Hebribii 1 - ŊMALƐ KRƆŊKRƆŊ LƐ

Nyɔŋmɔ wie kɛtsɔ̃ eBi lɛ nɔ

¹ Sa lɛ bei srɔtoi amli kɛ gbɛi srɔtoi anɔ Nyɔŋmɔ tsɔ̃ ekɛ wɔtsɛmɛi lɛ wie yɛ gbalɔi lɛ anaa.

² Shi nɛkɛ bei nɛɛ anaagbee mli lɛ, eBi lɛ naa ekɛ wɔ wie yɛ. Ekɛ lɛ efee nibii fɛɛ yelɔ, ni enɔ hu etsɔ̃ efee je lɛ.

³ Lɛ ji enunyam lɛ kpɛmɔ kɛ esu lɛ mfoniri lɛ, ni ekɛ lɛ diɛŋtsɛ ehewalɛ wiemɔ lɛ hiɛɔ nibii fɛɛ. Be ni ekɛ lɛ diɛŋtsɛ ehe etsuu wɔhe kɛjɛ wɔhe eshai lɛ amli lɛ, etee eyata shi yɛ anunyam-Tsɛ agbo lɛ nine jurɔ nɔ yɛ ŋwɛi,

⁴ ni bɔ ni efe ŋwɛi bɔfoi lɛ, nakai nɔŋŋ hu ena gbɛi ni fe amɛnɔ lɛ.

Bi lɛ fe ŋwɛi bɔfoi

⁵ Ejaakɛ ŋwɛi bɔfoi lɛ ateŋ namɔ ni Nyɔŋmɔ ekɛɛ lɛ pɛŋ akɛ, “Mi-Bi ji bo; ŋmɛnɛ mifɔ bo?” Ni asaŋ, “Matsɔ̃ eTsɛ, ni lɛ hu eeetsɔ̃ mi-Bi.”

⁶ Ni be ni ekɛ kromɔbi lɛ baa je nɛɛ mli lɛ, ekɛɛ ekoŋŋ akɛ, “Nyɔŋmɔ bɔfoi fɛɛ aja lɛ.”

⁷ Ni ŋwɛi bɔfoi lɛ ekɛɛ yɛ amɛhe akɛ, “Mɔ ni feɔ ebɔfoi lɛ mumɔi, ni esɔ̃ɔlɔi lɛ hu efeɔ amɛ lalilɛii lɛ.”

⁸ Shi Bi lɛ, ekɛɛ yɛ ehe akɛ, “Ao Nyɔŋmɔ, omaŋtsɛ sɛi lɛ ma shi kɛmiiya naanɔi anaanɔ, ni omaŋtsɛ tso lɛ, jalɛ maŋtsɛ tso ni.

⁹ Osumɔɔ jalɛ, ni onyɛɔ efɔŋfeemɔ; hewɔ lɛ Nyɔŋmɔ ni ji oNyɔŋmɔ lɛ kɛ mliflimɔ mu lɛ efɔ bo fe onanemɛi lɛ.”

¹⁰ Ni ekɛɛ ekoŋŋ, “Nuŋtsɔ, shishijee lɛ mli lɛ, bo oto shikpɔŋ lɛ shishi, ni ŋwɛi lɛ oninenaa nitsumɔ ni.

¹¹ Amɛ lɛ, amɛhiɛ baakpãtã, shi bo lɛ, ohiɔ shi daa. Amɛ fɛɛ amɛbaasuu tamɔ atade;

¹² ni oookota amɛ tamɔ mama. Ni amɛaatsake; shi bo lɛ, oyɛ bɔ ni oyɔɔ lɛ nɔŋŋ, ni ofii lɛ etãaa.”

¹³ Shi ŋwɛi bɔfoi lɛ ateŋ namɔ po ni Nyɔŋmɔ ekɛɛ lɛ pɛŋ akɛ, “Ta mininejurɔ nɔ kɛyashi beyinɔ ni maŋɔ ohenyɛlɔi lɛ mafee onajiashi maaŋoo?”

¹⁴ Ani amɛ fɛɛ lɛ, jeee mumɔ bɔfoi ni sɔ̃mɔɔ ji amɛ, ni atsuɔ amɛ ni amɛbasɔ̃mɔ mɛi ni nine baashɛ yiwalaheremɔ lɛ nɔ akɛ amɛgboshinii lɛ?