Filipibii 2 - ŊMALƐ KRƆŊKRƆŊ LƐ

Kristo heshibaa kɛ egbojee

¹ No hewɔ lɛ, kɛ Kristo mli hewalɛwoo ko yɛ, kɛ suɔmɔ miishɛjemɔ ko yɛ, kɛ mumɔŋ naanyobɔɔ ko yɛ, kɛ musuŋtsɔlɛ kɛ mɔbɔnalɛ ko yɛ lɛ,

² nyɛhãa mimiishɛɛ lɛ ayia obɔ̃, akɛ nyɛmiijwɛŋ nɔ kome, nyɛhiɛ suɔmɔ kome, susuma kome, mumɔ kome.

³ Ni nyɛkafea nɔ ko kɛ mligbalamɔ mumɔ loo yaka anunyam taomɔ, shi moŋ nyɛkɛ heshibaa jwɛŋmɔ abua nyɛnanemɛi akɛ amɛfe nyɛ.

⁴ Nyɛteŋ mɔ fɛɛ mɔ akafo enɔ mli, shi moŋ efo enaanyo nɔ mli.

⁵ Nɔ ni Kristo Yesu hu jwɛŋ lɛ, no nɔŋŋ nyɛjwɛŋa.

⁶ Lɛ mɔ ni ehiɛ Nyɔŋmɔ su moŋ, shi ebuuu hegbɔ ni ekɛ Nyɔŋmɔ ye lɛ akɛ nɔ ko ni sa akɛ ehiɛ mli kpɛŋŋ,

⁷ Moŋ ejie efɔ̃ shi. Eŋɔ tsulɔ su efɔ̃ enɔ, Etsɔ̃ gbɔmɔ, ni enifeemɔ gbɛfaŋ hu ana lɛ akɛ gbɔmɔ.

⁸ Eba ehe shi ni ebo toi kɛtee gbele mli, kɛtee sɛŋmɔtso nɔ gbele mli tete.

⁹ Enɛ hewɔ hu ni Nyɔŋmɔ wo enɔ gojoo, ni eduro lɛ gbɛi ni ta gbɛi fɛɛ gbɛi nɔ,

¹⁰ koni mɛi ni yɔɔ ŋwɛi kɛ mɛi ni yɔɔ shikpɔŋ lɛ nɔ kɛ mɛi ni yɔɔ shikpɔŋ lɛ shishi lɛ ateŋ mɔ fɛɛ mɔ nakutso akula shi yɛ Yesu gbɛi lɛ mli;

¹¹ ni lilɛi fɛɛ lilɛi agba mli kpoo akɛ Yesu Kristo ji Nuŋtsɔ, kɛwo Tsɛ Nyɔŋmɔ lɛ hiɛ nyam.

Nyɛtamɔ kanei yɛ je lɛ mli

¹² No hewɔ lɛ, nyɛ mɛi ni misumɔɔ, tamɔ bɔ ni nyɛboɔ toi daa nɛɛ, jeee be ni mikɛ nyɛ yɔɔ lɛ kɛkɛ, shi moŋ titri lɛ, agbɛnɛ ni mibɛ nyɛŋɔɔ nɛɛ hu lɛ, nyɛkɛ gbeyeishemɔ kɛ hekpokpomɔ atsua nyɛ diɛŋtsɛ nyɛyiwalaheremɔ lɛ he nii;

¹³ ejaakɛ suɔmɔ ni aaasumɔ jio, feemɔ ni aaafee jio, Nyɔŋmɔ ji mɔ ni tsuɔ fɛɛ yɛ nyɛ mli bɔ ni lɛ etaoɔ.

¹⁴ Nyɛfea nyɛnii fɛɛ ni huhuuhu wiemɔi kɛ naataamɔ akahi mli;

¹⁵ koni nyɛhe akahi shwamɔ, ni nyɛfee mɛi krɔŋŋ, Nyɔŋmɔ bii ni he bɛ kpa ko yɛ yinɔ kɔɔdɔŋ ni bɛ eŋɛlɛnɔ nɛɛ mli, mɛi ateŋ ni nyɛtsoɔ tamɔ kanei yɛ je nɛɛŋ lɛ.

