Filipibii 1 - ŊMALƐ KRƆŊKRƆŊ LƐ

Ŋamɔ

¹ Paulo kɛ Timoteo, Yesu Kristo tsuji lɛ; ŋma yahã mɛi krɔŋkrɔŋi ni yɔɔ Yesu Kristo mli yɛ Filipi lɛ kɛ amɛnɔkwɛlɔi kɛ sɔ̃ɔlɔi lɛ fɛɛ.

² Dromɔ kɛ hejɔlɛ ni jɛ wɔTsɛ Nyɔŋmɔ lɛ kɛ Nuŋtsɔ Yesu Kristo dɛŋ lɛ ahã nyɛ!

Paulo sɔle hã Filipibii lɛ

³ Midaa miNyɔŋmɔ lɛ shi be fɛɛ be ni mikaiɔ nyɛ

⁴ yɛ midaa faikpamɔi fɛɛ ni mikpaa mihãa nyɛ fɛɛ lɛ mli, ni mikɛ miishɛɛ kpaa fai,

⁵ yɛ wa ni nyɛwa yɛ Sanekpakpa lɛ gbɛfaŋ kɛjɛ klɛŋklɛŋ gbi lɛ nɔ kɛbashi be nɛ lɛ hewɔ;

⁶ ni miŋɔ mihiɛ mifɔ̃ enɛ nɔŋŋ nɔ, akɛ mɔ ni bɔ̃i nitsumɔ kpakpa yɛ nyɛmli lɛ, lɛ nɔŋŋ eeekã he kɛyashi eeegbe naa yɛ Yesu Kristo Gbi lɛ nɔ.

⁷ Eja akɛ mijwɛŋɔ enɛ yɛ nyɛ fɛɛ nyɛhe, ejaakɛ nyɛkã mitsui nɔ, nyɛ ni yɛ migboklɛi kɛ Sanekpakpa lɛ hefãmɔ kɛ enɔmimaa fɛɛ mli lɛ nyɛ kɛ mi fɛɛ lɛ dromɔ lɛ niyelɔi ji wɔ lɛ.

⁸ Bɔ ni mikɛ Yesu Kristo mlitsɔlɛ lɛ shweɔ nyɛ fɛɛ lɛ, Nyɔŋmɔ ji midasefonyo.

⁹ Ni enɛ he fai mikpaa, akɛ nyɛsuɔmɔ lɛ afa kɛya nɔ, ni eteke nɔ yɛ nilee kɛ sɛɛyoomɔ fɛɛ gbɛfaŋ

¹⁰ ni nyɛyoo nii ni hi fe fɛɛ lɛ, koni nyɛfee krɔŋŋ ni shwamɔ ko akahi nyɛhe kɛyashi Kristo Gbi lɛ nɔ;

¹¹ ni nyɛyimɔ obɔ̃bɔ̃ kɛ jalɛ yibii ni awoɔ kɛtsɔ̃ɔ Yesu Kristo nɔ lɛ, hã Nyɔŋmɔ anunyam kɛ yijiemɔ.

Kristo ji wala, ni gbele lɛ sɛɛnamɔ ni

¹² Shi, anyɛmimɛi, miisumɔ akɛ nyɛle akɛ saji ni ba minɔ lɛ ehã Sanekpakpa lɛ eshwere moŋ.

¹³ Ni Asaŋ ehã migboklɛi lɛ eje shi faŋŋ yɛ Kaisare asraafoi amɔ̃ɔ lɛ mli fɛɛ kɛ mɛi ni eshwɛ lɛ fɛɛ ateŋ, akɛ Kristo hewɔ awo mi tsuŋ lɛ.

¹⁴ Ni nyɛmimɛi ni yɔɔ Nuŋtsɔ lɛ mli lɛ ateŋ mɛi babaoo etsɔ̃ migboklɛi lɛ anɔ ena hewalɛ ni amɛkɛ ekãa babaoo fe tsutsu lɛ miijaje Nyɔŋmɔ wiemɔ lɛ ni amɛsheee gbeyei.

¹⁵ Mɛi komɛi lɛ, hetsɛ̃ kɛ bei hewɔ amɛshiɛɔ Kristo lɛ; shi mɛi komɛi hu kɛ jwɛŋmɔ kpakpa shiɛɔ.

