Habakuk 3 - ŊMALƐ KRƆŊKRƆŊ LƐ

Sɔlemɔ ni Habakuk sɔle

¹ Sɔlemɔ ni Gbalɔ Habakuk sɔle nɛ,

² “Ao Yehowa, minu nii ni otsu lɛ he, ni miishe gbeyei. Yehowa, tsu onitsumɔi wuji lɛ ekoŋŋ yɛ wɔyinɔ nɛɛ hu nɔ. Hã ale yɛ afii nɛɛ amli nɔŋŋ. Omlifu mli tete lɛ, hã omusuŋ atsɔ̃ bo!

³ Naa Nyɔŋmɔ jɛ Edom kɛmiiba; Nyɔŋmɔ Krɔŋkrɔŋ lɛ miiba kɛjɛ Paran Gɔŋ lɛ nɔ. Enunyam lɛ ha ŋwɛi, ni shikpɔŋ lɛ nɔ eyi tɔ kɛ eyijiemɔ.

⁴ Ekpɛmɔ lɛ tamɔ la; la kpɛlɛɔ kɛjɛɔ edɛŋ he ni ji ehewalɛ teemɔhe lɛ.

⁵ Tsɛŋemɔ hela nyiɛɔ ehiɛ, ni gbele hela nyiɛ esɛɛ tuuŋtu.

⁶ Ewa edamɔ shi, ni shikpɔŋ hoso, Ekwɛ, ni maji lɛ ahe kpokpo. Naanɔ gɔji lɛ gbɛ shwã ni naanɔ gɔŋkpɔi lɛ ba shi, yɛ hei ni enyiɛ blema ko lɛ.

⁷ Mina, Kushanbii miishe gbeyei, ni Midianbii ahe miikpokpo.

⁸ Yehowa, ani fai omli wo la wo? Fai ni omli fu, loo ŋshɔ ni ogri owo? No hewɔ ota kunimyeli okpɔŋɔ kɛ tayaa shwiili mli kɛbaa nɛɛ?

⁹ Ojie ogãi lɛ hebo lɛ, ni ofee kralo kɛbaatsɛ̃. Okɛ fai egbala shikpɔŋ lɛ mli.

¹⁰ Gɔji lɛ na bo, ni amɛhosohosoo; nu tue kɛbaho yoo. Bu kwɔŋkwɔŋ lɛ wo egbee; ehole eniji anɔ kɛtee ŋwɛi.

¹¹ La ni ogãimlibii lɛ kpɛlɛ kɛ okpɔlɔi lɛ hu akpɛlɛmɔ hã hulu kɛ nyɔɔŋtsere wa damɔ shi.

¹² Okɛ mlila shi shi kɛtsɔ̃ shikpɔŋ lɛ nɔ, ni onaanaa majimaji lɛ anɔ kɛho yɛ mlifu naa.

¹³ Otee oyahere omɛi lɛ ayiwala, koni oyahere mɔ ni ofɔ lɛ mu lɛ yiwala. Ojwara mɔ fɔŋ lɛ weku lɛ yitso, ni oŋmɛ lɛ yayai kɛjɛ eshuɔ kɛyata ekuɛ.

¹⁴ Okɛ okpɔlɔ lɛ gbulɔ etabilɔi ni ba tamɔ lasuogbele koni amɛbagbɛ mi amɛshwã kɛ mliflimɔ, tamɔ nɔ ni amɛba ohiafo piŋmɔ yɛ teemɔ mli lɛ.

¹⁵ Okɛ okpɔŋɔi lɛ naanaa ŋshɔ ni ji nu kpeteŋkple ni kumɔɔ lɛ nɔ.

¹⁶ Minu enɛɛmɛi, ni mihe kpokpo; gbɛɛmɔ lɛ hã minaabu jo bliblibli. Mikpɔiaŋ fee gbedee, ni minaji tɔ̃tɔ̃ yɛ shikpɔŋ. Mibata shi kpoo mamɛ gbi ni abaahao mɛi ni baa koni amɛkɛ maŋ lɛ abawu lɛ.

¹⁷ Eyɛ mli akɛ agbãmi tso gbaŋ afofro, ni yibii ehiŋ wain tsei anɔ; eyɛ mli akɛ mu tsei ayibii baafee yaka, ni anaŋ ŋmɔshi niyenii; eyɛ mli akɛ toi fɛɛ aaagboi, ni tsinai aaatã yɛ tsina tsui amli nɛ.

¹⁸ Kɛ̃lɛ mi lɛ mibanya, ni mimli aaafli mi yɛ Yehowa miyiwalaheremɔ Nyɔŋmɔ lɛ mli.

¹⁹ Nuŋtsɔ Nyɔŋmɔ lɛ woɔ mi hewalɛ; ehãa minaji feɔ tamɔ ofrote naji kɛnyiɛɔ shweshweeshwe yɛ gɔji lɛ anɔ. (Akɛhã Lalatsɛnukpa lɛ koni akɛ kpãa saŋku atswa.)