Galatabii 2 - ŊMALƐ KRƆŊKRƆŊ LƐ

Bɔfoi krokomɛi lɛ ŋɔ Paulo akɛ bɔfo

¹ Kɛkɛ lɛ no sɛɛ afii nyɔŋma kɛ ejwɛ lɛ misaa mikɛ Barnaba tee Yerusalɛm, ni miŋɔ Tito hu mifata mihe.

² Shi mitee yɛ kpojiemɔ ko naa, ni mikɛ Sanekpakpa ni mishiɛɔ yɛ jeŋmaji lɛ ateŋ lɛ yaŋmɛ mɛi ni yɔɔ gbɛi lɛ sɔŋŋ ahiɛ bɔ ni afee ni foi ni midaa aloo ni mida lɛ akafee yaka.

³ Shi Tito tete ni kɛ mi yɔɔ ni eji Helanyo lɛ, anyɛɛɛ enɔ akɛ efo ketia.

⁴ Mɛi ni wo ketiafoo sane nɔ ji amale nyɛmimɛi komɛi ni ju shi kɛbafutu wɔ, ni amɛba nigii koni amɛbasara wɔhe ni wɔye yɛ Kristo Yesu mli lɛ, koni amɛye wɔ nyɔŋ;

⁵ shi wɔkpɛ̃lɛɛɛ ni wɔbo amɛ toi ŋmɛlɛtswaa kome po tete, koni Sanekpakpa lɛ anɔkwale lɛ ahi shi daa ahã nyɛ.

⁶ Shi mɛi ni abuɔ amɛ akɛ amɛyɔɔ gbɛi lɛ, bɔ fɛɛ bɔ ni amɛyɔɔ sa lɛ, jeee mihe sane ko ni, Nyɔŋmɔ kwɛɛɛ gbɔmɔ hiɛ ehalaaa lɛ, mɛi ni abuɔ amɛ lɛ, amɛtsɔ̃ɔɔ mi nɔ ko amɛfataaa he;

⁷ shi moŋ be ni amɛna akɛ atu foolɔi ateŋ Sanekpakpa lɛ jajemɔ lɛ awo midɛŋ, tamɔ bɔ ni atu ketiafolɔi anɔ lɛ awo Petro dɛŋ,

⁸ ejaakɛ mɔ ni tsu nii yɛ Petro mli ni ehã eye bɔfo yɛ ketiafolɔi lɛ ateŋ lɛ, lɛ nɔŋŋ etsu nii yɛ mi hu mimli yɛ jeŋmaji lɛ ateŋ lɛ,

⁹ be ni amɛyoo dromɔ ni akɛhã mi lɛ, Yakobo kɛ Kefa kɛ Yohane ni abuɔ amɛ akɛ akulashiŋi lɛ, amɛkɛ naanyobɔɔ ninejurɔ lɛ ta mi kɛ Barnaba dɛ̃, koni wɔ lɛ wɔya jeŋmaji lɛ aŋɔɔ, shi amɛ lɛ amɛya ketiafolɔi lɛ aŋɔɔ;

¹⁰ shi ohiafoi kɛkɛ amɛkɛɛ wɔkai, ni no nɔŋŋ he mɔdɛŋ mibɔ akɛ mafee.

¹¹ Shi be ni Kefa ba Antiokia lɛ midamɔ ehiɛ miku enaa, ejaakɛ eye sane ni ejaaa.

¹² Ejaakɛ dani mɛi komɛi aaajɛ Yakobo ŋɔɔ aba lɛ, ekɛ jeŋmajiaŋbii lɛ yeɔ nii; shi be ni amɛba lɛ, egbala ehe shi ni etse ehe, ejaakɛ eeshe mɛi ni jɛ ketiafolɔi lɛ ateŋ lɛ gbeyei.

¹³ Ni Yudafoi ni eshwɛ lɛ hu kɛ lɛ fee nakai osato lɛ, ni amɛsatofeemɔ lɛ gbala Barnaba kɛtee amɛgbɛfaŋ.

¹⁴ Shi be ni mina akɛ amɛnyiɛɛɛ trɔmɔɔ yɛ Sanekpakpa lɛ anɔkwale lɛ naa lɛ, mikɛɛ Kefa yɛ amɛ fɛɛ amɛhiɛ akɛ, “Kɛ bo ni oji Yudanyo lɛ ohiɔ shi tamɔ jeŋmajiaŋnyo ni jeee tamɔ Yudafonyo lɛ, mɛɛba onyɛɔ jeŋmajiaŋbii lɛ anɔ akɛ amɛhi shi tamɔ Yudafoi?”

Yudafoi kɛ jeŋmajiaŋbii fɛɛ lɛ hemɔkɛyeli nɔ atsɔ̃ɔ ahereɔ amɛyiwala

¹⁵ Afɔ wɔ Yudafoi akɛ ni wɔjeee eshafeelɔi ni jɛ jeŋmaji lɛ amli,

¹⁶ shi akɛni wɔle akɛ abuuu gbɔmɔ bem kɛjɛɛɛ Mla nitsumɔi amli, akɛ ja atsɔ̃ Yesu Kristo nɔ hemɔkɛyeli lɛ nɔ kɛkɛ lɛ, wɔ hu wɔhe Kristo Yesu nɔ wɔye, koni abu wɔ bem yɛ Kristo nɔ hemɔkɛyeli mli, ni jeee Mla nitsumɔi amli, ejaakɛ abuŋ gbɔmɔ ko gbɔmɔ ko bem kɛjɛŋ Mla nitsumɔi amli.

¹⁷ Shi agbɛnɛ kɛji wɔ ni wɔtaoɔ akɛ abu wɔ bem yɛ Kristo mli lɛ ana wɔ akɛ wɔ diɛŋtsɛ hu eshafeelɔi ji wɔ lɛ, belɛ Kristo ji esha sɔ̃ɔlɔ lo? Dabida!

¹⁸ Ejaakɛ kɛ nii ni mikumɔ lɛ nɔŋŋ mimaa ekoŋŋ lɛ, belɛ mikɛ mi diɛŋtsɛ mihe tsɔ̃ɔ akɛ nɔtɔ̃lɔ.

¹⁹ Ejaakɛ mi lɛ mitsɔ̃ Mla lɛ nɔ migbo yɛ Mla lɛ gbɛfaŋ, koni mihiɛ akã ahã Nyɔŋmɔ.

²⁰ Asɛŋ mi kɛ Kristo; hewɔ lɛ jeee mi mihiɛ kã dɔŋŋ, shi Kristo ni hiɛ kã yɛ mimli; shi mihiɛ ni kã yɛ heloo mli agbɛnɛ nɛɛ, Nyɔŋmɔ Bi lɛ ni sumɔ mi ni ekɛ ehe hã yɛ mihewɔ lɛ nɔ hemɔkɛyeli mli mihiɛ kã yɛ.

²¹ Mikwaaa Nyɔŋmɔ dromɔ lɛ; ejaakɛ kɛ Mla nɔ jalɛ tsɔ̃ kɛba lɛ, belɛ Kristo lɛ yakatswaa egbo lɛ.