¹⁶ Mɛnɛɛmɛi jɛɔ suɔmɔ mli shiɛɔ, ejaakɛ amɛle akɛ Sanekpakpa lɛ hefãmɔ lɛ hewɔ ni mikã biɛ nɛɛ.

¹⁷ Shi mɛi krokomɛi lɛ, amɛkɛ mligbalamɔ mumɔ shiɛɔ Kristo, ni jeee krɔŋŋ ni, shi moŋ amɛjwɛŋmɔ ji akɛ amɛtee amanehulu shi amɛwo mi yɛ migboklɛi lɛ amli.

¹⁸ No hewɔ lɛ, mɛni? Bɔ fɛɛ bɔ ni fee lɛ, kwa akwaa jio, anɔkwale naa jio, Kristo kɛ̃ ashiɛɔ lɛ, ni enɛ hewɔ lɛ miyɛ miishɛɛ. Ni asaŋ mana miishɛɛ,

¹⁹ ejaakɛ mile akɛ enɛ baatsɔ̃ miyiwalaheremɔ yɛ nyɛfaikpamɔ kɛ Yesu Kristo Mumɔ lɛ yelikɛbuamɔ naa.

²⁰ Migbɛkwɛmɔ kɛ hiɛnɔkãmɔ kɛkɛ ji akɛ mihiɛ akagbo yɛ nɔ ko nɔ ko mli, shi moŋ, bɔ ni afeɔ daa lɛ, nakai agbɛnɛ hu akɛ ekãa fɛɛ aaawo Kristo hiɛ nyam yɛ migbɔmɔtso mli, yɛ wala mli jio, gbele mli jio.

²¹ Ejaakɛ yɛ migbɛfaŋ lɛ, Kristo ji wala, ni gbele lɛ sɛɛnamɔ ni.

²² Shi kɛji wala yɛ heloo nɛɛ mli hãa mitsuɔ nii ni woɔ yibii lɛ, mileee emli nɔ ni makɔ;

²³ shi miihao yɛ nibii enyɔ nɛɛ ateŋ; miishwe ni maje mli ni mikɛ Kristo ayahi shi, ejaakɛ no hi aahu;

²⁴ shi nyɛhewɔ lɛ heloo mli shihilɛ lɛ he ehĩa fe no.

²⁵ Ni akɛni miŋɔ mihiɛ mifɔ̃ enɛ nɔ hewɔ lɛ, mile akɛ mahi shi, ni mikɛ nyɛ fɛɛ aaahi shi, koni nyɛhemɔkɛyeli lɛ ashwere, ni nyɛna miishɛɛ yɛ mli;

²⁶ koni nyɛmli ni baafli nyɛ yɛ mihewɔ kɛji mikɛ nyɛ bakpe ekoŋŋ lɛ ateke nɔ yɛ Kristo Yesu mli.

²⁷ Nɔ kome kɛkɛ ji akɛ, nyɛbaa nyɛjeŋ bɔ ni sa Kristo Sanekpakpa lɛ, koni kɛ miba mibana nyɛ jio, mikɛ nyɛ bɛ jio, manu nyɛhe akɛ nyɛdamɔ shi yɛ mumɔ kome mli, ni nyɛkɛ jwɛŋmɔ kome miipele Sanekpakpa lɛ hemɔkɛyeli lɛ he,

²⁸ ni nyɛkahãa henyɛlɔi lɛ miiwoa nyɛhe gbeyei yɛ nɔ ko nɔ ko mli; nyɛgbeyei ni nyɛsheŋ lɛ ji hiɛkpãtãmɔ okadi hã amɛ; shi nyɛ lɛ, eji yiwalaheremɔ okadi hã nyɛ, ni enɛ jɛ Nyɔŋmɔ dɛŋ.

²⁹ Ejaakɛ nyɛ lɛ aduro nyɛ yɛ Kristo hewɔ, jeee ni nyɛhe enɔ nyɛye kɛkɛ, shi moŋ akɛ nyɛna nɔ hu yɛ ehewɔ.

³⁰ Ni nakai ta kome lɛ ni nyɛna ni miiwu, ni agbɛnɛ nyɛnuɔ akɛ miiwu lolo lɛ, no nɔŋŋ mli nyɛhiɛ nɛɛ.