¹⁶ Ni nyɛhiɛ wala wiemɔ lɛ mli, koni etsɔ̃ shwãanɔ ehã mi yɛ Kristo Gbi lɛ nɔ, akɛ mifoijee lɛ efeee yaka ni mideŋmegbomɔ lɛ hu efeee efolo.

¹⁷ Shi kɛji afɔse milá ashwie nyɛhemɔkɛyeli ni akɛhãa Nyɔŋmɔ akɛ afɔle lɛ nɔ tete lɛ, miyɛ he tsuijurɔ, ni mikɛ nyɛ fɛɛ aaana tsuijurɔ;

¹⁸ nakai nɔŋŋ kɛ̃ nyɛ hu nyɛnaa tsuijurɔ, ni nyɛkɛ mi anaa tsuijurɔ.

Timoteo kɛ Epafrodito

¹⁹ Shi mihiɛ kã nɔ yɛ Nuŋtsɔ Yesu mli akɛ etsɛŋ ni matsu Timoteo nyɛŋɔɔ, koni kɛji minu bɔ ni nyɛyɔɔ lɛ, ni mi hu mitsui anyɔ mimli.

²⁰ Ejaakɛ mibɛ mɔ ko ni kɛ mi hiɛ jwɛŋmɔ kome ni nyɛhe sane dɔɔ lɛ krɔŋŋ tamɔ lɛ.

²¹ Ejaakɛ mɛi lɛ fɛɛ lɛ, amɛ diɛŋtsɛ amɛnii amɛpleɔ, shi jeee Kristo Yesu nii.

²² Shi nyɛle etɛ naa, akɛ ekɛ mi sɔ̃mɔɔ yɛ Sanekpakpa lɛ he tamɔ bi kɛ etsɛ.

²³ No hewɔ lɛ, mihiɛ kã enɔ, akɛ amrɔ ni mana misane lɛ naa lɛ, matsu lɛ nyɛŋɔɔ.

²⁴ Shi miyɛ hiɛnɔkãmɔ yɛ Nuŋtsɔ lɛ mli akɛ mi diɛŋtsɛ hu, etsɛŋ ni maba.

²⁵ Kɛ̃lɛ mijwɛŋ akɛ ehĩa akɛ matsu wɔnyɛmi Epafrodito, ni ji minaanyo nitsulɔ kɛ minaanyo tabilɔ kɛ nyɛbɔfo kɛ mihiamɔnii ahe sɔ̃ɔlɔ hu lɛ, nyɛŋɔɔ;

²⁶ ejaakɛ eeshwe nyɛ fɛɛ, ni akɛni nyɛnu akɛ ehe miiye hewɔ lɛ eehao.

²⁷ Ehe ye lɛɛlɛŋ, ni ebɛŋkɛ gbele tã, shi Nyɔŋmɔ na lɛ mɔbɔ, ni jeee lɛ kɛkɛ, shi moŋ mi hu, koni mikaye ŋkɔmɔ mito ŋkɔmɔ nɔ.

²⁸ No hewɔ titri mikɛ oyaiyeli tsu lɛ lɛ, koni kɛ nyɛna lɛ ekoŋŋ lɛ, ni nyɛna miishɛɛ ni mi hu mikaye ŋkɔmɔ tuutu.

²⁹ No hewɔ lɛ, nyɛkɛ miishɛɛ fɛɛ aherea lɛ atuu yɛ Nuŋtsɔ lɛ mli, ni nyɛbua gbɔmɛi ni tamɔ nɛkɛ akɛ mɛi ni sa woo;

³⁰ ejaakɛ Kristo nitsumɔ lɛ hewɔ lɛ ebɛŋkɛ gbele kwraa, ni ekɛ ehe wo osharã mli, koni ebaye nyɛnajiaŋ kɛsɔ̃mɔ mi yɛ sɔ̃ɔmɔ ni ehiii nyɛ sɔ̃ɔmɔ lɛ hewɔ.