Habakuk 1 - ŊMALƐ KRƆŊKRƆŊ LƐ

¹ Ninaa ni Yehowa jie etsɔ̃ɔ Gbalɔ Habakuk lɛ nɛ.

Habakuk wie eshi toikɔdɔmɔ saneyeli

² “Ao, Yehowa, mɛɛ beyinɔ nɔŋŋ mabɔlɔ kɛyashi dani ooobo mi toi? Mɛɛ beyinɔ matsɛ bo kɛyashi dani ooobahere wɔ kɛje yiwalɛ mli?

³ Mɛɛba ohãa minaa nifɔɔjianii nɛɛ, ni bo hu okwɛɔ haomɔi nɛɛ lɛ? Nifitemɔ kɛ henitswiamɔ sɔŋŋ ebɔle mihe kɛkpe, ni nɔmɔ kɛ bei ete shi yɛ he fɛɛ he.

⁴ Ejaakɛ mla lɛ hewalɛ egbo, ni no hewɔ lɛ, ayeee jalɛ sane. Mɛi fɔ̃ji ebɔle jalɔ lɛ kɛkpe, ni no hewɔ lɛ, atsɔ̃ jalɛ sane hiɛ abu shi.”

Hetoo ni Yehowa hã

⁵ Kɛkɛ ni Yehowa kɛɛ emɛi lɛ akɛ, “Nyɛkwɛa majimaji lɛ ateŋ, ni nyɛhe baajɔ̃ nyɛhe jogbaŋŋ yɛ nii ni nyɛbaana lɛ hewɔ. Ejaakɛ miitsu nitsumɔ ko yɛ amɛteŋ yɛ nyɛyinɔ nɛɛ, ni kɛji agba nyɛ lɛ nyɛheŋ nyɛyeŋ!

⁶ Naa, mitee Babilonbii lɛ ni yi wa, asaŋ ni amɛhe ejɔɔɔ lɛ ashi. Amɛfãa kɛkpaa je lɛ mli shikpɔji lɛ fɛɛ anɔ kɛyaŋɔɔ shikpɔji lɛ.

⁷ Amɛhe ŋmiŋmi kɛ gbeyei mɔmɔɔ mɛi fɛɛ, ni nɔ ni amɛ amɛsumɔɔ lɛ, no amɛfeɔ, ni no ji nɔ ni tsɔ̃ɔ mla.

⁸ “Amɛkpɔŋɔi ahe yɛ oya fe mlaŋtswi, ni amɛhiɛ yɛ kramakrama fe klãji ni je ena amɛ kɛ hɔmɔ. Amɛkpɔŋɔnɔtalɔi lɛ jɛɔ shɔŋŋ amɛbaa; amɛshaneɔ shi kɛ foi tamɔ okropɔŋ shaneɔ shi eshaa eniyenii.

⁹ “Amɛtai lɛ fãa kɛbaa kɛ yiwalɛ kɛbayeɔ shikpɔji anɔ; ni amɛhe ŋmiŋmi mɔmɔɔ mɛi kɛji amɛmiiba. Amɛnomii ni amɛbuaa naa lɛ ayifalɛ tamɔ shia.

¹⁰ Amɛyeɔ maŋtsɛmɛi ahe fɛo; ni lumɛi ahe feɔ amɛŋmɔlɔ. Mɔɔ ko mɔɔ ko shɔ̃mɔ waaa hãaa amɛ, ejaakɛ amɛtereɔ sũ amɛkɛbaa mɔɔ lɛ he kɛkɛ lɛ amɛshɔ̃.

¹¹ Ni amɛfoɔ mli kɛhoɔ shwiaa kɛyaa tamɔ kɔɔyɔɔ, amɛ ji amɛhe efɔŋfeelɔi, ni hewalɛ ni amɛyɔɔ lɛ no ji nɔ ni amɛjaa.”

Habakuk gbigbli emli etsɔ̃ɔ Yehowa ekoŋŋ

¹² “Yehowa, kɛjɛ naanɔ beebe lɛ bo ji miNyɔŋmɔ kɛ Mɔ Krɔŋkrɔŋ Koome! Ohaŋ wɔgboi! Ao, Yehowa, okɔ Babilonbii lɛ, ni bo ohã amɛma shi shiŋŋ kɛhã wɔtoigbalamɔ.

¹³ Shi te aaafe tɛŋŋ ni okwɛ ni efɔŋ aya nɔ hu? Ohiŋmɛi yɛ krɔŋŋ tsɔ̃ fe bɔ ni okɛaakwɛ koni nifɔɔjianii aya nɔ. No hewɔ lɛ, mɛɛba ni ofee dioo be mli ni efɔŋfeelɔi kpãtãa mɛi ni hi fe amɛ hiɛ?

¹⁴ “Ejaakɛ ohã gbɔmɛi etsɔ̃ tamɔ ŋshɔŋloo loo shikpɔŋ lɛ nɔ waamɔnii ni bɛ nɔyelɔ.

¹⁵ Babilonbii lɛ kɛ kpoŋ shaa gbɔmɛi oookɛɛ loi ji amɛ; amɛfɔ̃ɔ gbɔmɛi anɔ yaa, ni amɛgbalaa amɛ tamɔ adrã; ni amɛnyaa ni amɛmli filiɔ amɛ.

¹⁶ No hewɔ lɛ, amɛshãa afɔle amɛkɛjaa amɛyaa lɛ, ni amɛshãa tsofakɛŋma amɛkɛhãa amɛtsãani lɛ, ejaakɛ nomɛi hãa amɛnaa nii kpɔtɔɔ amɛyeɔ.

¹⁷ “Aso Babilonbii nɛɛ baakã he aye amɛhewalɛ nɛɛ mli nii daa, koni amɛya nɔ nɛkɛ sɔŋŋ kɛplenee majimaji lɛ amli bii ni mɔbɔnalɛ ko kwraa bɛ mli lo?”