Galatabii 1 - ŊMALƐ KRƆŊKRƆŊ LƐ

Ŋamɔ

¹ Mi Paulo ni mi ji bɔfo ni mibɔfonitsumɔ lɛ jɛɛɛ gbɔmɛi adɛŋ, ni jeee gbɔmɔ ko nɔ hu etsɔ̃, shi moŋ Yesu Kristo kɛ Tsɛ Nyɔŋmɔ ni tee lɛ shi kɛjɛ gbohii ateŋ lɛ nɔ etsɔ̃ lɛ,

² kɛ nyɛmimɛi ni mi yɔɔ lɛ fɛɛ ŋma wolo nɛɛ yahã Galatia asafoi lɛ.

³ Dromɔ kɛ hejɔlɛ ni jɛ wɔTsɛ Nyɔŋmɔ lɛ kɛ Nuŋtsɔ Yesu Kristo dɛŋ ahã nyɛ;

⁴ Yesu Kristo ni kɛ lɛ diɛŋtsɛ ehe hã yɛ wɔhe eshai lɛ ahewɔ, koni ejie wɔ kɛjɛ jeŋ fɔ̃ŋ ni yɔɔ ŋmɛnɛŋmɛnɛ nɛɛ mli, yɛ Nyɔŋmɔ ni ji wɔTsɛ lɛ suɔmɔ naa lɛ.

⁵ Enɔ ji anunyam lɛ kɛjɛ naanɔ kɛyashiɔ naanɔ lɛ. Amen!

Sanekpakpa kroko bɛ

⁶ Efee mihiɛ yaa akɛ amrɔ nɛɛ nɔŋŋ lɛ nyɛmiitsi nyɛhe kɛjɛ mɔ ni tsɛ nyɛ yɛ Kristo dromɔ mli lɛ he kɛya Sanekpakpa kroko he;

⁷ shi jeee Sanekpakpa kroko ni, fe akɛ mɛi komɛi ni yɔɔ ni hãa nyɛjwɛŋmɔ futuɔ, ni amɛtaoɔ akɛ amɛtsɔ̃ Kristo Sanekpakpa lɛ hiɛ amɛbu shi.

⁸ Shi kɛji wɔ po aloo bɔfo ni jɛ ŋwɛi tete bajaje Sanekpakpa kroko etsɔ̃ɔ nyɛ, yɛ nɔ ni wɔjaje wɔtsɔ̃ɔ nyɛ nɛɛ sɛɛ lɛ, ebɔ musu!

⁹ Tamɔ bɔ ni wɔkɛɛ momo lɛ, nakai nɔŋŋ mikɛɔ ekoŋŋ akɛ, “Kɛ mɔ ko bajaje Sanekpakpa kroko etsɔ̃ɔ nyɛ yɛ nɔ ni nyɛmɔ mli nɛɛ sɛɛ lɛ, ebɔ musu!”

¹⁰ Ejaakɛ be nɛ lɛ, gbɔmɛi ahiɛ gbɛ mitaoɔ loo Nyɔŋmɔ hiɛ gbɛ? Aloo miitao gbɔmɛi ahiɛ masa? Ejaakɛ kɛ mikã he miitao masa gbɔmɛi ahiɛ lɛ, jeee Kristo tsulɔ ji mi.

Bɔ ni fee ni Paulo tsɔ̃ bɔfo

¹¹ Shi miihã nyɛle, anyɛmimɛi, akɛ Sanekpakpa ni mijaje lɛ, ejɛɛɛ gbɔmɔ dɛŋ;

¹² ejaakɛ jeee gbɔmɔ ko dɛŋ mina kɛjɛ, ni jeee tsɔ̃ɔmɔ hu atsɔ̃ɔ mi, shi moŋ Yesu Kristo kpojiemɔ naa mina yɛ.

¹³ Ejaakɛ nyɛnu misa jeŋba lɛ he yɛ Yudafoi ajamɔ lɛ mli. Bɔ ni miwa Nyɔŋmɔ asafo lɛ yi fe nine ni mibɔ mɔdɛŋ akɛ makpãtã ehiɛ;

¹⁴ ni mitee hiɛ yɛ Yudafoi ajamɔ lɛ mli fe mitipɛŋfoi pii yɛ mijakubii ateŋ, ni mihiɛ dɔ naakpa yɛ wɔtsɛmɛi ablema tsɔ̃ɔmɔi ni akɛhã wɔ lɛ he.

¹⁵ Shi be ni esa Nyɔŋmɔ ni jie mi eto kɛjɛ minyɛ musuŋ beebe ni ekɛ edromɔ lɛ tsɛ mi kɛba lɛ hiɛ,

¹⁶ akɛ eeejie lɛ diɛŋtsɛ eBi lɛ kpo etsɔ̃ɔ mi, koni mijaje ehe Sanekpakpa lɛ mitsɔ̃ɔ yɛ jeŋmaji lɛ ateŋ lɛ, amrɔ lɛ mibiii gbɔmɔ ko ŋaawoo yɛ he,

¹⁷ ni misaa miyaaa Yerusalɛm hu yɛ mɛi ni ji bɔfoi dani mi hu mitsɔ̃ bɔfo lɛ aŋɔɔ, shi moŋ miyiŋ kɛtee Arabia ni misaa miku misɛɛ kɛba Damasko ekoŋŋ.

¹⁸ Kɛkɛ lɛ no sɛɛ afii etɛ̃ lɛ, mitee Yerusalɛm ni mayale Kefa, ni mihi eŋɔɔ gbii nyɔŋma kɛ enumɔ;

¹⁹ shi minaaa bɔfoi lɛ ateŋ mɔ kroko akɛ ja Yakobo, Nuŋtsɔ lɛ nyɛmi lɛ.

²⁰ Shi nii ni miŋmaa nyɛ nɛɛ, naa, Nyɔŋmɔ hiɛ mikɛɔ yɛ akɛ mimaleee.

²¹ No sɛɛ lɛ, miba Siria kɛ Kilikia niiaŋ.

²² Shi aleee mihiɛ yɛ Yudea asafoi ni yɔɔ Kristo mli lɛ amli;

²³ shi amɛnuɔ kɛkɛ akɛ akɛɔ akɛ, “Mɔ ni be ko mli ni ewa wɔ yi lɛ, agbɛnɛ eejaje hemɔkɛyeli ni tsutsu lɛ ebɔ mɔdɛŋ akɛ ekpãtã hiɛ lɛ he Sanekpakpa lɛ eetsɔ̃ɔ.”

²⁴ Ni amɛwo Nyɔŋmɔ hiɛ nyam yɛ mihewɔ.