Ezra 7 - ŊMALƐ KRƆŊKRƆŊ LƐ

Ezra bashɛ Yerusalɛm

¹ Nii nɛɛ asɛɛ yɛ Persia Maŋtsɛ Artashasta yinɔ lɛ, nuu ko ni atsɛɔ lɛ Ezra lɛ yiŋ kɛjɛ Babilon kɛba. Lɛ ji Ezra, Seraia bi kɛ Azaria nabi lɛ. Ezra kaŋsowa kɛ nanashishiu kɛ nanadadao kɛ nii kɛ nii ji Hilkia kɛ

² Shalum kɛ Zadok kɛ Ahitub kɛ

³ Amaria kɛ Azaria kɛ Meraiot kɛ

⁴ Zerahia kɛ Uzi kɛ Buki kɛ

⁵ Abishua kɛ Finehas kɛ Eleazar kɛ osɔfonukpa Aaron.

⁶ Ezra ni jɛ Babilon ba nɛɛ, eji mlatsɔɔlɔ, ni mla ni Yehowa, Israel Nyɔŋmɔ lɛ, wo kɛtsɔ̃ Mose nɔ lɛ, ele mli jogbaŋŋ diɛŋtsɛ. Yehowa, eNyɔŋmɔ lɛ, jɔɔmɔ yɛ enɔ; hewɔ lɛ nɔ fɛɛ nɔ ni etaoɔ lɛ maŋtsɛ lɛ hãa lɛ.

⁷ Israelbii lɛ ateŋ mɛi komɛi kɛ Osɔfoi kɛ Levibii kɛ lalatsɛmɛi kɛ agbonaakwɛlɔi kɛ Sɔlemɔ we sɔ̃ɔlɔi lɛ ateŋ mɛi komɛi hu fata Ezra he kɛba.

⁸ Amɛbashɛ Yerusalɛm yɛ maŋtsɛ Artashasta maŋtsɛyeli afi ni ji kpawo lɛ nɔ, yɛ nyɔŋ ni ji enumɔ lɛ nɔ klɛŋklɛŋ gbi lɛ nɔ.

⁹ Be ni amɛyiŋ kɛjɛ Babilon ji klɛŋklɛŋ nyɔŋ lɛ nɔ klɛŋklɛŋ gbi lɛ, ni nyɔŋ ni ji enumɔ lɛ nɔ klɛŋklɛŋ gbi lɛ nɔ lɛ amɛbashɛ Yerusalɛm, yɛ Ezra Nyɔŋmɔ lɛ yelikɛbuamɔ naa.

¹⁰ Ejaakɛ nɔ ni kã Ezra tsui nɔ ji akɛ eeekase Yehowa mla lɛ ni eye nɔ, ni etsɔ̃ɔ mɛi akpɔi lɛ kɛ mlai lɛ yɛ Israel maŋ lɛ mli.

Wolo ni Artashasta kɛhã Ezra

¹¹ Wolo ni Maŋtsɛ Artashasta kɛhã Ezra, osɔfo kɛ mlatsɔɔlɔ lɛ ni le Yehowa kitãi kɛ akpɔi ni ewo Israel lɛ amli jogbaŋŋ lɛ mli sane nɛ,

¹² “Artashasta, maŋtsɛmɛi amaŋtsɛ lɛ, ŋmã ehã osɔfo Ezra ni ji mlatsɔɔlɔ ni le ŋwɛi Nyɔŋmɔ lɛ mla lɛ mli jogbaŋŋ lɛ.

¹³ “Miiwo akpɔ akɛ mɛi fɛɛ ni yɔɔ mimaŋtsɛyeli lɛ mli, ni jɛ Israelbii lɛ kɛ osɔfoi lɛ kɛ Levibii lɛ ateŋ, ni amɛ diɛŋtsɛ amɛsumɔɔ akɛ amɛaatee Yerusalɛm lɛ, amɛkɛ bo aya.

¹⁴ Maŋtsɛ kɛ ejinafoi kpawo lɛ tsuɔ bo koni oyatao Yuda kɛ Yerusalɛm saji amli yɛ oNyɔŋmɔ lɛ mla ni ohiɛ lɛ naa.

¹⁵ Jwiɛtɛi kɛ shika ni maŋtsɛ kɛ ejinafoi lɛ eke Israel Nyɔŋmɔ lɛ ni eshihilɛhe yɔɔ Yerusalɛm lɛ yɛ tsuijurɔ naa lɛ, ŋɔɔ kɛya.

¹⁶ Ŋɔɔ jwiɛtɛi kɛ shika fɛɛ hu ni ooona yɛ Babilon shikpɔŋ lɛ fɛɛ nɔ lɛ kɛya. Asaŋ, nikeenii ni maŋbii lɛ kɛ osɔfoi lɛ aaake yɛ tsuijurɔ naa yɛ amɛNyɔŋmɔ lɛ we ni yɔɔ Yerusalɛm lɛ hewɔ lɛ, ŋɔɔ no hu kɛya.

