Hebribii 10 - ŊMALƐ KRƆŊKRƆŊ LƐ

Blema shãa afɔlei lɛ nyɛɛɛ nɔ ko atsu

¹ Ejaakɛ nii kpakpai ni baaba lɛ asusuma kɛkɛ Mla lɛ hiɛ, ni jeee nibii lɛ asubaŋ diɛŋtsɛ ni, hewɔ lɛ enyɛŋ ekɛ daa afi afɔlei ni ashãa nɔtonɔto lɛ ahã mɛi ni babɛŋkɛɔ lɛ ahi kɛwula shi gbi ko gbi ko.

² Jeee nakai kulɛ ani afɔŋ afɔlei lɛ shãa? Ejaakɛ kulɛ mɛi ni bajaa Nyɔŋmɔ lɛ, kɛ atsuu amɛhe shi kome pɛ lɛ, amɛbɛ eshai ahe nilee kwraa dɔŋŋ.

³ Shi moŋ afɔlei lɛ, kaimɔ akɛkaiɔ eshai daa afi,

⁴ ejaakɛ anyɛŋ akɛ tsinai kɛ too kpakpoi alá ajie eshai.

⁵ No hewɔ lɛ, be ni Yesu baa je nɛɛ mli lɛ akɛɛ, “Afɔle kɛ nikeenii lɛ osumɔɔɔ, shi gbɔmɔtso osaa ohã mi.

⁶ Shãa afɔlei kɛ esha he afɔlei esaaa ohiɛ,

⁷ No ni mikɛɛ, ‘Naa, miba, aŋma mihe sane yɛ wolokpo lɛ mli. Ni mibafee bo, Nyɔŋmɔ, osuɔmɔnaanii lɛ.’ ”

⁸ Be ni ekɛɛ tsutsu lɛ akɛ, “Afɔle kɛ nikeenii kɛ shãa afɔlei kɛ esha he afɔlei lɛ osumɔɔɔ, ni esaaa ohiɛ hu,” (nii ni akɛbahãa yɛ Mla lɛ naa lɛ);

⁹ ni esaa ekɛɛ, “Naa, miba ni mibafee bo, Nyɔŋmɔ, osuɔmɔnaanii lɛ,” ejie tsutsu nɔ lɛ koni ekɛ nɔ ni ji enyɔ lɛ ama shi.

¹⁰ Nakai suɔmɔnaa nii lɛ mli atsuu wɔhe yɛ kɛtsɔ̃ Yesu Kristo gbɔmɔtso ni ekɛhã shi kome nyɔŋlo lɛ nɔ.

Kristo afɔleshãa lɛ tsuɔ nii

¹¹ Ni osɔfo fɛɛ osɔfo lɛ, gbi fɛɛ gbi lɛ, edamɔɔ shi esɔ̃mɔɔ, ni eshãa nakai afɔlei lɛ nɔŋŋ kpitiokpitio, nii ni nyɛɛɛ eshai ajie gbi ko gbi ko lɛ.

¹² Shi Kristo lɛ, lɛ lɛ, be ni eshã eshai ahe afɔle shi kome nyɔŋlo lɛ, eyata Nyɔŋmɔ ninejurɔ nɔ.

¹³ Ni nɔ ni eshwɛ ji akɛ eemɛ “Kɛyashi beyinɔ ni aaaŋɔ ehenyɛlɔi lɛ afee enajiaŋshi maaŋoo.”

¹⁴ Ejaakɛ afɔle kome ni eshã lɛ, ekɛhã mɛi ni atsuu amɛhe lɛ ehi kɛwula shi nyɔŋlo.

¹⁵ Ni Mumɔ Krɔŋkrɔŋ lɛ hu yeɔ wɔ odase; ejaakɛ ekɛɛ momo akɛ,

¹⁶ “Enɛ ji kpãŋmɔ ni mikɛ amɛ aaakpãŋ yɛ nakai gbii lɛ asɛɛ lɛ, Nuŋtsɔ lɛ kɛɛ. Mikɛ mimlai lɛ aaawo amɛtsuii amli, ni maŋma mawo amɛjwɛŋmɔ mli,

¹⁷ Ni amɛhe eshai lɛ kɛ amɛnɔ̃tɔ̃mɔi lɛ mikaiŋ kwraa dɔŋŋ.”

¹⁸ Ni he ni akɛ enɛɛmɛi efa yɛ lɛ, eshai ahe afɔleshãa ko bɛ dɔŋŋ.

Gbɛ ni akɛyaa Nyɔŋmɔ hiɛ

¹⁹ No hewɔ lɛ, anyɛmimɛi, wɔyɛ ekãa ni wɔkɛaabote He Krɔŋkrɔŋ lɛ mli yɛ Yesu lá lɛ hewɔ.

²⁰ Eji gbɛ hee ni ji wala gbɛ ni eje ehã wɔ kɛtsɔ̃ muhɔɔ lɛ ni ji lɛ diɛŋtsɛ eheloo lɛ mli.

