Galatabii 4 - ŊMALƐ KRƆŊKRƆŊ LƐ

¹ Shi miikɛɛ akɛ, gbii abɔ fɛɛ ni gboshiniiyelɔ lɛ ji abifao lɛ, srɔto ko bɛ ekɛ nyɔŋ teŋ, tsɛbelɛ lɛ ji nii lɛ fɛɛ tsɛ;

² shi moŋ eyɛ nɔkwɛlɔi kɛ tsuji nukpai ashishi kɛyashi beyinɔ ni tsɛ lɛ eto lɛ.

³ Nakai nɔŋŋ kɛ̃ wɔ hu, be ni wɔji abifabii lɛ, akɛ wɔ wo je nɛɛŋ shishijee nibii anyɔŋyeli lɛ shishi.

⁴ Shi be ni be lɛ shɛ lɛ, Nyɔŋmɔ tsu lɛ diɛŋtsɛ eBi lɛ kɛba, yoo fɔ lɛ, eba Mla shishi;

⁵ koni ebakpɔ̃ mɛi ni yɔɔ Mla shishi lɛ, ni wɔtsɔ̃mɔ bii.

⁶ Shi akɛni bii ji nyɛ hewɔ lɛ, Nyɔŋmɔ tsu eBi lɛ Mumɔ lɛ kɛba nyɛtsuii amli, ni eboɔ akɛ, “Aba, Ataa!”

⁷ No hewɔ lɛ, ojeee nyɔŋ dɔŋŋ, shi moŋ bi ji bo, ni kɛji bi ji bo lɛ, belɛ Nyɔŋmɔ efee bo niyelɔ hu.

Galatiabii asɛɛsɛɛyaa

⁸ Shi be mli ni nyɛleee Nyɔŋmɔ lɛ, nyɛfee nyɛhe nyɔji nyɛhã nibii ni yɛ amɛbɔɔsu naa lɛ jeee nyɔŋmɔi ni lɛ;

⁹ shi agbɛnɛ moŋ ni nyɛle Nyɔŋmɔ, aloo ni Nyɔŋmɔ ele nyɛ lɛ, te feɔ tɛŋŋ ni nyɛkuɔ nyɛsɛɛ kɛya shishijee nibii ni nyɛ̃ɛɛ nɔ ko afee ni bɛ hewalɛ ko lɛ aŋɔɔ, ni nyɛsaa nyɛtaoɔ akɛ nyɛje shishi nyɛsɔ̃mɔ amɛ ekoŋŋ lɛ?

¹⁰ Nyɛyeɔ gbii kɛ nyɔji kɛ bei kɛ afii ahe gbɛjianɔ ni ato lɛ nɔ.

¹¹ Miishe gbeyei akɛ ekolɛ yakatswaa migba mihe naa yɛ nyɛhe lɛ.

¹² Miikpa nyɛ fai, anyɛmimɛi, nyɛtamɔa mi, ejaakɛ mi hu mitamɔ nyɛ. Nyɛfeko mi efɔŋ ko;

¹³ shi nyɛle akɛ heloo gbedemɔ mli mijaje Sanekpakpa lɛ yɛ mitsɔ̃ɔ nyɛ klɛŋklɛŋ be ni mijaje lɛ,

¹⁴ ni nɔ ni ji naatsɔ̃ɔmɔ hã nyɛ yɛ mli lɛ, nyɛgbeee he guɔ ni asaŋ nyɛnyaŋeee; shi moŋ nyɛhere mi tamɔ Nyɔŋmɔ bɔfo, tamɔ Kristo Yesu diɛŋtsɛ.

¹⁵ Agbɛnɛ nɛgbɛ nyɛmiishɛɛ lɛ yɔɔ? Ejaakɛ miiye nyɛhe odase akɛ ehiɔ feemɔ jikulɛ nyɛfamɔ nyɛhiŋmɛii tete nyɛhã mi.

¹⁶ Ani mitsɔ̃ nyɛhenyɛlɔ akɛ mikɛɔ nyɛ nɔ ni ji anɔkwale lɛ?

