Galatabii 5 - ŊMALƐ KRƆŊKRƆŊ LƐ

Nyɛhiɛa nyɛheyeli lɛ mli

¹ Kristo ehã wɔye wɔhe, no hewɔ lɛ, nyɛdamɔa shi shiŋŋ, ni nyɛkahãa abɔa nyɛ nyɔŋyeli apã lɛ dɔŋŋ.

² Naa, mi Paulo, miikɛɛ nyɛ akɛ, kɛji nyɛhã afolɔ nyɛ ketia lɛ, Kristo he baŋ sɛɛnamɔ haŋ nyɛ.

³ Shi misaa miiye odase miitsɔ̃ɔ gbɔmɔ fɛɛ gbɔmɔ ni foɔ ketia lɛ akɛ ehiɛ nyɔmɔ, no ji akɛ eye Mla muu lɛ fɛɛ nɔ.

⁴ Shi nyɛ mɛi ni nyɛtaoɔ akɛ abu nyɛ bem yɛ Mla mli lɛ, nyɛtse nyɛhe kɛjɛ Kristo he; nyɛjɛ dromɔ lɛ mli nyɛgbee shi.

⁵ Ejaakɛ wɔ lɛ, Mumɔ lɛ nɔ wɔtsɔ̃ɔ wɔkɛ hemɔkɛyeli mɛɔ jalɛ ni wɔhiɛ kã nɔ lɛ.

⁶ Ejaakɛ Kristo Yesu mli lɛ, jeee ketiafoo, ni asaŋ jeee foo hu ni nyɛɔ nɔ ko efeɔ, shi moŋ hemɔkɛyeli ni tsɔ̃ɔ suɔmɔ nɔ etsuɔ nii lɛ.

⁷ Kulɛ nyɛmiiya nɔ jogbaŋŋ; namɔ po tsi nyɛ gbɛ akɛ nyɛkabo anɔkwale lɛ toi?

⁸ Jwɛŋmɔ tsake mɔ nɛɛ, jeee mɔ ni tsɛɔ nyɛ lɛ mli ejɛ.

⁹ Masha bibioo hãa ma sui lɛ fɛɛ shaa.

¹⁰ Mi lɛ mikɛ mihiɛ efɔ̃ nyɛnɔ yɛ Nuŋtsɔ lɛ mli akɛ ebaŋ lɛ akɛ nyɛaajwɛŋ jwɛŋmɔ kroko; shi mɔ ni haoɔ nyɛjwɛŋmɔ lɛ, mɔ fɛɛ mɔ ni ji lɛ, esɔ̃ abua eyiteŋ.

¹¹ Shi mi lɛ, anyɛmimɛi, kɛji ketiafoo lɛ mishiɛɔ lolo lɛ, mɛɛba mɔ ni awaa mi yi lolo? Nakai ni kulɛ, sɛŋmɔtso lɛ he pampi lɛ sɛɛ efo.

¹² Ao mina ni kulɛ mɛi ni hãa nyɛgbugbãa lɛ folɔ amɛhenii tete po amɛshwie.

Heyeli mli shihilɛ kɛ Mumɔ naa nyiɛmɔ

¹³ Ejaakɛ heyeli mli atsɛ nyɛ kɛba, anyɛmimɛi; shi nyɛheyeli lɛ kɛkɛ ni nyɛkahãa etsɔ̃a hegbɛ ehã heloo lɛ taomɔnii, shi moŋ nyɛtsɔa suɔmɔ nɔ nyɛsɔ̃mɔsɔ̃mɔa nyɛhe.

¹⁴ Ejaakɛ Mla muu lɛ fɛɛ nɔyeli yɛ wiemɔ kome nɛɛ mli akɛ, “Suɔmɔ onaanyo tamɔ bɔ ni osumɔɔ bo diɛŋtsɛ ohe lɛ.”

¹⁵ Shi kɛ nyɛkɔ̃mɔkɔ̃mɔɔ nyɛhe ni nyɛyeyeɔ nyɛhe lɛ, nyɛkwɛa ni nyɛkakpãtãa nyɛhe hiɛ.

¹⁶ Shi nɔ ni mikɛɔ ji, “Nyɛnyiɛa yɛ Mumɔ naa, ni nyɛfeŋ heloo akɔnɔi lɛ anaa nii.”

¹⁷ Ejaakɛ nii ni heloo lɛ taoɔ lɛ kɛ Mumɔ lɛ eyaaa, ni nii ni Mumɔ lɛ hu taoɔ lɛ kɛ heloo lɛ eyaaa; enɛɛmɛi kɛ amɛhe yeee, enɛ hewɔ lɛ nii ni nyɛsumɔɔ lɛ nyɛnyɛ̃ɛɛ nyɛfee.

¹⁸ Shi kɛ Mumɔ lɛ kpalaa nyɛ lɛ, no lɛ nyɛbɛ Mla lɛ shishi.

¹⁹ Shi heloo lɛ nitsumɔi lɛ jeɔ kpo faŋŋ: nomɛi ji ajwamãŋbɔɔ, mujinitsumɔ, nyɛnyɛŋtswibɔɔ,

²⁰ wɔŋjamɔ, suu, nyɛɛ, bei, awuŋayeli, mlilawoo, bei mumɔ, atuatsemɔ, mligbalamɔ,

²¹ hiɛkɔ̃ɔ, dãatɔɔ, dãanumɔ mli basabasafeemɔ kɛ nii ni tamɔ enɛɛmɛi, nii ni miikɛɛ nyɛ mato, tamɔ bɔ ni mikɛɛ nyɛ momo lɛ, akɛ mɛi ni feɔ nɛkɛ nii nɛɛ lɛ, amɛnine shɛŋ Nyɔŋmɔ maŋtsɛyeli lɛ nɔ.

²² Shi Mumɔ lɛ yibii ji suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli,

²³ kpoofeemɔ, henɔyeli. Enɛɛmɛi lɛ mla ko eguuu.

²⁴ Shi mɛi ni ji Kristo nii lɛ, amɛsɛŋ heloo lɛ kɛ ehiɛdɔɔnii kɛ ekɔnɔi lɛ fɛɛ.

²⁵ Kɛji wɔhiɛ kã yɛ Mumɔ lɛ naa lɛ, nyɛhãa wɔnyiɛa yɛ Mumɔ lɛ naa hu.

²⁶ Wɔkatao yaka anunyam ni wɔwowoo wɔhe mlila ni wɔhiɛ kɔ̃ wɔnanemɛi anɔ.