Ezra 9 - ŊMALƐ KRƆŊKRƆŊ LƐ

Yudafoi kɛ mɛi ni jeee Yudafoi miiye yooŋɔɔ

¹ Enɛɛmɛi asɛɛ lɛ, onukpai lɛ ba miŋɔɔ amɛbakɛɛ mi akɛ, Israel maŋbii lɛ kɛ osɔfoi lɛ kɛ Levibii lɛ tseko amɛhe yɛ shikpɔji lɛ anɔ bii lɛ ahe, yɛ nii ni amɛfeɔ ni Yudafoi hiɔ lɛ agbɛfaŋ. Nii nɛɛ ji nii ni Kanaanbii kɛ Hitbii kɛ Perizbii kɛ Yebusbii kɛ Amonbii kɛ Moabbii kɛ Ijiptbii kɛ Amorbii lɛ feɔ lɛ.

² Yudahii eŋɔŋɔɔ maŋsɛɛ yei amɛhã amɛ diɛŋtsɛ amɛhe akɛ ŋamɛi, ni amɛbihii hu efee nakai nɔŋŋ. Belɛ jaku ni he tse lɛ ebule amɛhe. Onukpai lɛ kɛ nɔyelɔi lɛ titri tɔ̃ɔ mla nɛɛ.

³ Be ni minu nɛkɛ sane nɛɛ, migbala mihe atade kɛ mihebo, ni mifãmɔ miyiteŋ tsɔi kɛ mitsɛŋ; ni mihe jɔ̃ mihe kɛta shi.

⁴ Kɛkɛ ni mɛi fɛɛ ni gbeyei emɔmɔ amɛ yɛ wiemɔi ni Israel Nyɔŋmɔ lɛ wie yɛ mɛi ni aŋɔ amɛ nom lɛ mla ni amɛtɔ̃ hewɔ lɛ babua amɛhe naa yɛ miŋɔɔ. Shi mi lɛ, mihe jɔ̃ mihe kɛta shi aahu kɛyashi gbɛkɛ afɔleshãa be lɛ mli.

⁵ Be ni gbɛkɛ afɔleshãa be lɛ shɛ lɛ, mite shi kɛ ŋkɔmɔ ni miyeɔ lɛ kɛ mihe atade kɛ mihebo ni etserɛ lɛ, ni miho mikula minakutsei anaa. Migbɛ minijiaŋ mitsɔ̃ɔ Yehowa, miNyɔŋmɔ lɛ,

⁶ ni mikɛɛ “Ao, miNyɔŋmɔ, mihiɛ egbo, ni eefee mi hiɛgbele akɛ mawo mihiɛ nɔ makwɛ ohiɛ, miNyɔŋmɔ; ejaakɛ wɔtɔ̃mɔi lɛ esu wɔ, ni wɔfɔ ni wɔye lɛ da ni ekwɔ tamɔ ŋwɛi.

⁷ Fɔbuu kã wɔnɔ kɛjɛ wɔtsɛmɛi lɛ ayinɔ aahu kɛbashi ŋmɛnɛ. Wɔnishaianii lɛ ahewɔ lɛ ohã shikpɔji lɛ anɔ maŋtsɛmɛi lɛ anine eshɛ wɔ kɛ wɔmaŋtsɛmɛi kɛ wɔsɔfoi lɛ anɔ. Akɛ klante ekpãtã wɔhiɛ, aŋɔ wɔ nom, wɔnibii ni wɔyɔɔ lɛ aha, ni ashwie wɔhiɛ shi tamɔ bɔ ni eyɔɔ ŋmɛnɛ nɛɛ.

⁸ Agbɛnɛ Yehowa, wɔNyɔŋmɔ, oduro wɔ be kukuoo ko. Ohã wɔteŋ mɛi komɛi eye amɛhe kɛjɛ nyɔŋyeli mli, ni ohã wɔ he ko yɛ ohe krɔŋkrɔŋ lɛ ni wɔfee shweshweeshwe yɛ jɛi; koni wɔhiŋmɛii agbele, ni wɔyi ana wala be mli ni wɔyɔɔ nyɔŋyeli mli lɛ.

