Filemon 1 - ŊMALƐ KRƆŊKRƆŊ LƐ

Ŋamɔ

¹ Paulo ni ji Kristo Yesu gboklɛfonyo lɛ kɛ wɔnyɛmi Timoteo ŋma yahã Filemon, wɔsuɔlɔ kɛ wɔnaanyo nitsulɔ,

² kɛ wɔnyɛmi yoo Apia, kɛ Arkipo ni ji wɔnaanyo tabilɔ lɛ, kɛ asafo ni yɔɔ owe lɛ fɛɛ.

³ Dromɔ kɛ hejɔlɛ ni jɛ wɔTsɛ Nyɔŋmɔ lɛ kɛ Nuŋtsɔ Yesu Kristo lɛ dɛŋ ahã nyɛ!

Filemon suɔmɔ kɛ ehemɔkɛyeli

⁴ Midaa miNyɔŋmɔ lɛ shi daa ni mitsiɔ otã, nyɛmi nuu Filemon, yɛ misɔlemɔi amli,

⁵ akɛni minuɔ osuɔmɔ kɛ hemɔkɛyeli ni ohiɛ yɛ Nuŋtsɔ Yesu kɛ mɛi krɔŋkrɔŋi lɛ fɛɛ agbɛfaŋ lɛ he lɛ;

⁶ misɔleɔ akɛ naanyobɔɔ ni okɛ wɔ yɔɔ yɛ hemɔkɛyeli mli lɛ atsu nii ahã ekpakpa fɛɛ ekpakpa ni yɔɔ wɔmli yɛ Yesu Kristo mli lɛ lee.

⁷ Ejaakɛ mina miishɛɛ pii kɛ ekãa yɛ osuɔmɔ lɛ hewɔ, anyɛmi, akɛni ohã mɛi krɔŋkrɔŋi lɛ atsui enyɔ amɛmli lɛ.

Paulo kpa fai yɛ Onesimo hewɔ

⁸ No hewɔ lɛ, miyɛ hewalɛ yɛ Kristo mli akɛ mawo bo kitã yɛ nɔ ni sa hewɔ,

⁹ shi kɛ̃lɛ suɔmɔ hewɔ lɛ fai moŋ mikpaa bo, mi Paulo ni mi ji nuumo ni amrɔ nɛɛ mi ji Yesu Kristo gboklɛfonyo hu lɛ.

¹⁰ Miikpa bo fai yɛ mibi ni mifɔ yɛ Kristo mli yɛ mikpãi lɛ amli ni ji Onesimo lɛ hewɔ,

¹¹ mɔ ni sá lɛ ehe bɛ sɛɛnamɔ ko hã bo, shi agbɛnɛ lɛ ehe eba sɛɛnamɔ ehã mi kɛ bo fɛɛ jogbaŋŋ lɛ,

¹² miwo lɛ gbɛ kɛmiiba oŋɔɔ, lɛ ni ji mitsui lɛ.

¹³ Kulɛ miisumɔ akɛ ekɛ mi ahi shi, koni esɔ̃mɔ mi yɛ onajiaŋ be mli ni miyɔɔ kpãi amli yɛ Sanekpakpa lɛ hewɔ lɛ.

¹⁴ Shi misumɔ̃ɔɔ akɛ mafee nɔ ko ni okpɛ̃lɛko nɔ, bɔ ni afee ni ejurɔ ni obaafee lɛ okabafee yɛ nɔnyɛɛ naa, shi moŋ efee yɛ tsuijurɔ naa.

¹⁵ Ejaakɛ ekolɛ enɛ hewɔ agbala nyɛmli be kukuoo lɛ, koni agbɛnɛ oná lɛ ni ehi oŋɔɔ daa.

¹⁶ Jeee akɛ tsulɔ dɔŋŋ, shi moŋ akɛ mɔ ni fe tsulɔ tete, suɔmɔ nyɛmi ni jara wa hã mi waa, shi bo lɛ ejara wa hã bo aahu fe nakai yɛ heloo kɛ Nuŋtsɔ lɛ gbɛfaŋ fɛɛ.

¹⁷ Hewɔ lɛ agbɛnɛ kɛ oŋɔɔ mi akɛ onaanyo lɛ, heremɔ lɛ tamɔ bɔ ni obaahere mi diɛŋtsɛ.

¹⁸ Ni kɛji eye bo sane fɔŋ ko aloo ehiɛ bo nyɔmɔ ko lɛ, buu nakai akɔntaa lɛ ohã mi.

¹⁹ Mi, Paulo, miiŋma kɛ mi diɛŋtsɛ minine akɛ mawo; tsɛbelɛ manyɛ makɛɛ bo akɛ ohiɛ mi bo diɛŋtsɛ tete oyi nyɔmɔ.

²⁰ Hɛɛ, anyɛmi, hã mana ohe sɛɛ yɛ Nuŋtsɔ lɛ mli; hã mitsui anyɔ mimli yɛ Kristo mli.

²¹ Akɛni mihiɛ kã onɔ akɛ ooobo mi toi hewɔ miŋmaa bo nɛɛ, ejaakɛ mile akɛ ooofee fe bɔ ni mikɛɔ nɛɛ tete po.

²² Shi asaŋ saamɔ gbɔiatoohe ko oto mi ejaakɛ mihiɛ kã nɔ akɛ aaatsɔ̃ nyɛsɔlemɔi lɛ anɔ akɛ mi aaake nyɛ.

Ŋamɔi

²³ Epafra, mɔ ni ji minaanyo gboklɛfonyo yɛ Kristo Yesu mli lɛ,

²⁴ kɛ Marko kɛ Aristarko kɛ Dema kɛ Luka, mɛi ni ji minanemɛi nitsulɔi hu miibi bo.

²⁵ WɔNuŋtsɔ Yesu Kristo dromɔ lɛ kɛ nyɛmumɔ lɛ ahi shi! Amen.