¹⁷ “Nɛkɛ shika nɛɛ kwɛmɔ ni akɛhe tsinai, ojwɛnii, toobii kɛ amɛhe niyenii afɔlei kɛ dãa afɔle, koni okɛyashã afɔle yɛ afɔleshãa latɛ lɛ ni yɔɔ nyɛNyɔŋmɔ lɛ we lɛ yɛ Yerusalɛm lɛ nɔ.

¹⁸ Jwiɛtɛi kɛ shika ni aaashwɛ lɛ nyɛkɛfea nɔ ni sa okɛ onyɛmimɛi lɛ ahiɛ ni nyɛNyɔŋmɔ lɛ sumɔɔ.

¹⁹ Asaŋ nibii ni akɛhã bo ni akɛsɔmɔ yɛ oNyɔŋmɔ lɛ we lɛ, tuu ohã yɛ Nyɔŋmɔ ni yɔɔ Yerusalɛm lɛ hiɛ.

²⁰ Nɔ fɛɛ nɔ ni he aaahia lolo yɛ oNyɔŋmɔ lɛ we lɛ hewɔ ni sa akɛ ohã lɛ, jɛɛ maŋtsɛ we lɛ fotro lɛ mli ohe.

²¹ “Mi, Maŋtsɛ Artashasta, miiwo jwetritolɔi fɛɛ ni yɔɔ faa lɛ anaigbɛ biɛgbɛ lɛ akpɔ akɛ nɔ fɛɛ nɔ ni osɔfo Ezra, mlatsɔɔlɔ ni le ŋwɛi Nyɔŋmɔ lɛ mla lɛ mli jogbaŋŋ lɛ, aaabi nyɛ lɛ, aye oyai ni afee,

²² kɛyashi jwiɛtɛi ni tsiimɔ ji talentai oha, kɛ ŋmaa nsɛnitɛ wulu akpei nyɔŋma, kɛ wain litai akpei enyɔ kɛ mu litai akpei enyɔ, kɛ ŋoo tsiimɔ bɔ ni he ehia.

²³ Nɔ fɛɛ nɔ ni ŋwɛi maŋtsɛ lɛ ewo he akpɔ lɛ, nyɛhãa ni afea fɛɛ pɛpɛɛpɛ yɛ ŋwɛi Nyɔŋmɔ lɛ We lɛ he koni emli akafu maŋtsɛ kɛ ebii ni baaye maŋtsɛ yɛ esɛɛ lɛ.

²⁴ Asaŋ wɔmiihã nyɛna nyɛle akɛ osɔfoi kɛ Levibii kɛ lalɔi kɛ agbonaakwɛlɔi kɛ Sɔlemɔ we lɛ mli sɔ̃ɔlɔi kɛ tsuji ni yɔɔ nɛkɛ Nyɔŋmɔ We nɛɛŋ lɛ, mɔ ko mɔ ko bɛ hegbɛ akɛ etsuɔ amɛ onia loo too loo gbɛjee shika ko.

²⁵ “Ni bo, Ezra hu, yɛ nilee ni oNyɔŋmɔ lɛ ehã bo lɛ naa lɛ, fãamɔ mɛi ni kwɛɔ sane amɛyeɔ kɛ kojolɔi fɛɛ ni le oNyɔŋmɔ lɛ mla lɛ koni amɛkojo mɛi fɛɛ ni yɔɔ Eufrate Faa lɛ anaigbɛ biɛgbɛ lɛ ateŋ saji. Mɛi ni leee lɛ, nyɛtsɔ̃a amɛ ni amɛle.

²⁶ Mɔ fɛɛ mɔ ni yeee oNyɔŋmɔ lɛ mla lɛ kɛ maŋtsɛ mla lɛ nɔ lɛ, akojo lɛ pɛpɛɛpɛ koni toigbalamɔ ni sa lɛ akɛhã lɛ. Gbele jio, naneshitutswaa jio, nii anaatsii jio, tsuŋwoo jio.”

Ezra jie Nyɔŋmɔ yi

²⁷ Kɛkɛ ni Ezra kɛɛ, “Ajie Yehowa, wɔtsɛmɛi aNyɔŋmɔ lɛ, yi akɛ ekɛ nɛkɛ nɔ ko wo maŋtsɛ lɛ yiŋ akɛ ewula Yehowa we ni yɔɔ Yerusalɛm lɛ.

²⁸ Yɛ mɔbɔ ni lɛ Yehowa ena mi lɛ hewɔ lɛ, mina hiɛ yɛ maŋtsɛ lɛ kɛ ejinafoi lɛ kɛ elumɛi agboi lɛ fɛɛ hiɛ. Hewalɛ ni ewo mi hewɔ lɛ mina ekãa mikɛbua Israelbii lɛ ateŋ onukpai lɛ anaa koni amɛkɛ mi afã kɛba.”