²¹ Ni asaŋ akɛni wɔyɛ Osɔfonukpa kpeteŋkple ni yɔɔ Nyɔŋmɔ we lɛ nɔ hewɔ lɛ,

²² nyɛhãa wɔkɛ anɔkwa tsui ababɛŋkɛa yɛ hemɔkɛyeli ni wɔyɔɔ hewalɛ yɛ nɔ lɛ mli, kɛ tsui hu ni atsuu he ni ebɛ henilee fɔŋ ko dɔŋŋ, kɛ gbɔmɔtso ni akɛ nu ni mli tse eju he.

²³ Ni nyɛhãa wɔmɔa wɔhiɛnɔkãmɔ jajemɔ lɛ mli ni awaa ni ekagbugbãa, ejaakɛ mɔ ni wo shi lɛ anɔkwafo ni.

²⁴ Ni nyɛhãa wɔyɔseyɔsea wɔhe, koni wɔhiɛ adɔ suɔmɔ kɛ nitsumɔi kpakpai ahe.

²⁵ Ni wɔkakwa wɔhe naabuamɔ, tamɔ bɔ ni mɛi komɛi fɔɔ feemɔ lɛ, shi moŋ wɔwowoo wɔhe ŋaa, ni titri lɛ akɛni nyɛmiina akɛ Gbi lɛ miibɛŋkɛ nɛɛ.

Wɔkanaanaa Kristo afɔle lɛ nɔ

²⁶ Ejaakɛ kɛ kwa wɔkwaa wɔfeɔ esha, be ni wɔna wɔle anɔkwale lɛ sɛɛ lɛ, belɛ eshai ahe afɔle ko bɛ dɔŋŋ;

²⁷ shi kojomɔ gbɛkwɛmɔ ni yɔɔ gbeyei kɛkɛ, kɛ la grigri ni baashã henyɛlɔi lɛ.

²⁸ Kɛji mɔ ko kwa Mose Mla lɛ, anaaa lɛ mɔbɔ, shi mɛi enyɔ loo etɛ̃ odaseyeli naa lɛ agbeɔ lɛ.

²⁹ Belɛ gbɔmɔ ko ni enaanaa Nyɔŋmɔ Bi lɛ nɔ ni ebu kpãŋmɔ lá ni akɛtsuu ehe lɛ akɛ yaka nɔ ko, ni efee dromɔ Mumɔ lɛ niseniianii lɛ, te nyɛsusuɔ akɛ toigbalamɔ ni sa lɛ mli baawa tɛŋŋ?

³⁰ Ejaakɛ wɔle mɔ ni kɛɛ akɛ, “Minɔ ji oweletɔɔ, ni mawo he nyɔmɔ” lɛ; ni asaŋ, “Nuŋtsɔ lɛ aaakojo lɛ diɛŋtsɛ emaŋ lɛ.”

³¹ Nyɔŋmɔ hiɛkãalɔ lɛ dɛŋ gbeemɔ yɛ gbeyei pam.

Nyɛdamɔa shi yɛ nyɛhemɔkɛyeli lɛ mli

³² Shi nyɛkaia be ni eho lɛ, be ni la etso yɛ nyɛnɔ lɛ, bɔ ni nyɛmia nyɛhiɛ yɛ amanehulu ta babaoo mli.

³³ Eko mli lɛ akɛ jɛmɔ kɛ amanehului sɔŋŋ hã nyɛtsɔ̃mɔ kwɛmɔnii, ni eko hu mli lɛ nyɛtsɔ̃mɔ mɛi ni afee amɛ nakai lɛ ananemɛi nɔnalɔi;

³⁴ ejaakɛ nyɛmusuŋ shã nyɛ yɛ mɛi ni awo amɛ gboklɛi lɛ ahewɔ, ni nyɛnii ni aha lɛ hu nyɛkɛ miishɛɛ kpɛlɛ̃, akɛni nyɛle akɛ nyɛyɛ jwetri ni hi fe no aahu ni hiɔ shi daa lɛ.

³⁵ No hewɔ lɛ, nyɛkashɛa nyɛmli ekãa lɛ nyɛfɔ̃a ejaakɛ eyɛ nyɔmɔwoo kpeteŋkple.

³⁶ Ejaakɛ tsuishitoo he ehĩa nyɛ, koni, be ni nyɛfee Nyɔŋmɔ suɔmɔnaanii lɛ, nyɛnine ashɛ shiwoo lɛ nɔ.

³⁷ Ejaakɛ, “Be fioo kɛkɛ eshwɛ ni mɔ ni baa lɛ aaaba, ni etsɛŋ kwraa.

³⁸ Shi mɔ ni ja yɛ hemɔkɛyeli mli lɛ, yi aaana wala; ni kɛ ekpa yɛ misɛɛ lɛ misusuma naŋ ehe tsuijurɔ.”

³⁹ Shi wɔ lɛ, jeee mɛi ni kpaleɔ kɛyaa hiɛkpãtãmɔ mli lɛ ateŋ mɛi komɛi ji wɔ, shi moŋ wɔji mɛi ni kɛ hemɔkɛyeli naa amɛsusuma yiwalaheremɔ lɛ ateŋ mɛi komɛi.