Galatabii 6 - ŊMALƐ KRƆŊKRƆŊ LƐ

Nyɛkpeekpea nyɛhe kɛterea nyɛjatsui lɛ

¹ Anyɛmimɛi, kɛji mɔ ko miitɔ̃ ni amɔ lɛ lɛ, nyɛ mɛi ni nyɛ ji mumɔŋ gbɔmɛi lɛ nyɛsaa nakai mɔ lɛ ekoŋŋ kɛ mlijɔlɛ mumɔ; ni ole ohe nɔ kwɛmɔ koni bo hu akaka bo.

² Nyɛjatsui lɛ nyɛkpeekpea nyɛhe kɛterea, ni nɛkɛ gbɛ nɔ nyɛaatsɔ nyɛye Kristo mla lɛ nɔ.

³ Ejaakɛ kɛji efeɔ mɔ ko akɛ mɔ ko ji lɛ be mli ni ejeee mɔ ko lɛ eeshishiu ehe.

⁴ Shi mɔ fɛɛ mɔ aka lɛ diɛŋtsɛ enitsumɔ ekwɛ, ni no dani eeena nɔ ko yɛ lɛ diɛŋtsɛ emli kɛkɛ ni eshwã efɔ̃ nɔ, ni jeee mɔ kroko nɔ́ nɔ.

⁵ Ejaakɛ mɔ fɛɛ mɔ aaatere lɛ diɛŋtsɛ ejatsu.

⁶ Shi mɔ ni atsɔ̃ɔ lɛ wiemɔ lɛ ekɛ etsɔ̃ɔlɔ lɛ aja nibii kpakpai fɛɛ ni eyɔɔ.

⁷ Nyɛkalakaa nyɛhe, Nyɔŋmɔ lɛ aliii lɛ. Ejaakɛ nɔ pɛ ni gbɔmɔ duɔ lɛ, no nɔŋŋ ebaakpa.

⁸ Ejaakɛ mɔ ni duɔ nii yɛ lɛ diɛŋtsɛ eheloo mli lɛ, eheloo lɛ mli nɔŋŋ ebaakpa fitemɔ kɛjɛ; shi mɔ ni duɔ nii yɛ Mumɔ mli lɛ, Mumɔ lɛ mli nɔŋŋ ebaakpa naanɔ wala kɛjɛ.

⁹ Shi nyɛkahãa ekpakpafeemɔ miitɔa wɔ, ejaakɛ kɛ wɔnijiaŋ ejeee wui lɛ, wɔbaakpa hu yɛ be ni sa mli.

¹⁰ Belɛ be mli ni hegbɛ yɔɔ hã wɔ nɛɛ, nyɛhãa wɔfea mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.

Naagbee kɔkɔbɔɔ kɛ ŋamɔ

¹¹ Nyɛkwɛa ni ŋmaa okadii adaramɔ ni mikɛŋma nyɛ wolo kɛ mi diɛŋtsɛ minine!

¹² Mɛi ni taoɔ akɛ amɛ hiɛ aba nyam yɛ gbɔmɛi ahiɛ lɛ, amɛ, amɛnyɛɔ nyɛnɔ ni afolɔ nyɛ ketia, be ni afee kɛkɛ ni akawa amɛyi yɛ Kristo sɛŋmɔtso lɛ hewɔ.

¹³ Ejaakɛ mɛi ni afolɔ amɛ ketia lɛ diɛŋtsɛ tete yeee Mla lɛ nɔ; shi moŋ amɛmiitao akɛ afolɔ nyɛ ketia, koni amɛshwã amɛfɔ̃ nyɛheloo gbɛfaŋ nii nɛɛ nɔ.

¹⁴ Shi mi lɛ, akagbale mi fɔ̃ŋfɔ̃ akɛ mashwã mafɔ̃ nɔ ko nɔ akɛ ja wɔNuŋtsɔ Yesu Kristo sɛŋmɔtso lɛ, nɔ nɔ ni atsɔ̃ asɛŋ je lɛ ahã mi, ni mi hu asɛŋ mi ahã je lɛ.

¹⁵ Ejaakɛ Kristo Yesu mli lɛ ketiafoo jeee nɔ ko, ni asaŋ foo hu jeee nɔ ko, shi moŋ nɔ ni ji nɔ ko ji bɔɔnɔ hee tsɔ̃mɔ.

¹⁶ Ni mɛi abɔ ni aaanyiɛ yɛ nɛkɛ jeŋba he mla nɛɛ naa lɛ, hejɔlɛ kɛ mɔbɔnalɛ aba amɛ kɛ “Nyɔŋmɔ Israel” lɛ nɔ.

¹⁷ Enɛ sɛɛ lɛ mɔ ko akagba minaa dɔŋŋ, ejaakɛ mihiɛ Nuŋtsɔ Yesu pilamɔ okadii lɛ yɛ migbɔmɔtso lɛ he.

¹⁸ WɔNuŋtsɔ Yesu Kristo dromɔ lɛ kɛ nyɛmumɔ lɛ ahi shi, anyɛmimɛi. Amen.