Filipibii 3 - ŊMALƐ KRƆŊKRƆŊ LƐ

Anɔkwa jalɛ

¹ Naagbee lɛ, minyɛmimɛi, nyɛmii ashɛa yɛ Nuŋtsɔ lɛ mli! Akɛ maŋma nyɛ nɛkɛ nii nɛɛ nɔŋŋ lɛ, efeee mi ahuntoo, ni ehãa nyɛfeɔ shweshweeshwe.

² Nyɛkwɛa jogbaŋŋ yɛ gbei lɛ ahe, nyɛkwɛa jogbaŋŋ yɛ nitsulɔi fɔ̃ji lɛ ahe, nyɛkwɛa jogbaŋŋ yɛ gbɔmɔtso henii folɔmɔ lɛ he!

³ Ejaakɛ wɔ moŋ wɔji ketiafolɔi lɛ, wɔ mɛi ni wɔjaa Nyɔŋmɔ yɛ mumɔ naa, ni wɔshwãa wɔfɔ̃ɔ Kristo Yesu nɔ, ni wɔkɛ wɔhiɛ efɔ̃ɔɔ gbɔmɔtso nifeemɔ nɔ lɛ,

⁴ tsɛbelɛ miyɛ nɔ ko yɛ heloo gbɛfaŋ tete ni mikɛ mihiɛ aaafɔ̃ nɔ. Kɛ efeɔ mɔ ko akɛ eyɛ nɔ ko ni ekɛ ehiɛ fɔ̃ɔ nɔ yɛ heloo gbɛfaŋ lɛ, miyɛ nɔ ni fe no.

⁵ Gbi ni ji kpaanyɔ lɛ nɔ afo mi ketia, Israel fɔmɔbi kɛ Benyamin akutso lɛ mli nyo ji mi, Hebrinyo krɛdɛɛ mli Hebrinyo, ni yɛ Mla lɛ naa lɛ, Farisifonyo,

⁶ ni jamɔ he hiɛdɔɔ gbɛfaŋ lɛ asafo lɛ yiwalɔ ji mi, ni yɛ jalɛ ni Mla lɛ taoɔ gbɛfaŋ lɛ mihe bɛ shwamɔ ko.

⁷ Shi kɛ̃lɛ nii ni ji sɛɛnamɔ hã mi sa lɛ, yɛ Kristo hewɔ lɛ mibu amɛ akɛ shigbeemɔ.

⁸ Anɔkwale mli lɛ mibuɔ fɛɛ akɛ shigbeemɔ yɛ Kristo Yesu, miNuŋtsɔ lɛ, he nilee ni fe nii fɛɛ lɛ hewɔ; lɛ ehewɔ ni nii fɛɛ ebɔ mi, ni mibuɔ amɛ akɛ tumo nɔ nii, koni mana Kristo,

⁹ ni ana mi yɛ emli, akɛ mibɛ mi diɛŋtsɛ mijalɛ ni jɛ Mla mli, shi moŋ jalɛ ni tsɔ̃ Kristo nɔ hemɔkɛyeli nɔ ni jɛ Nyɔŋmɔ dɛŋ yɛ hemɔkɛyeli naa miyɔɔ,

¹⁰ ni male lɛ Kristo eshitee lɛ hewalɛ lɛ; ni mana emanehului lɛ eko, ni matamɔ lɛ yɛ egbele lɛ gbɛfaŋ;

¹¹ akɛ aleenɔ mana mashɛ gbohiiashitee lɛ he lo.

Foijee kɛ oti lɛ heshɛɛ

¹² Jeee akɛ minine eshɛ nɔ momo aloo mihi kɛwula shi momo, shi miipele mihiɛ gbɛ ni minine ashɛ nɔ, gbii abɔ ni Kristo Yesu nine eshɛ mi hu minɔ lɛ.

¹³ Anyɛmimɛi, mibuuu mihe akɛ minine eshɛ nɔ, shi nɔ kome kɛkɛ mifeɔ: Nii ni yɔɔ sɛɛgbɛ lɛ mijieɔ mihiɛ yɛ nɔ, shi nii ni yɔɔ hiɛgbɛ lɛ moŋ mikpãa mimli ni mashɛ he,

¹⁴ ni miitiu oti lɛ kɛyashɛ Nyɔŋmɔ tsɛmɔ ni jɛ ŋwɛi yɛ Kristo Yesu mli lɛ he juromɔ nɔ lɛ he.

¹⁵ No hewɔ lɛ, nyɛhãa wɔ mɛi abɔ ni wɔdara yɛ mumɔ gbɛfaŋ lɛ wɔjwɛŋa nakai. Ni kɛ nɔ ko yɛ ni nyɛjwɛŋɔ lɛ ekroko lɛ, Nyɔŋmɔ aaajie no hu kpo faŋŋ atsɔ̃ɔ nyɛ.

¹⁶ Shi nɔ ni wɔkɛba wɔjeŋ kɛbashi he ni wɔshɛ nɛɛ, wɔya nɔ wɔkɛ no nɔŋŋ aba wɔjeŋ.

¹⁷ Anyɛmimɛi, nyɛ fɛɛ nyɛkasea mi. Nyɛkwɛa mɛi ni nyiɛɔ tamɔ bɔ ni wɔtoɔ nyɛ okadi lɛ.

¹⁸ Mikɛɛ nyɛ shii abɔ, ni miikɛɛ nyɛ ekoŋŋ kɛ yaafonui, akɛ mɛi pii yɛ ni baa amɛjeŋ akɛ Kristo sɛŋmɔtso lɛ henyɛlɔi.

¹⁹ Amɛnaagbee ji hiɛkpãtãmɔ, ni amɛmusu taomɔnii ji amɛnyɔŋmɔ, ni amɛhiɛgbele mli amɛnunyam yɔɔ, shikpɔŋ nɔ nii ahe amɛjwɛŋɔ.

²⁰ Shi wɔ lɛ, wɔmaŋ lɛ ŋwɛi eyɔɔ, he ni wɔkwɛɔ yiwalaherelɔ ni ji Nuŋtsɔ Yesu Kristo lɛ gbɛ kɛjɛɔ lɛ.

²¹ Lɛ ebaatsake wɔgbɔmɔtso ni hiɛ bɛ nyam lɛ koni etamɔ enunyam gbɔmɔtso lɛ su, yɛ ehewalɛ nitsumɔ ni ekɛnyɛɔ eŋɔɔ nibii fɛɛ ewoɔ eshishi hu lɛ naa lɛ.