Hebribii 12 - ŊMALƐ KRƆŊKRƆŊ LƐ

Kristo ji nɔkwɛmɔnɔ

¹ No hewɔ lɛ, agbɛnɛ wɔ hu, akɛni wɔyɔɔ odasefoi babaoo ni ebɔle wɔ tamɔ atatu nɛɛ, nyɛhãa wɔshɛa jatsu fɛɛ jatsu kɛ esha ni ebɔle wɔ kpula lɛ wɔfɔ̃a. Ni wɔkɛ hiɛmiamɔ ada foi ni kã wɔhiɛ lɛ.

² Ni wɔkwɛ hemɔkɛyeli shishijelɔ kɛ naagbelɔ ni ji Yesu lɛ, mɔ ni nyamɔ ni kã ehiɛ lɛ hewɔ lɛ emia ehiɛ yɛ sɛŋmɔtso lɛ he amanehulu lɛ mli. Ni ebuuu hiɛgbele lɛ, ni eyata shi yɛ Nyɔŋmɔ maŋtsɛ sɛi lɛ ninejurɔ nɔ lɛ.

³ No hewɔ lɛ, nyɛjwɛŋa mɔ ni ŋmɛ etsui shi ehã nibii ni eshafeelɔi kɛɛ kɛshi lɛ lɛ he, koni ekaje nyɛtsine ni nyɛsusumai miitɔ biti.

WɔTsɛ Nyɔŋmɔ tsɔsemɔ lɛ

⁴ Nyɛnako nyɛgbee hiɛ kɛyashi lájee mli yɛ nyɛ kɛ esha tawuu lɛ mli;

⁵ ni nyɛhiɛ ekpa hewalɛwoo wiemɔ ni Nyɔŋmɔ kɛ nyɛ wieɔ bɔ ni akɛ bii wieɔ lɛ nɔ akɛ, “Mibi, kaabu Nuŋtsɔ lɛ tsɔsemɔ lɛ akɛ nɔ ko bibioo, ni asaŋ, kɛ ekã ohiɛ lɛ, kaahã onijiaŋ miije wui;

⁶ Ejaakɛ mɔ ni Nuŋtsɔ lɛ sumɔɔ lɛ, lɛ etsɔseɔ, ni eyiɔ bi fɛɛ bi ni ekɛfeɔ enɔ lɛ.”

⁷ Nyɛmiaa nyɛhiɛ yɛ nɔnaa lɛ mli akɛ tsɔsemɔ; Nyɔŋmɔ hiɛ nyɛ akɛ ebii; ejaakɛ mɛɛ bi yɔɔ ni etsɛ tsɔseee lɛ?

⁸ Kɛji nyɛnaaa tsɔsemɔ ni mɛi fɛɛ naa lɛ eko lɛ, no lɛ ajwamãŋbii ji nyɛ, shi jeee kpeemɔ yoo bii.

⁹ Asaŋ wɔyɛ heloo gbɛfaŋ tsɛmɛi ni tsɔseɔ wɔ, ni wɔbuɔ amɛ. Ani esaaa akɛ wɔba wɔhe shi fe nakai wɔhã mumɔi aTsɛ lɛ koni wɔyi ana wala?

¹⁰ Amɛ lɛ, gbii fioo ko kɛkɛ amɛtsɔseɔ wɔ bɔ ni sa amɛhiɛ; shi lɛ lɛ, etsɔseɔ wɔ koni ahi ahã wɔ ni wɔna ekrɔŋkrɔŋfeemɔ lɛ eko.

¹¹ Shi tsɔsemɔ fɛɛ tsɔsemɔ lɛ, amrɔmrɔ nɛɛ efeee mɔ akɛ miishɛɛ nɔ ni, shi dɔlɛ nɔ moŋ; shi kɛ fee sɛɛ lɛ ewoɔ hejɔlɛ yibii ni ji jalɛ lɛ ehãa mɛi ni tsɔsemɔ lɛ esaa amɛ lɛ.

Nitsɔɔmɔi kɛ kɔkɔbɔi

¹² Hewɔ lɛ nyɛwajea niji ni egbede kɛ nakutsei ni egbɔjɔ lɛ.

¹³ Ni nyɛfea gbɛi ni yɔɔ trɔmɔɔ nyɛhãa nyɛnaji, koni otsɔɔlɔ nane akahwaŋ, shi moŋ atsa lɛ.

