Hagai 2 - ŊMALƐ KRƆŊKRƆŊ LƐ

Sɔlemɔ we hee lɛ fɛo

¹ Maŋtsɛ Dario yinɔ afi ni ji enyɔ lɛ nɔ nyɔŋ ni ji kpawo lɛ nɔ gbi ni ji nyɔŋmai enyɔ kɛ ekome lɛ nɔ lɛ Yehowa kɛ Gbalɔ Hagai wie ni ekɛɛ lɛ akɛ,

² “Kɛɛmɔ Yuda Amralo Zerubabel, Shealtiel bi lɛ, kɛ Osɔfonukpa Yoshua, Yehozadak bi lɛ, kɛ maŋbii lɛ akɛ,

³ ‘Namɔ eshwɛ yɛ nyɛteŋ ni na bɔ ni nɛkɛ Sɔlemɔ we nɛɛ tsutsu anunyam lɛ yɔɔ hãa.’ Te nyɛnaa lɛ tɛŋŋ ŋmɛnɛ lɛ? Bɛ ejeee fɛifɛi yɛ nyɛhiɛ?

⁴ Shi agbɛnɛ Zerubabel, wajemɔ ohe! Bo Osɔfonukpa Yoshua, Yehozadak bi, bo hu wajemɔ ohe! Nyɛ, maŋbii fɛɛ, nyɛwajea nyɛhe. Nyɛtea shi, nyɛtsua nii, ejaakɛ mi kɛ nyɛ yɛ,

⁵ tamɔ bɔ ni miwo nyɛ shi be ni nyɛshi Ijipt lɛ. Mimumɔ lɛ kɛ nyɛ yɛ, no hewɔ lɛ, nyɛkashea gbeyei.” Yehowa kɛɛ.

⁶ Yehowa, Taiatsɛ lɛ, kɛɛ akɛ, “Eshwɛ be, be kukuoo ko kɛkɛ ni mibahoso ŋwɛi kɛ shikpɔŋ kɛ ŋshɔ lɛ fɛɛ.

⁷ Mibahoso je lɛ mli majimaji lɛ, ni abaaloo amɛmli jwetrii lɛ kɛaaba biɛ mikɛbawo Sɔlemɔ we lɛ mli, ni eeeyi obɔ̃ tɔ kɛ anunyam sɔŋŋ.

⁸ Je lɛ mli jwiɛtɛi fɛɛ kɛ shika fɛɛ lɛ mi, minɔ ni. Mi Yehowa, Taiatsɛ lɛ, mikɛɛ.

⁹ Sɔlemɔ we nɛɛ sɛɛkpee anunyam lɛ baafe etsutsu anunyam lɛ, ni biɛ majɛ mahã miwebii lɛ ashwere, Mi Yehowa, Taiatsɛ lɛ, mikɛɛ.”

Gbalɔ lɛ kɛ Osɔfoi lɛ yasusu saji ahe

¹⁰ Nyɔŋ ni ji nɛɛhu lɛ nɔ gbi ni ji nyɔŋmai enyɔ kɛ ejwɛ lɛ nɔ, yɛ Maŋtsɛ Dario yinɔ afi ni ji enyɔ lɛ nɔ lɛ, Yehowa kɛ Gbalɔ Hagai wie.

¹¹ Yehowa, Taiatsɛ lɛ, kɛɛ Hagai akɛ, “Bi osɔfoi lɛ koni amɛhã bo sane nɛɛ hetoo:

¹² ‘Kɛji mɔ ko kɛ loo ni ekɛmiishã afɔle mli eko ehɔ etade naamuu mli, ni atade lɛ naamuu lɛ yasa aboloo loo niyenii ni ahoo loo wain loo mu loo niyenii fɛɛ niyenii ko he lɛ, ani no feɔ nii lɛ krɔŋkrɔŋ lo?’ ” Sane nɛɛ hetoo ni osɔfoi lɛ hã ji akɛ, “Dabida”.

