Galatabii 3 - ŊMALƐ KRƆŊKRƆŊ LƐ

Mla loo hemɔkɛyeli

¹ O Galatiabii ni bɛ yitsoŋ! Namɔ kpɛ nyɛ ayɛ, nyɛ ni atɛŋ Yesu Kristo yɛ nyɛhiɛ akɛ mɔ ni asɛŋ lɛ lɛ?

² Enɛ kɛkɛ mitaoɔ male yɛ nyɛnaa: Mumɔ lɛ ni nyɛna lɛ, Mla nitsumɔi amli nyɛna kɛjɛ, aloo hemɔkɛyeli ni nyɛkɛ bo Sanekpakpa lɛ toi mli?

³ Aso nɛkɛ nyɛbɛ yitsoŋ? Ni nyɛkɛ mumɔ bɔ̃i lɛ, agbɛnɛ heloo nyɛkɛbaagbe naa lo?

⁴ Nɔ babaoo ni nyɛna nɛɛ, yakatswaa nyɛna lo (kɛ eyɛ mli akɛ yakatswaa nyɛna lɛ)?

⁵ Belɛ mɔ ni kɛ Mumɔ lɛ hãa nyɛ ni etsuɔ hewalɛ nii yɛ nyɛmli lɛ, Mla nitsumɔi ahewɔ efeɔ, aloo hemɔkɛyeli ni nyɛkɛboɔ Sanekpakpa lɛ toi lɛ hewɔ ni?

⁶ Tamɔ bɔ ni Abraham he Nyɔŋmɔ eye, ni abu enɛ jalɛ ahã lɛ lɛ.

⁷ No hewɔ lɛ, nyɛnaa nyɛlea akɛ mɛi ni heɔ yeɔ lɛ, amɛ ji Abrahambii.

⁸ Shi akɛni ŋmalɛ lɛ ena momo akɛ hemɔkɛyeli mli Nyɔŋmɔ aaabu jeŋmaji lɛ abem yɛ hewɔ lɛ, ejaje Sanekpakpa lɛ etsɔ̃ɔ Abraham eto akɛ, “Omli aaajɔɔ jeŋmaji lɛ fɛɛ yɛ.”

⁹ Belɛ mɛi ni heɔ yeɔ lɛ, ajɔɔ amɛ kɛ Abraham heyelɔ lɛ.

¹⁰ Ejaakɛ mɛi abɔ ni kɛ amɛhe fɔ̃ɔ Mla nitsumɔi anɔ lɛ, loomɔ kã amɛnɔ; ejaakɛ aŋma akɛ, “Alomɔ mɔ fɛɛ mɔ ni eyaaa nɔ efeee nii fɛɛ ni aŋma yɛ Mla Wolo lɛ mli lɛ.”

¹¹ Shi eyɛ faŋŋ akɛ Mla mli lɛ abuŋ mɔ ko mɔ ko bem yɛ Nyɔŋmɔ hiɛ, ejaakɛ “jalɔ lɛ, hemɔkɛyeli mli eyi aaana wala yɛ;”

¹² shi Mla lɛ, jeee hemɔkɛyeli sane ni, shi moŋ “Mɔ ni yeɔ nɔ lɛ yi aaana wala yɛ mli.”

¹³ Kristo kpɔ̃ wɔ kɛjɛ Mla lɛ loomɔ lɛ mli, akɛni etsɔ̃ loomɔ ehã wɔ lɛ, ejaakɛ aŋma akɛ, “Alomɔ mɔ fɛɛ mɔ ni tsotsoro tso nɔ lɛ;”

¹⁴ koni Abraham jɔɔmɔ lɛ aba jeŋmaji lɛ anɔ yɛ Kristo Yesu mli, ni wɔkɛ hemɔkɛyeli ana Mumɔ ni awo he shi lɛ.

Mla lɛ kɛ shiwoo lɛ

¹⁵ Anyɛmimɛi, miiwie lɛ gbɔmɛiaŋ: gbɔmɔ kpãŋmɔ tete, kɛji akpɛlɛ̃ nɔ lɛ, mɔ ko kwaaa, ni asaŋ mɔ ko kɛ nɔ ko fataaa he.

