Ezra 8 - ŊMALƐ KRƆŊKRƆŊ LƐ

Mɛi ni ku amɛsɛɛ kɛjɛ nomŋɔɔ mli kɛba

¹ Mɛi ni kɛ mi, Ezra, fã kɛjɛ Babilon, be mli ni Artashasta yeɔ maŋtsɛ lɛ atsɛmɛi awei lɛ onukpai nɛ:

² Finehas we lɛ, Gershom ji mɔ ni jɛ jɛi. Itamar we lɛ, Daniel. David we lɛ, Hatush, Shekania bi lɛ.

³ Parosh we lɛ, Zakaria kɛ hii oha kɛ nyɔŋmai enumɔ ni aŋmala amɛgbɛii ashi enɔ.

⁴ Pahat-Moab we lɛ, Elihoenai, Zeharia bi lɛ ni hii ohai enyɔ shi enɔ.

⁵ Zatu we lɛ, Shekania, Yahaziel bi lɛ, ni hii ohai etɛ̃ shi enɔ.

⁶ Adin we lɛ, Ebed, Yonatan bi lɛ, ni hii nyɔŋmai enumɔ shi enɔ lɛ.

⁷ Elam we lɛ, Yeshaia, Atalia bi lɛ, ni hii nyɔŋmai kpawo shi enɔ.

⁸ Shefatia we lɛ, Zebadia, Mikael bi lɛ; hii nyɔŋmai kpaanyɔ shi enɔ.

⁹ Yoab we lɛ, Obadia, Yehiel bi lɛ, ni hii ohai enyɔ kɛ nyɔŋma kɛ kpaanyɔ shi enɔ.

¹⁰ Bani we lɛ, Shelomit, Yosifia bi lɛ, ni hii oha kɛ nyɔŋmai ekpaa shi enɔ.

¹¹ Bebai we lɛ, Zakaria, Bebai bi lɛ; hii nyɔŋmai enyɔ kɛ kpaanyɔ shi enɔ.

¹² Azgad we lɛ, Yohanan, Hakatan bi lɛ; ni hii oha kɛ nyɔŋma shi enɔ.

¹³ Adonikam we lɛ bii ba sɛɛkpee. Amɛgbɛii nɛ: Elifelet, Yeuel kɛ Shemaia; ni hii nyɔŋmai ekpaa shi amɛnɔ.

¹⁴ Bigewai we lɛ, Utai kɛ Zakur; ni hii nyɔŋmai kpawo shi amɛnɔ.

Ezra tao Levibii hã Sɔlemɔ We lɛ nitsumɔ

¹⁵ Mibua amɛnaa kɛtee faa ko ni hoɔ kɛyaa Ahawa maŋ lɛ mli lɛ toi. Wɔhi jɛi gbii etɛ̃. Be ni mikpa maŋbii lɛ kɛ osɔfoi lɛ ateŋ lɛ minaaa Levinyo ko yɛ jɛi.

¹⁶ No hewɔ lɛ, mitsu ayatsɛ Eliezer kɛ Ariel kɛ Shemaia kɛ Elnatan kɛ Yarib Elnatan kɛ Natan kɛ Zakaria kɛ Meshulam ni ji hiɛnaanɔbii, kɛ Yoiarib kɛ Elnatan ni ji tsɔɔlɔi hu lɛ kɛba.

¹⁷ Mitsu amɛ Ido, Kasifia maŋ lɛ mli onukpa lɛ ŋɔɔ. Mihã amɛ wiemɔ ni amɛkɛyahã Ido kɛ enanemɛi Sɔlemɔ We sɔ̃ɔlɔi ni yɔɔ Kasifia maŋ lɛ mli lɛ, koni amɛwo mɛi agbɛ kɛba Kasifia maŋ lɛ mli ni amɛbasɔmɔ yɛ wɔNyɔŋmɔ lɛ we lɛ.

¹⁸ WɔNyɔŋmɔ lɛ dromɔ naa lɛ, amɛkɛ Sherebia, nuu ko ni hiɛ kã shi ni jɛ Maheli ni ji Levi bi kɛ Israel nabi lɛ tsɛmɛiawebii lɛ ateŋ, kɛ ebii kɛ enyɛmimɛi ni amɛ fɛɛ amɛfeɔ gbɔmɛi nyɔŋma kɛ kpaanyɔ bahã wɔ.

¹⁹ Amɛkɛ Hashabia kɛ Yeshaia ni jɛ Meraribii lɛ ateŋ kɛ mɛi nyɔŋmai enyɔ ni ji enyɛmimɛi kɛ ebii hu bahã wɔ.

²⁰ Sɔlemɔ We sɔ̃ɔlɔi ohai enyɔ kɛ nyɔŋmai enyɔ ni David kɛ etsuji lɛ hala ni amɛsɔ̃mɔ Levibii lɛ fata he. Amɛ fɛɛ lɛ, atsi amɛgbɛii atã.

Ezra hã maŋbii lɛ kɛ lɛ hi ŋmãa

²¹ Kɛkɛ ni mishiɛ yɛ jɛi akɛ ahi ŋmãa yɛ Ahawa Faa lɛ naa, koni wɔba wɔhe shi wɔhã wɔNyɔŋmɔ lɛ ni wɔkpa lɛ fai koni ehã wɔ kɛ wɔbii kɛ wɔnabii fɛɛ afee shweshweeshwe yɛ wɔgbɛfãa lɛ mli.