¹³ Kɛkɛ ni Hagai bi osɔfoi lɛ akɛ, “Shi kɛji mɔ ni eyata gbonyo he ni ekɛbule ehe ta nibii nɛɛ eko he hu lɛ, ani ebule nii lɛ lo?” Osɔfoi lɛ to he akɛ, “Hɛɛ”.

¹⁴ Kɛkɛ ni Hagai kɛɛ, “Yehowa miikɛɛ akɛ nɛkɛ pɛpɛɛpɛ ji bɔ ni maŋ nɛɛ kɛ maŋ nɛɛ mli bii lɛ ebule amɛhe yɛ mihiɛ ni nakai pɛ hu ji bɔ ni abule amɛninenaa nitsumɔ fɛɛ nitsumɔ kɛ nɔ fɛɛ nɔ ni amɛkɛbashãa afɔle amɛkɛhãa mi lɛ.”

Yehowa baajɔɔ ewebii lɛ

¹⁵ Yehowa kɛɛ akɛ, “Agbɛnɛ kɛjɛ ŋmɛnɛ nɔ kɛyaa nɛɛ lɛ nyɛsusua nɔ ni eba nyɛnɔ kɛho lɛ he. Dani nyɛbɔ̃i Sɔlemɔ we lɛ tswaa lɛ,

¹⁶ te nyɛyaa ŋmãakuu, ni be mli ni nyɛmiikwɛ gbɛ akɛ nyɛbaana ŋmãa kei ohai enyɔ lɛ, nyɛyaninaa kei oha pɛ? Mɔ ni baa wain bu naa akɛ eeba ebayɛ wain gbɛi oha lɛ, ebaninaa wain gbɛi nyɔŋmai enumɔ pɛ?

¹⁷ Mihã hela kɛ lamɔ kɛ nyɔŋmɔŋtɛi fite nyɛninenaa nitsumɔnii fɛɛ, shi enɛ fɛɛ sɛɛ lɛ nyɛkpaleee kɛbaaa miŋɔɔ.

¹⁸ Nyɛkadia kɛjɛ ŋmɛnɛ gbi nɛɛ nɔ kɛyaa nɛɛ nɔ ni baaba, ŋmɛnɛ ji nyɔŋ ni ji nɛɛhu lɛ nɔ gbi ni ji nyɔŋmai enyɔ kɛ ejwɛ, ni ji gbi ni nyɛto Yehowa Sɔlemɔ we lɛ shishi lɛ.

¹⁹ Bɛ dumɔ wu ko bɛ aboŋo mli, ni wain tso kɛ agbãmi tso kɛ akutu tso kɛ mu tso woko? Shi naa, kɛjɛ ŋmɛnɛ gbi nɛɛ nɔ lɛ mibajɔɔ nyɛ.”

Yehowa wo Zerubabel shi

²⁰ Nakai gbi lɛ nɔŋŋ, ni ji nyɔŋ lɛ nɔ gbi nyɔŋmai enyɔ kɛ ejwɛ lɛ nɔ lɛ, Yehowa kɛ wiemɔ ni ji enyɔ tsu Gbalɔ Hagai, ni ekɛɛ lɛ akɛ,

²¹ “Kɛɛmɔ Yuda Amralo Zerubabel, Shealtiel bi lɛ, akɛ eshwɛ fioo ni mibahoso ŋwɛi kɛ shikpɔŋ lɛ hu,

²² ni mibakpa maŋtsɛmɛi fɛɛ, ni mibafo amɛlumɔyeli sɛɛ. Mibakpãtã tayaa shwiilii kɛ shwiilii lɛ amlitaralɔi fɛɛ ahiɛ, ni mahã amɛkpɔŋɔnɔtalɔi lɛ adɔ amɛhe amɛgbegbee amɛ sɔŋŋ amɛhe.

²³ Nakai gbi lɛ nɔ lɛ, Zerubabel, Shealtiel bi, mitsulɔ, mibaŋɔ bo koni oye maŋbii lɛ alumɔ yɛ mi migbɛi mli, ejaakɛ bo ji mɔ ni mihala.” Mi, Taiatsɛ, mi mikɛɛ.