Habakuk 2 - ŊMALƐ KRƆŊKRƆŊ LƐ

Hetoo ni Yehowa hã Habakuk

¹ Mibakwɔ mayadamɔ shi kɛbu yɛ mɔɔ lɛ yiteŋ koni makwɛ nɔ ni Yehowa baakɛɛ mi, kɛ nɔ hetoo ni ebaahã mi yɛ mikɔmɔyeli lɛ hewɔ.

² Yehowa hã mi hetoo nɛɛ, “Kpɛ ninaa nɛɛ faŋŋ yɛ tɛi tɛtɛrɛbii anɔ koni anyɛ akane oya.

³ Ninaa nɛɛ be lɛ shɛko moŋ, shi eeye ehe oyai kɛba. Kɛji eshashao shi tete po jiŋŋ, bo lɛ mɛɛ, ejaakɛ ebaaba kɛ̃ ni etsɛŋ.

⁴ Ni shɛɛ wiemɔ lɛ nɛ: ‘Naa, mɔ ni efeee jalɛnii lɛ, eyi naŋ wala; shi mɔ ni feɔ jalɛnii lɛ ehemɔkɛyeli nɔ ebaatsɔ̃ ni eyi ana wala.’ ”

Mɛi ni efeee jalɛnii ahiɛkpãtãmɔ

⁵ Naa, wain lakaa mɔ. Gbɔmɔ ni woɔ ehe lɛ, enyɛɛɛ shi ehi. Efeɔ fuu tamɔ gbohiiaje; ni etamɔ gbele, etɔko dã. Ebuaa majimaji fɛɛ anɔ bii anaa kɛbaa, ni etiãa amɛ ehãa ehe.

⁶ Aso majimaji nɛɛ fɛɛ yeŋ lɛ yɔɔ amɛkɛɛ akɛ, “Kpoo hã mɔ ni haa nii ni ele faŋŋ akɛ jeee enɔ ni, kɛ mɔ ni loɔ awabatoonii eshwieɔ enɔ lɛ. Mɛɛ beyinɔ nɔŋŋ ni?”

⁷ Naa, trukaa ni onyɔjiatsɛmɛi lɛ aaate shi awo bo. Mɛi ni hiɛ etsɛ̃ lɛ aaaha onii.

⁸ Akɛ ni oha majimaji babaoo anii hewɔ lɛ, bo hu majimaji lɛ amli mɛi ni eshwɛ lɛ baaha onii yɛ gbɔmɛi ala shi ni oshwie, kɛ yi ni owa shikpɔŋ lɛ nɔ maji lɛ kɛ amɛmli bii lɛ fɛɛ ahewɔ.

⁹ Kpoo hã mɔ ni etsɔ̃ gbɛ fɔŋ nɔ ena nii ehã ewe, ni ebɔ mɔdɛŋ eyama etsu yɛ he ko grɔŋŋ bɔ ni afee ni efee shweshweeshwe koni efɔŋ ko akasa ehe lɛ.

¹⁰ Ogbɛjianɔtoo lɛ eyagbala hiɛgbele ebashwie owe lɛ nɔ, ejaakɛ majimaji lɛ ni oplenee lɛ ehã bo diɛŋtsɛ owala hiɛ ekpãtã moŋ.

¹¹ Gbogbo mli tɛ tete miibolɔ kɛmiishi nyɛ, ni tsu yiteŋ mplaŋ lɛ hu miihere tɛ lɛ blɔmɔ lɛ nɔ.

¹² Kpoo hã mɔ ni kɛ lashishwiemɔ toɔ maŋ, ni ekɛ efɔŋfeemɔ tswaa maŋ lɛ.

¹³ Naa, aso jeee Yehowa, Taiatsɛ lɛ, dɛŋ sane nɛ, akɛ gbɔmɔ atsu nii, ni là abakpãtã hiɛ lo, ni majimaji lɛ agbo deŋme yaka lo?

¹⁴ Moŋ shikpɔŋ lɛ nɔ baayi tɔ kɛ Yehowa anunyam lɛ he nilee, tamɔ bɔ ni ŋshɔ eyi tɔ kɛ nu lɛ.

¹⁵ Kpoo hã bo mɔ ni ojɛɔ mlifu mli ohãa onaanyo dãa enuɔ, ni etɔɔ, bɔ ni afee ni okwɛ eyayaiaŋ.

¹⁶ Nakai nɔŋŋ bo hu, yɛ hiɛnyam najiaŋ lɛ, hiɛgbele baamɔ bo. Bo hu obaanu eko koni odidãã. Kpulu ni yɔɔ Yehowa ninejurɔ lɛ aaatsɔ̃ kɛbashɛ onɔ, ni ohiɛnyam lɛ baatsɔ̃ hiɛgbele ni naa wa.

¹⁷ Awui ni nyɛye Lebanon lɛ baasu nyɛtsui fe nine; emli kooloi lɛ hiɛ ni nyɛkpãtã lɛ baahã nyɛshe gbeyei, ejaakɛ nyɛshwie gbɔmɛi alá shi, ni nyɛwa shikpɔŋ lɛ nɔ maji lɛ kɛ amɛmli bii lɛ fɛɛ ayi.

¹⁸ Mɛni ji amãgã he sɛɛnamɔ? Ŋaalɔ ninenaa nitsumɔ kɛkɛ ni; ni egbaaa mɔ ko nɔ ko fe amale. Mɛni hewɔ esa akɛ mɔ ni fee amãgã lɛ kɛ ehiɛ afɔ̃ lɛ diɛŋtsɛ eninenaa nitsumɔnii, ni ji amãgã mumui nɔ?

¹⁹ Kpoo hã bo mɔ ni okɛɔ tso akɛ, “Ohiɛ atsɛ̃!” Ni okɛɔ tɛ mumui hu akɛ, “Tee shi!” Ani amãgã baanyɛ ejie ninaa atsɔ̃ɔ bo? Naa, akɛ shika kɛ jwiɛtɛi baaha ehe nɛ, shi moŋ wala kome nɛkɛ bɛ emli.

²⁰ Naa, Yehowa yɛ eSɔlemɔ we krɔŋkrɔŋ lɛ mli, shikpɔŋ lɛ nɔ gbɔmɛi fɛɛ afee diŋŋ yɛ ehiɛ.