Filipibii 4 - ŊMALƐ KRƆŊKRƆŊ LƐ

Ŋaawoi

¹ No hewɔ lɛ, minyɛmimɛi ni misumɔɔ ni mishweɔ, mimishɛɛ kɛ mikekre, nyɛdamɔa shi shiŋŋ nakai yɛ Nuŋtsɔ lɛ mli, nyɛ mɛi ni misumɔɔ!

² Miikpa Euodia fai, ni miikpa Sintike fai, akɛ amɛjwɛŋmɔ afee ekome yɛ Nuŋtsɔ lɛ mli.

³ Hɛɛ, bo hu miibao, minaanyo sɔ̃ɔlɔ yɛ anɔkwaleŋ, ni oye obua yei nɛɛ; ejaakɛ amɛfata mihe kɛpele Sanekpakpa lɛ he, kɛ Klɛmente hu kɛ minanemɛi nitsulɔi krokomɛi ni amɛgbɛi yɔɔ wala wolo lɛ mli lɛ.

⁴ Nyɛmii ashɛa yɛ Nuŋtsɔ lɛ mli daa! Miikɛɛ ekoŋŋ! Nyɛmii ashɛa!

⁵ Nyɛmlijɔlɛ lɛ nyɛhãa gbɔmɛi fɛɛ alea! Nuŋtsɔ lɛ ebɛŋkɛ.

⁶ Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsĩa nyɛtaomɔnii lɛ atã yɛ Nyɔŋmɔ hiɛ.

⁷ Ni Nyɔŋmɔ hejɔlɛ ni fe jwɛŋmɔi fɛɛ lɛ aaabu nyɛtsuii kɛ nyɛjwɛŋmɔi lɛ ahe yɛ Kristo Yesu mli!

⁸ Naagbee lɛ, anyɛmimɛi, nii abɔ ni ji anɔkwa, nii ni sa woo, nii ni ja, nii ni he tse, nii ni yɔɔ fɛo, nii ni yɔɔ gbɛi kpakpa lɛ fɛɛ, kɛji jeŋba kpakpa ko yɛ, kɛji yijiemɔ ko hu yɛ lɛ, enɛɛmɛi ahe nyɛjwɛŋa!

⁹ Nii hu ni nyɛkase ni nyɛmɔ mli ni nyɛnu ni nyɛna yɛ mihe lɛ, nomɛi nɔŋŋ nyɛfea, ni hejɔlɛ Nyɔŋmɔ lɛ kɛ nyɛ aaahi shi.

Shidaa yɛ Filipibii anikeenii lɛ ahe

¹⁰ Shi mina miishɛɛ babaoo yɛ Nuŋtsɔ lɛ mli akɛ agbɛnɛ nyɛhã mi nɔ ni nyɛjwɛŋɔ lɛ efrɔke ekoŋŋ; nyɛjwɛŋɔ he, shi hegbɛ ni nyɛyanaaa.

¹¹ Jeee akɛ fimɔ ni efi mi hewɔ miwieɔ nɛɛ, ejaakɛ mi lɛ mikase akɛ shihilɛ fɛɛ shihilɛ ni miyɔɔ mli lɛ mimii ashɛ he.

¹² Mile ohia mli shihilɛ, ni mile kpɔtɔɔyeli hu; mihe ehomɔ yɛ nɔ fɛɛ nɔ kɛ nii fɛɛ mli: tɔɔ kɛ hɔ̃mɔ, ninamɔ kɛ ohiayeli.

¹³ Minyɛɔ nii fɛɛ mifeɔ yɛ mɔ ni wajeɔ mi lɛ mli.

¹⁴ Kɛ̃lɛ nyɛfee jogbaŋŋ, akɛ nyɛbaye nyɛbua mi yɛ mimanehulu lɛ mli lɛ.

¹⁵ Shi nyɛ Filipibii diɛŋtsɛ hu nyɛle akɛ, Sanekpakpa lɛ shishijee lɛ mli, be ni miyiŋ kɛjɛ Makedonia lɛ, asafo ko bɛ ni kɛ mi bɔɔ naanyo yɛ hãmɔ kɛ hemɔ gbɛfaŋ, akɛ ja nyɛ kɛkɛ;

¹⁶ ejaakɛ be ni miyɔɔ Tesalonika lɛ hu nyɛtsu shi kome kɛ shii enyɔ fɛɛ abahã mi nii ni hiaa mi lɛ.

¹⁷ Jeee akɛ nikeenii mitaoɔ; shi moŋ miitao yibii ni baahã nyɛkɔntaa lɛ afa.

¹⁸ Shi mina nii fɛɛ ni eteke nɔ; ni akɛni minine eshɛ nii ni nyɛkɛmaje Epafrodito kɛbahã mi lɛ nɔ nɛɛ, mina nɔ fɛɛ nɔ ni mitaoɔ; eji ŋmajee kpakpa kɛ afɔle kɛ ŋɔɔmɔ ni sa Nyɔŋmɔ hiɛ.

¹⁹ MiNyɔŋmɔ lɛ aaahã nyɛ nii ni hiaa nyɛ lɛ fɛɛ yɛ enifalɛ lɛ naa yɛ anunyam mli, yɛ Kristo Yesu mli.

²⁰ Shi anunyam ahã wɔTsɛ Nyɔŋmɔ lɛ kɛyashi naanɔi anaanɔ lɛ. Amen!

Naagbee ŋamɔi

²¹ Nyɛŋaa hetselɔ fɛɛ hetselɔ yɛ Kristo Yesu mli nyɛhãa mi. Nyɛmimɛi ni kɛ mi yɔɔ lɛ miibi nyɛ.

²² Hetselɔi lɛ fɛɛ, shi titri lɛ mɛi ni jɛ Kaisare we lɛ, miibi nyɛ.

²³ WɔNuŋtsɔ Yesu Kristo dromɔ lɛ kɛ nyɛmumɔ lɛ ahi shi!