¹⁶ Shi Abraham lɛ, akɛ lɛ kɛ eshwie lɛ wie shiwoo wiemɔi lɛ. Ekɛɛɛ akɛ, “kɛ oshwiei lɛ” tamɔ nɔ ni ekɛ mɛi pii miiwie, shi moŋ tamɔ mɔ kome akɛ, “kɛ oshwie lɛ”, mɔ ni ji Kristo lɛ.

¹⁷ Shi nɔ ni mitsɔ̃ɔ lɛ ji akɛ Mla ni awo yɛ afii ohai ejwɛ kɛ nyɔŋmai etɛ̃ sɛɛ lɛ eguuu kpãŋmɔ ni Nyɔŋmɔ ema nɔ aduatsɔ eto lɛ ni ehã shiwoo lɛ afee yaka.

¹⁸ Shi kɛ gboshinii lɛ jɛ Mla lɛ mli lɛ, no lɛ jeee shiwoo lɛ mli ejɛ dɔŋŋ; shi Abraham lɛ, shiwoo nɔ Nyɔŋmɔ tsɔ̃ ekɛke lɛ.

¹⁹ Agbɛnɛ mɛɛ ji Mla lɛ mɔ? Akɛhã ni akɛna nɔtɔmɔi kɛyashi beyinɔ ni shwie ni awo lɛ shi lɛ aaaba; ni ŋwɛi bɔfoi anɔ atsɔ̃ awo Mla lɛ, ni akɛwo mlidaamɔlɔ dɛŋ.

²⁰ Shi mlidaamɔlɔ sane lɛ, ejeee mɔ kome nɔ, shi Nyɔŋmɔ lɛ, mɔ kome ji lɛ.

²¹ Agbɛnɛ Mla lɛ shiɔ Nyɔŋmɔ shiwoi lɛ lo? Dabida! Ejaakɛ eji awo mla ko ni aaanyɛ wala ahã kulɛ, anɔkwale mli lɛ wɔbembuu baajɛ mla nɔyeli mli.

²² Shi moŋ; ŋmalɛ lɛ eŋa nibii fɛɛ yi ewo esha shishi, koni atsɔ̃ Yesu Kristo nɔ hemɔkɛyeli nɔ akɛ shiwoo lɛ ahã mɛi ni heɔ yeɔ lɛ.

Hemɔkɛyeli ehã wɔye wɔhe

²³ Shi dani hemɔkɛyeli lɛ ba lɛ, aŋa wɔyi tamɔ gboklɛfoi awo Mla shishi kɛyashi hemɔkɛyeli ni abaajie kpo lɛ aaaba.

²⁴ No hewɔ lɛ, Mla lɛ etsɔ̃ wɔtsɔselɔ kɛmiiya Kristo ŋɔɔ koni atsɔ̃ hemɔkɛyeli nɔ abu wɔ bem.

²⁵ Shi ni hemɔkɛyeli ba nɛɛ, wɔbɛ tsɔselɔ lɛ shishi dɔŋŋ.

²⁶ Ejaakɛ nyɛ fɛɛ lɛ Nyɔŋmɔ bii ji nyɛ yɛ Kristo Yesu mli kɛtsɔ̃ hemɔkɛyeli lɛ nɔ;

²⁷ ejaakɛ nyɛ mɛi abɔ ni abaptisi nyɛ awo Kristo mli lɛ, nyɛwo Kristo.

²⁸ Yudanyo bɛ lɛ, Helanyo hu bɛ dɔŋŋ; nyɔŋ bɛ lɛ, odehe hu bɛ dɔŋŋ; nuu bɛ lɛ, yoo hu bɛ dɔŋŋ: ejaakɛ nyɛ fɛɛ lɛ mɔ kome ji nyɛ yɛ Kristo Yesu mli.

²⁹ Shi kɛji Kristo nii ji nyɛ lɛ, belɛ Abraham shwiei ji nyɛ, kɛ gboshiniiyelɔi hu yɛ shiwoo lɛ naa.