⁹ Ejaakɛ nyɔji ji wɔ; shimɔ kɛkɛ oshiko wɔ yɛ wɔnyɔŋyeli lɛ mli; shi moŋ ohã Persia maŋtsɛmɛi lɛ ena wɔ mɔbɔ, ni ohã wɔyi ena wala koni wɔma oshĩa lɛ ni wɔsaa emli tsukoi lɛ. Okɛ ohewalɛ lɛ efo afabaŋ ewo wɔhe yɛ Yuda kɛ Yerusalɛm, koni wɔfee shweshweeshwe.”

¹⁰ “No hewɔ lɛ, agbɛnɛ, wɔNyɔŋmɔ, mɛni wɔɔɔkɛɛ yɛ enɛ fɛɛ sɛɛ? Wɔyeee okitãi lɛ ni otsɔ̃ otsuji, gbalɔi lɛ, anine nɔ owo lɛ anɔ.

¹¹ Amɛkɛɛ wɔ akɛ shikpɔŋ ni wɔyaa ni wɔyaŋɔ lɛ, shikpɔŋ ni enɔ bii lɛ kɛ amɛnifeemɔnii ni ahiɔ lɛ ebule lɛ. Amɛkɛ amɛnihiinii ni amɛfeɔ lɛ ehã shikpɔŋ lɛ nɔ eyi obɔ̃ kɛ muji yɛ shikpɔŋ lɛ he fɛɛ he.

¹² Enɛ hewɔ lɛ, ogbalɔi lɛ kɛɛ wɔ akɛ wɔkɛ wɔbiyei akahã shikpɔji lɛ anɔ bii agbãla; ni asaŋ, wɔkaŋɔ amɛbiyei wɔhã wɔbihii. Gbalɔi lɛ kɛɛ wɔ akɛ wɔkatao hejɔlɛ loo shweremɔ wɔhã shikpɔŋ lɛ nɔ bii lɛ gbi ko gbi ko. Amɛkɛɛ wɔfee nakai bɔ ni afee ni wɔhe awa ni wɔye shikpɔŋ lɛ nɔ nii kpakpai lɛ ni wɔshi wɔhã wɔbii akɛ gboshinii kɛya naanɔ.

¹³ Nii ni ba wɔnɔ akɛ toigbalamɔ yɛ wɔnishaianii kɛ wɔfɔ kpeteŋkple ni wɔye lɛ hewɔ lɛ fɛɛ sɛɛ lɛ, bo wɔNyɔŋmɔ lɛ, owoko wɔ nyɔmɔ bɔ ni sa wɔnifɔ̃jianii lɛ, ni ohã wɔhiɛ kã.

¹⁴ Aso wɔɔku okitãi lɛ amli ekoŋŋ, ni wɔkɛ wɔhe ayabɔ maji ni feɔ nihiinii nɛɛ ahe ni wɔkɛ amɛ aye yooŋɔɔ lo? Aso omli fuŋ wɔ kɛyashiŋ beyinɔ ni oookpãtã wɔhiɛ ogbe naa bɔ ni eshwɛŋ mɔ ko mɔ ko aloo mɔ ko mɔ ko hu ejeŋ mli lo?

¹⁵ Yehowa, Israel Nyɔŋmɔ, jalɔ ji bo; ejaakɛ ashi wɔ akɛ mɛi ni eshwɛ ni eje hiɛkpãtãmɔ lɛ mli tamɔ bɔ ni eyɔɔ ŋmɛnɛ gbi nɛɛ. Naa, wɔyɛ ohiɛ akɛ mɛi ni eye fɔ. Ejaakɛ wɔfɔ ni wɔye lɛ hewɔ lɛ, wɔteŋ mɔ ko mɔ ko nyɛŋ ohiɛ adamɔ.”