¹⁴ Nyɛtiua nyɛ kɛ mɛi fɛɛ ateŋ hejɔlɛ sɛɛ kɛ hetsemɔ ni kɛ mɔ ko shi ni enaŋ Nuŋtsɔ lɛ.

¹⁵ Ni nyɛkwɛa ni ahia, koni mɔ ko akaŋmɛɛ Nyɔŋmɔ dromɔ lɛ he; koni shishifã kɛ joomɔ ko akakwɛ̃ ni ehao nyɛ ni akɛbule mɛi pii.

¹⁶ Koni mɔ ko akafee ehe ajwamãŋbɔlɔ loo mɔ ni ebuuu Nyɔŋmɔ nii, tamɔ Esau ni hɔ̃ɔ ekromɔbi gbɛnaa lɛ ehe ŋmaa shikomeyeli lɛ.

¹⁷ Ejaakɛ nyɛle akɛ, be ni fee sɛɛ ni etao akɛ ena jɔɔmɔ lɛ, akwa lɛ; ni enaaa, tsɛbelɛ ekɛ yaafonui tao tsuitsakemɔ hegbɛ.

¹⁸ Jeee Sinai Gɔŋ ni tsoɔ kɛ la ni anaa kɛ hiŋmɛi kɛ atatu kpii kɛ duŋ kabitii kɛ ahum,

¹⁹ kɛ tɛtɛrɛmantɛrɛ gbɛɛmɔ kɛ wiemɔi agbɛɛmɔ ni mɛi ni nu lɛ kpa fai akɛ akawie eko afata he dɔŋŋ lɛ he nyɛba;

²⁰ ejaakɛ kitã ni awo akɛ, “Kɛji kooloo ko tete ta gɔŋ lɛ he lɛ, atswia lɛ tɛ” lɛ, amɛnyɛɛ mli amɛhi.

²¹ Ni nɔ ni pue lɛ he yɛ gbeyei babaoo aahu bɔ ni Mose kɛɛ, “Miishe gbeyei, ni mihe miikpokpo.”

²² Shi moŋ Zion Gɔŋ lɛ kɛ Nyɔŋmɔ hiɛkãalɔ lɛ maŋ; ŋwɛi Yerusalɛm lɛ, kɛ ŋwɛi bɔfoi akpeiakpei abɔ ahenaabuamɔ lɛ,

²³ kɛ kromɔbii ni aŋma amɛgbɛii yɛ ŋwɛi lɛ asafo lɛ he nyɛba. Kɛ Nyɔŋmɔ ni ji mɛi fɛɛ akojolɔ lɛ, kɛ jalɔi ni ehi kɛwula shi lɛ amumɔi lɛ,

²⁴ kɛ kpãŋmɔ hee mlidaamɔlɔ Yesu lɛ, kɛ lá ni atsɔ ashwã ni wieɔ wiemɔ kpakpa fe Habel nɔ lɛ, aŋɔɔ.

²⁵ Nyɛkwɛa ni ahĩa, koni nyɛkakwa mɔ ni wieɔ lɛ, ejaakɛ kɛ mɛi ni kwa mɔ ni wie tsɔ̃ɔ amɛ yɛ shikpɔŋ lɛ nɔ lɛ ahe ejeee mli lɛ, belɛ wɔ lɛ, wɔhe ejeŋ mli kwraa kɛji wɔkpale kɛjɛ mɔ ni jɛɔ ŋwɛi wieɔ lɛ he.

²⁶ Lɛ egbee hoso shikpɔŋ lɛ yɛ no be lɛ mli, shi agbɛnɛ ewo shi ekɛɛ, “Mahoso shikpɔŋ lɛ shi kome ekoŋŋ, ni jeee shikpɔŋ lɛ kɛkɛ, shi ŋwɛi hu.”

²⁷ “Shi kome ekoŋŋ” ni ekɛɛ lɛ, ekɛtsɔ̃ɔ faŋŋ akɛ nii ni ahosoɔ lɛ aaaho aya, ejaakɛ nii ni afee ni, koni nii ni hosoŋ lɛ ahi shi.

²⁸ No hewɔ lɛ, akɛni wɔna maŋtsɛyeli ni anyɛŋ ahoso lɛ, nyɛhãa wɔdaa shi ni wɔkɛsɔ̃mɔ Nyɔŋmɔ bɔ ni sa ehiɛ kɛ woo kɛ gbeyeishemɔ!

²⁹ Ejaakɛ wɔNyɔŋmɔ lɛ, la ni fiteɔ nii hu ji lɛ.