²² Ejaakɛ eefee mi hiɛgbele akɛ makpa maŋtsɛ lɛ fai ni ehã wɔ asraafoi kɛ okpɔŋɔnɔtaralɔi ni amɛbu wɔhe yɛ henyɛlɔi ni yɔɔ gbɛteŋ lɛ ahewɔ. Eefee mi hiɛgbele ejaakɛ wɔkɛɛ maŋtsɛ lɛ akɛ: wɔNyɔŋmɔ lɛ yeɔ buaa mɛi fɛɛ ni taoɔ esɛɛgbɛ lɛ, shi mɛi fɛɛ ni kɛ lɛ efeee nɔ ko lɛ enaaa amɛhe miishɛɛ ni egbalaa amɛtoi waa.

²³ No hewɔ lɛ, wɔhi ŋmãa, ni wɔkpa wɔNyɔŋmɔ lɛ fai yɛ enɛ hewɔ, ni efee nɔ ni wɔbi lɛ lɛ ehã wɔ.

Nibii ni ake yɛ Sɔlemɔ we lɛ hewɔ

²⁴ Kɛkɛ ni mifamɔ osɔfoi lɛ ateŋ onukpai nyɔŋma kɛ enyɔ: Sherebia kɛ Hashabia kɛ amɛnyɛmimɛi lɛ ateŋ mɛi nyɔŋma.

²⁵ Miŋmɛ jwiɛtɛi kɛ shika kɛ nibii ni ji Sɔlemɔ we lɛ nikeenii ni maŋtsɛ lɛ kɛ ejinafoi lɛ kɛ elumɛi lɛ kɛ Israel fɛɛ ni yɔɔ jɛi lɛ kekee lɛ miwo amɛdɛŋ.

^26-27 Nɔ ni miŋmɛ miwo amɛdɛŋ lɛ nɛ: Jwiɛtɛi ni tsiimɔ ji talentai ohai ekpaa kɛ nyɔŋmai enumɔ; jwiɛtɛi tsɛnsii ni tsiimɔ ji talentai oha kɛ shika ŋmiiŋmi ni tsiimɔ ji talentai oha; shika kpuji nyɔŋmai enyɔ ni tsiimɔ ji dalei akpe kome, tsɛnsii enyɔ ni akɛ akɔɔble kaŋkaŋ ni jara wa tamɔ shika fee.

²⁸ Mikɛɛ amɛ akɛ, “Nyɛhe tse krɔŋkrɔŋ nyɛhã Yehowa, ni nibii lɛ hu he tse krɔŋkrɔŋ. Jwiɛtɛi lɛ kɛ shika lɛ tsuijurɔ naa akɛhã Yehowa, wɔtsɛmɛi aNyɔŋmɔ lɛ.

²⁹ Nyɛbua he ni nyɛkɛtoa kɛyashi beyinɔ ni nyɛaaŋmɛ yɛ osɔfoi lɛ kɛ Levibii lɛ onukpai lɛ ni yɔɔ Yerusalɛm lɛ ahiɛ, yɛ Yehowa we lɛ piai lɛ amli.”

³⁰ Kɛkɛ ni osɔfoi lɛ kɛ Levibii lɛ loo jwiɛtɛi lɛ kɛ shika lɛ kɛ nibii ni aŋmɛ lɛ koni amɛkɛya wɔNyɔŋmɔ lɛ we lɛ yɛ Yerusalɛm.

Wɔku wɔsɛɛ kɛba Yerusalɛm

³¹ Klɛŋklɛŋ nyɔŋ lɛ nɔ gbi ni ji nyɔŋma kɛ enyɔ lɛ nɔ lɛ, wɔfã yɛ Ahawa Faa lɛ naa kɛmiiya Yerusalɛm. WɔNyɔŋmɔ lɛ bu wɔhe, ni ejie wɔ yɛ henyɛlɔi lɛ kɛ mɛi abɔ ni yawo wɔ ka yɛ gbɛteŋ lɛ hu adɛŋ.

³² Wɔshɛ Yerusalɛm, ni wɔye gbii etɛ̃ yɛ jɛi.

³³ Gbi ni ji ejwɛ lɛ nɔ lɛ, aŋmɛ jwiɛtɛi lɛ kɛ shika lɛ kɛ nibii lɛ yɛ wɔNyɔŋmɔ lɛ we lɛ, ni atu awo Meremot, Uria bi ni ji osɔfo lɛ, kɛ Eleazar, Finehas bi ni fata ehe lɛ adɛŋ. Mɛi ni fata amɛhe ji Levibii enyɔ ni ji Yozabad, Yeshua bi lɛ, kɛ Noadia, Binui bi lɛ.

³⁴ Akane nɔ fɛɛ nɔ ni aŋmɛ, ni aŋma afɔ̃ shi nakai be lɛ mli nɔŋŋ.

³⁵ Mɛi ni ku amɛsɛɛ kɛba lɛ bashã shãa afɔlei amɛhã Israel Nyɔŋmɔ lɛ: tsinahii nyɔŋma kɛ enyɔ ha Israel maŋ muu lɛ fɛɛ, kɛ ojwɛnii nyɔŋmai nɛɛhu kɛ ekpaa, kɛ toobii nyɔŋmai kpawo kɛ kpawo, kɛ esha he afɔle tookpakpoi nyɔŋma kɛ enyɔ. Enɛɛmɛi fɛɛ lɛ akɛshã shãa afɔle ahã Yehowa.

³⁶ Kɛkɛ ni amɛkɛ maŋtsɛ lɛ mlai lɛ hã amraloi lɛ kɛ lumɛi lɛ ni yɔɔ Eufrate lɛ anaigbɛ biɛgbɛ lɛ, ni gbɔmɛi nɛɛ ye amɛbua maŋ lɛ kɛ Nyɔŋmɔ We lɛ.