Hebribii 11 - ŊMALƐ KRƆŊKRƆŊ LƐ

Hemɔkɛyeli

¹ Shi hemɔkɛyeli ji nii ni wɔhiɛ kã nɔ lɛ anɔ hewalɛnamɔ kɛ nii ni anãaa lɛ anɔmimaa.

² Ejaakɛ no mli aye blemabii lɛ ahe odase kpakpa yɛ.

³ Hemɔkɛyeli wɔkɛyoɔ akɛ Nyɔŋmɔ kɛ wiemɔ bɔ je lɛ, hewɔ lɛ nibii ni anaa lɛ jɛ nibii ni anãaa lɛ mli.

⁴ Hemɔkɛyeli Habel kɛshã afɔle ni fe Kain nɔ lɛ ehã Nyɔŋmɔ, no hewɔ hu ni aye ehe odase akɛ jalɔ ji lɛ lɛ; ejaakɛ Nyɔŋmɔ he enikeenii lɛ; ni no nɔŋŋ nɔ etsɔ̃ɔ ewieɔ lolo, tsɛ egbo.

⁵ Hemɔkɛyeli hewɔ aŋɔ Henok kɛtee (ŋwɛi), koni ekana gbele, ni anãaa lɛ dɔŋŋ akɛni Nyɔŋmɔ ŋɔ lɛ kɛtee lɛ; ejaakɛ dani aaaŋɔ lɛ kɛya lɛ aye ehe odase akɛ esa Nyɔŋmɔ hiɛ.

⁶ Shi kɛji hemɔkɛyeli bɛ lɛ anyɛŋ Nyɔŋmɔ hiɛ asa; ejaakɛ mɔ ni baa Nyɔŋmɔ ŋɔɔ lɛ, ja ehe eye akɛ eyɛ, ni eji mɛi ni taoɔ esɛɛgbɛ lɛ anyɔmɔwolɔ hu.

⁷ Hemɔkɛyeli Noa hu kɛbo Nyɔŋmɔ toi be ni ehã ele nii ni anako lɛ he nɔ ko lɛ, ni ekɛkpɛ adeka ehã ewe lɛ yiwalaheremɔ lɛ; no nɔ hu etsɔ̃ ebu je lɛ fɔ, ni enine shɛ jalɛ ni jɛ hemɔkɛyeli mli lɛ nɔ.

⁸ Hemɔkɛyeli Abraham kɛbo toi be ni Nyɔŋmɔ tsɛ lɛ lɛ, ni eyiŋ etee he ni baatsɔ̃ enɔ lɛ, ni eyiŋ etee, tsɛ eleee he ni eyaa.

⁹ Hemɔkɛyeli ekɛyahi shiwoo shikpɔŋ lɛ nɔ akɛ gbɔ, ni ekɛ Isak kɛ Yakob ni ekɛ amɛ ji nakai shiwoo lɛ nɔŋŋ yelɔi lɛ hi bui amli;

¹⁰ ejaakɛ eekwɛ maŋ ni yɔɔ shishitoo ni wa ni etolɔ kɛ emalɔ ji Nyɔŋmɔ lɛ gbɛ.

¹¹ Hemɔkɛyeli Sara hu kɛna hewalɛ ni ekɛna musu, ni lɛ ni egbɔ eho he aahu lɛ efɔ, ejaakɛ mɔ ni wo shi lɛ ebu lɛ anɔkwafo.

¹² No hewɔ hu ni ajɛ mɔ kome ni tamɔ mɔ ni egbo momo lɛ mli afɔ mɛi ni fa babaoo tamɔ ŋwɛi ŋulamii loo ŋshɔ naa shia ni anyɛɛɛ akane lɛ.

¹³ Hemɔkɛyeli mli mɛnɛɛmɛi fɛɛ gboi yɛ. Shɔŋŋ kɛkɛ amɛna nii ni awo he shi lɛ yɛ ni amɛnya he, tsɛ amɛnine shɛko nɔ, ni amɛjaje akɛ gbɔi kɛ mɛi kpɔ̃ji ji amɛ yɛ shikpɔŋ lɛ nɔ.

¹⁴ Ejaakɛ mɛi ni wieɔ nakai nibii lɛ, amɛtsɔ̃ɔ faŋŋ akɛ amɛmiishwe amɛ diɛŋtsɛ amɛmaŋ.

¹⁵ Ni eji amɛhiɛ yɛ he ni amɛjɛ kɛba lɛ nɔ kulɛ, amɛyɛ hegbɛ ni amɛaaku amɛsɛɛ kɛaatee jɛi ekoŋŋ.

¹⁶ Shi agbɛnɛ lɛ amɛmiitao maŋ ni hi fe no, ni ji ŋwɛi nɔ lɛ. No hewɔ lɛ, efeee Nyɔŋmɔ hiɛgbele akɛ aaatsɛ lɛ amɛNyɔŋmɔ, ejaakɛ esaa maŋ eto amɛ.

¹⁷ Hemɔkɛyeli naa Abraham ŋɔ Isak eyashã afɔle be ni aka lɛ lɛ, ni ekɛ ebi kome lɛ ba ebahã, be ni enine eshɛ shiwoi lɛ anɔ momo lɛ.

¹⁸ Lɛ mɔ ni akɛɛ lɛ akɛ, “Isak mli aaatsɛ oshwie yɛ” lɛ;

¹⁹ ejaakɛ ebu akɛ Nyɔŋmɔ yɛ hewalɛ ni ekɛaatee lɛ shi kɛaajɛ gbohii ateŋ tete, ni lɛɛlɛŋ, kɛ aaawie lɛ abɛbuaŋ lɛ, enine shɛ enɔ ekoŋŋ kɛjɛ jɛi.