¹⁷ Jeee nyɛhe mɔdɛŋ kpakpa ko mɛi komɛi bɔɔ lɛ, amɛmiitao akɛ amɛtsi nyɛ wɔŋɔɔbaa gbɛ moŋ, koni nyɛbɔ amɛ moŋ amɛhe mɔdɛŋ.

¹⁸ Shi ehi akɛ abɔ nyɛhe mɔdɛŋ daa kɛji akɛ jwɛŋmɔ kpakpa fee, ni jeee be ni mikɛ nyɛ yɔɔ lɛ kɛkɛ.

¹⁹ Mibii bibii ni mikɔ̃mɔɔ kɛ nyɛfɔmɔ ekoŋŋ kɛyashi beyinɔ ni aaashɔ̃ Kristo subaŋ yɛ nyɛmli.

²⁰ Mina ni kulɛ miyɛ nyɛmasɛi amrɔ nɛɛ ni mitsake gbɛ nɔ ni matsɔ̃ ni mikɛ nyɛ awie, ejaakɛ miyiŋ feɔ mi kɔshikɔshi yɛ nyɛhewɔ!

Mla lɛ kɛ hemɔkɛyeli lɛ

²¹ Nyɛ mɛi ni nyɛtaoɔ akɛ nyɛhi Mla shishi lɛ, nyɛkɛa mi, ani nyɛnuuu Mla lɛ lo?

²² Ejaakɛ aŋma akɛ Abraham yɛ bii enyɔ, mɔ kome lɛ, ekɛ nyɔŋyoo lɛ fɔ lɛ, ni mɔ kome hu ekɛ odehe lɛ fɔ lɛ.

²³ Shi agbɛnɛ lɛ, mɔ ni ekɛ nyɔŋyoo lɛ fɔ lɛ, afɔ lɛ yɛ heloo naa; shi mɔ ni ekɛ odehe lɛ fɔ lɛ, afɔ lɛ yɛ shiwoo naa.

²⁴ Nibii nɛɛ abɛ ni. Enɛɛmɛi ji kpãŋmɔi enyɔ lɛ. Ekome lɛ jɛ Sinai Gɔŋ lɛ nɔ, ni nyɔŋyeli mli efɔɔ ewoɔ: no ji Hagar;

²⁵ ejaakɛ Hagar ji Sinai Gɔŋ lɛ yɛ Arabia; shi ekɛ ŋmɛnɛŋmɛnɛ Yerusalɛm lɛ yaa, ejaakɛ ekɛ ebii lɛ ji nyɔji;

²⁶ shi ŋwɛi Yerusalɛm lɛ ji odehe lɛ, ni ji wɔnyɛ lɛ.

²⁷ Ejaakɛ aŋma akɛ, “La nyamɔ lala, bo kene ni ofɔɔɔ; wo nyamɔ nɔ ni obolɔ kɛ miishɛɛ, bo ni okɔ̃mɔɔɔ; ejaakɛ mɔ ni bɛ mɔ ko lɛ moŋ bii fa fe mɔ ni yɔɔ wu lɛ po!”

²⁸ Agbɛnɛ, anyɛmimɛi, wɔ lɛ, shiwoo lɛ bii ji wɔ tamɔ Isak.

²⁹ Shi tamɔ bɔ ni no be lɛ mli lɛ mɔ ni afɔ lɛ yɛ heloo naa lɛ waa mɔ ni afɔ lɛ yɛ mumɔ naa lɛ yi lɛ, nakai nɔŋŋ kɛ̃ yɔɔ ŋmɛnɛŋmɛnɛ hu.

³⁰ Shi mɛni ŋmalɛ lɛ kɛɔ? “Shwiemɔ nyɔŋyoo lɛ kɛ ebi lɛ; ejaakɛ nyɔŋyoo bi lɛ ekɛ odehe lɛ bi lɛ yeŋ gboshinii lɛ.”

³¹ No hewɔ lɛ, anyɛmimɛi, wɔjeee nyɔŋyoo lɛ bii, shi moŋ odehe lɛ bii.