔ̃ fee ŋwɛi bɔfoi agbɔ ni amɛleee.

³ Nyɛkaia mɛi ni awo amɛ gboklɛi lɛ tamɔ akɛ nyɛkɛ amɛ kãmɔ mli, kɛ mɛi ni afeɔ amɛ efɔŋ lɛ hu, akɛni nyɛ hu nyɛyɛ heloo mli lolo lɛ.

⁴ Awo gbãlã hiɛ nyam yɛ nyɛ fɛɛ nyɛteŋ, ni akabule gbãlã saa hu; shi ajwamãŋbɔlɔi kɛ gbãlãŋkulɔi lɛ, Nyɔŋmɔ baakojo amɛ.

⁵ Shikasuɔmɔ akaba nyɛjeŋba mli; ni nyɛmii ashɛ nii ni nyɛyɔɔ lɛ he; ejaakɛ Nyɔŋmɔ diɛŋtsɛ ekɛɛ, “Mishiŋ bo ni misaa mikwaŋ bo gbi ko gbi ko.”

⁶ Bɔ ni afee ni wɔna ekãa ni wɔkɛɛ, “Nuŋtsɔ lɛ ji miyelikɛbualɔ, ni misheŋ gbeyei. Mɛni gbɔmɔ aaafee mi?”

Nyɛbua nyɛtsɔ̃ɔlɔi, titri lɛ Kristo

⁷ Nyɛkaia nyɛtsɔ̃ɔlɔi, mɛi ni wie Nyɔŋmɔ wiemɔ lɛ tsɔ̃ɔ nyɛ lɛ; nyɛkwɛa amɛshihilɛ lɛ naagbee, ni nyɛkasea amɛhemɔkɛyeli lɛ.

⁸ Yesu Kristo lɛ, bɔ ni eyɔɔ nyɛ kɛ ŋmɛnɛ lɛ, nakai nɔŋŋ eyɔɔ kɛyaa naanɔ.

⁹ Nyɛkahãa tsɔ̃ɔmɔi srɔtoi kɛ tsɔ̃ɔmɔi krokomɛi kɛ nyɛ miililaa shi; ejaakɛ ehi akɛ akɛ Nyɔŋmɔ dromɔ awo tsui hewalɛ, shi jeee niyenii ni hãaa mɛi ni tsuɔ he nii lɛ ana sɛɛ ko yɛ mli lɛ.

¹⁰ Wɔyɛ afɔleshãa latɛ ko ni mɛi ni sɔ̃mɔɔ yɛ buu lɛ mli lɛ bɛ hegbɛ akɛ amɛyeɔ enɔ nii.

¹¹ Ejaakɛ kooloi ni osɔfonukpa lɛ ŋɔɔ amɛlá kɛyaa He Krɔŋkrɔŋ lɛ yɛ esha hewɔ lɛ agbohii lɛ ayashãa yɛ nsra lɛ sɛɛ.

¹² No hewɔ lɛ, Yesu hu, bɔ ni afee ni ekɛ lɛ diɛŋtsɛ elá lɛ atsuu maŋ lɛ he lɛ, agbo lɛ sɛɛ ena amanehulu lɛ yɛ.

¹³ No hewɔ lɛ, agbɛnɛ, nyɛhãa wɔjea kpo kɛyaa eŋɔɔ yɛ nsra lɛ sɛɛ ni wɔtere ehorabɔɔ lɛ.

¹⁴ Ejaakɛ wɔbɛ maŋ ni hiɔ shi yɛ biɛ, shi maŋ ni baaba lɛ moŋ sɛɛgbɛ wɔtaoɔ.

¹⁵ Belɛ nyɛhãa wɔtsɔ̃a enɔ ni wɔkɛ yijiemɔ afɔle abahãa Nyɔŋmɔ daa; no ji, naabui ni jajeɔ egbɛi lɛ yibii lɛ.

¹⁶ Shi ejurɔfeemɔ kɛ nikee lɛ, nyɛhiɛ akakpaa nɔ; ejaakɛ nakai afɔlei saa Nyɔŋmɔ hiɛ jogbaŋŋ.

¹⁷ Nyɛboa nyɛtsɔ̃ɔlɔi lɛ atoi, ni nyɛbaa nyɛhe shi nyɛhãa amɛ; ejaakɛ amɛ amɛbuɔ nyɛsusumai lɛ ahe akɛ mɛi ni baabu he akɔntaa, koni amɛkɛ miishɛɛ afee nii nɛɛ, shi jeee kɛ ŋtsɔidɔɔmɔ; ejaakɛ no ehiii hãaa nyɛ.

¹⁸ Nyɛsɔlea nyɛhãa wɔ; ejaakɛ wɔyɛ nɔmimaa akɛ wɔyɛ henilee kpakpa, ni wɔmiitao akɛ wɔba wɔjeŋ fɛɛfɛo yɛ nii fɛɛ mli.

¹⁹ Ni miikpa nyɛ fai babaoo akɛ nyɛfee nakai, koni akpale mi ahã nyɛ oya.

Jɔɔmɔ kɛ Ŋamɔi

²⁰ Shi hejɔlɛ Nyɔŋmɔ lɛ, mɔ ni jie toi lɛ akwɛlɔ kpeteŋkple ni ji wɔNuŋtsɔ Yesu kɛjɛ gbohii ateŋ yɛ naanɔ kpãŋmɔ lɛ lá lɛ mli lɛ,

²¹ lɛ esaa nyɛ ehã nitsumɔ kpakpa fɛɛ nitsumɔ kpakpa, ni nyɛfee esuɔmɔnaanii, ni etsɔ̃ Yesu Kristo nɔ efee nɔ ni sa ehiɛ yɛ nyɛmli. Lɛ aŋɔ anunyam ahã kɛyashi naanɔi anaanɔ lɛ. Amen!

²² Shi, anyɛmimɛi, miikpa nyɛ fai ni nyɛmɔ wiemɔ kɛ tsɔ̃ɔmɔ nɛɛ mli, ejaakɛ wiemɔ kukuoo miŋma mimaje nyɛ nɛɛ.

²³ Nyɛnaa nyɛlea akɛ aŋmɛɛ wɔnyɛmi Timoteo he, ni kɛ eba mra lɛ mikɛ lɛ aaaba mabana nyɛ.

²⁴ Wɔmiibi nyɛtsɔ̃ɔlɔi lɛ fɛɛ kɛ mɛi krɔŋkrɔŋi lɛ fɛɛ tswɛm. Mɛi ni jɛ Italia lɛ miibi nyɛ.

²⁵ Dromɔ lɛ kɛ nyɛ fɛɛ ahi shi! Amen.