²⁰ Hemɔkɛyeli Isak kɛjɔɔ Yakob kɛ Esau yɛ nii ni baaba lɛ ahewɔ.

²¹ Hemɔkɛyeli Yakob kɛjɔɔ Yosef bii lɛ ateŋ mɔ fɛɛ mɔ be ni egboɔ ni ehiɛ edɛ̃hiɛmɔtso lɛ mli kɛma eyi shi esɔle lɛ.

²² Hemɔkɛyeli Yosef hu kɛtsĩ Israelbii lɛ Ijipt jee lɛ tã be ni ejeɔ jeŋ ni ewo lɛ diɛŋtsɛ ewui lɛ ahe kitã lɛ.

²³ Hemɔkɛyeli Mose fɔlɔi lɛ kɛŋɔ lɛ tee nyɔji etɛ̃ be ni afɔ lɛ lɛ, ejaakɛ amɛna akɛ gbekɛ lɛ he yɛ fɛo, ni amɛsheee maŋtsɛ lɛ akpɔ lɛ gbeyei.

²⁴ Hemɔkɛyeli hewɔ be ni Mose da lɛ ekpɛlɛ̃ɛɛ akɛ atsɛɔ lɛ Farao biyoo lɛ bi,

²⁵ eeesumɔ moŋ akɛ ekɛ Nyɔŋmɔ maŋ lɛ ana amanehulu fe nɔ ni eeeye esha mli ŋɔɔmɔ be fioo ko lɛ;

²⁶ ebuɔ Kristo hewɔ ahorabɔɔ lɛ akɛ nii babaoo fe Ijipt jwetri lɛ, ejaakɛ wɔsɛɛ nyɔmɔwoo gbɛ ekwɛɔ.

²⁷ Hemɔkɛyeli ekɛje Ijipt ni esheee maŋtsɛ lɛ mlifu lɛ gbeyei, ejaakɛ emɔ mɔ ni anaaa lɛ lɛ mli tamɔ nɔ ni eena lɛ.

²⁸ Hemɔkɛyeli ekɛto Hehoo lɛ kɛ ladikimɔ lɛ, koni mɔ ni kpãtãa kromɔbii lɛ ahiɛ akata Israelbii lɛ ahe.

²⁹ Hemɔkɛyeli amɛkɛfo Ŋshɔ Tsuru lɛ tamɔ shikpɔŋ gbiŋ, nɔ ni Ijiptbii lɛ hu ka feemɔ, ni emii amɛ lɛ.

³⁰ Hemɔkɛyeli naa Yeriko gbogboi lɛ kumɔ shwie shi be ni Israelbii bɔle lɛ gbii kpawo lɛ.

³¹ Hemɔkɛyeli hewɔ Rahab, ajwamãŋ lɛ, pleneee efataaa mɛi ni heee yeee lɛ ahe lɛ, ejaakɛ ehere saralɔi lɛ kɛ hejɔlɛ.

³² Ni mɛni makɛɛ dɔŋŋ? Ejaakɛ minaŋ mihe dekã bɔ ni mikɛaagba Gideon kɛ Barak, Samson kɛ Yefta, David kɛ Samuel kɛ gbalɔi lɛ ahe sane:

³³ mɛi ni tsɔ̃ hemɔkɛyeli nɔ amɛye maŋtsɛyelii anɔ kunim, amɛtsu jalɛnii, amɛnine shɛ shiwoi anɔ, amɛtsimɔ jatai anaa,

³⁴ amɛgbe la hewalɛ, amɛje klantei anaa, amɛna hewalɛ kɛjɛ gbedemɔ mli, amɛhe wa yɛ ta mli, amɛwo mɛi kpɔ̃ji ata lɛ foi.

³⁵ Yei anine shɛ amɛmɛi ni egboi lɛ anɔ ekoŋŋ kɛtsɔ̃ shitee nɔ. Shi mɛi krokomɛi hu, akɛ piŋmɔ gbe amɛ, ni amɛkpɛlɛ̃ɛɛ kpɔ̃mɔ, koni amɛnine ashɛ shitee ni hi fe no lɛ nɔ.

³⁶ Mɛi komɛi hu aye amɛhe fɛo ni ayi amɛ kpelebii ni awo amɛ gboklɛi ni awo amɛ tsuŋ;

³⁷ atswia amɛ tɛi, akɛ akpalala gbala amɛmli, aka amɛ, akɛ klante gbe amɛ; ahã amɛwo too gwantɛŋi kɛ too abotiai awoji kɛnyiɛ, ohĩa hia amɛ, awa amɛ yi, afee amɛ niseniianii;

³⁸ mɛi ni je nɛɛŋ esaaa amɛ lɛ, amɛtsomlo yɛ shiaŋai kɛ gɔji anɔ, kɛ tɛkploi kɛ shikpɔŋ fɔ̃ji amli.

³⁹ Ni mɛnɛɛmɛi fɛɛ lɛ, aye amɛhe odase kpakpa yɛ hemɔkɛyeli lɛ hewɔ moŋ, shi amɛnine shɛɛɛ shiwoonii lɛ anɔ,

⁴⁰ ejaakɛ Nyɔŋmɔ esaa nɔ ko kpakpa eto wɔ, koni amɛkaye emuu amɛshi wɔ.