Ezra 6 - ŊMALƐ KRƆŊKRƆŊ LƐ

Ayana akpɔ ni Koresh wo lɛ

¹ Kɛkɛ ni Maŋtsɛ Dario fã koni ayatao yɛ shĩa ni akɛ saji ni aŋmala ashwie shi lɛ toɔ mli yɛ Babilon lɛ.

² Shi Ekbatana, maŋtsɛmaŋ ni yɔɔ Media shikpɔŋ lɛ nɔ lɛ mli ji he ni ayana wolo ko yɛ; ni sane ni aŋmã yɛ mli nɛ,

³ “Maŋtsɛ Koresh klɛŋklɛŋ afi lɛ nɔ lɛ, ewo akpɔ yɛ Nyɔŋmɔ We lɛ ni yɔɔ Yerusalɛm lɛ he akɛ: ‘Nyɔŋmɔ shĩa ni yɔɔ Yerusalɛm ni ashãa afɔlei yɛ mli lɛ, ama, ni ahã eshishitoo lɛ awa. Ekwɔlɛ ninetalɔi nyɔŋmai ekpaa ni elɛɛmɔ hu nakai nɔŋŋ.

⁴ Egbogboi lɛ bɔ ni abaatswa lɛ nɛ, Kɛ atswa tɛi wuji klɛmpɛi etɛ̃ lɛ, kɛkɛ lɛ ashwie nɔ tso klɛmpɛ kome. Nyɔmɔ ni aaabɔ yɛ he lɛ, ajɛ maŋtsɛ we fotro lɛ mli awo.

⁵ Asaŋ shika ŋmiiŋmi kɛ jwiɛtɛi nibii ni Nebukadnezar yaloo kɛjɛ Sɔlemɔtsu ni yɔɔ Yerusalɛm lɛ mli ni ekɛba Babilon lɛ, akɛku sɛɛ ahã ni akɛya Sɔlemɔtsu lɛ ni yɔɔ Yerusalɛm lɛ mli ni akɛyato amɛtoohe koni ahã ahi Nyɔŋmɔ We lɛ.’ ”

Dario fã ni aya nɔ atsu nii lɛ

⁶ Kɛkɛ ni Dario ŋmã hetoo eyahã Tatnai, faa lɛ anaigbɛ amralo lɛ, kɛ Shetar-Boznai kɛ amraloi ni fata amɛhe yɛ faa lɛ anaigbɛ shikpɔŋ lɛ nɔ lɛ, ni efã amɛ akɛ, “Nyɛjea jɛi nyɛyaa sɛɛ flɛŋŋ.

⁷ Nyɛŋmɛa gbɛ koni atsu Nyɔŋmɔ We lɛ he nitsumɔ lɛ; nyɛkagbaa nitsumɔ lɛ naa. Nyɛhãa Yudafoi lɛ amralo lɛ kɛ amɛ onukpai lɛ amã Nyɔŋmɔ We nɛɛ yɛ emãahe lɛ.

⁸ Asaŋ miiwo akpɔ matsɔ̃ɔ nɔ ni esa akɛ nyɛfee nyɛhã nɛkɛ Yudafoi onukpai nɛɛ yɛ Nyɔŋmɔ shĩa lɛ maa lɛ gbɛfaŋ. Onia ni atsuɔ yɛ faa lɛ anaigbɛ ahã maŋtsɛ lɛ, aye oyai ni ahã gbɔmɛi nɛɛ emli eko ni amɛkɛwo nyɔmɔ ni aaabɔ lɛ fɛɛ koni nitsumɔ lɛ akakpɛŋsɛŋ.

⁹ Nɔ fɛɛ nɔ ni he hiaa gbɔmɛi nɛɛ: tsinai oblahii, ojwɛnii, toi aloo toobii ni akɛshãa shãa afɔlei ahãa ŋwɛi Nyɔŋmɔ lɛ, ŋmãa, ŋoo, wain loo mu lɛ, ahã osɔfoi ni yɔɔ Yerusalɛm lɛ bɔ ni amɛtaoɔ; ahã amɛ gbi fɛɛ gbi; ni akafo mli,

¹⁰ koni amɛshã afɔlei ni jeɔ ŋma amɛhã ŋwɛi Nyɔŋmɔ lɛ, ni amɛkpa fai koni maŋtsɛ kɛ ebihii lɛ ayi ana wala.

¹¹ Asaŋ miiwo akpɔ akɛ mɔ fɛɛ mɔ ni aaatsake fãmɔ ni mifã nɛɛ hiɛ lɛ, ajie etsu nɔ mplaŋ ni agbɔ naa akɛtsu emli. Ahã eshĩa lɛ atsɔ̃ tumo.

¹² Nyɔŋmɔ mɔ ni fee shĩa nɛɛ ejamɔhe lɛ abutu maŋtsɛ fɛɛ maŋtsɛ kɛ maŋ fɛɛ maŋ ni aaaka akɛ eeetsake fãmɔ nɛɛ hiɛ aloo akɛ eeekumɔ nɛkɛ Nyɔŋmɔ We nɛɛ ni yɔɔ Yerusalɛm lɛ. Mi, Dario, miwo akpɔ nɛɛ. Aye nɔ pɛpɛɛpɛ.”

Agbele Sɔlemɔtsu lɛ naa

¹³ Kɛkɛ ni Tatnai, faa lɛ anaigbɛ amralo lɛ, kɛ Shetar-Boznai kɛ amɛnanemɛi nitsulɔi lɛ fee bɔ ni Maŋtsɛ Dario fã akɛ afee lɛ pɛpɛɛpɛ.

¹⁴ Yudafoi onukpai lɛ ma Sɔlemɔ we lɛ, ni etee nɔ jogbaŋŋ yɛ Hagai, gbalɔ lɛ, kɛ Zakaria, Ido bi lɛ, gbalɛ lɛ hewɔ. Amɛma, ni amɛgbe naa yɛ Israel Nyɔŋmɔ lɛ kitã lɛ kɛ Persia maŋtsɛ Koresh kɛ Dario Artashasta akpɔ lɛ naa.

¹⁵ Agbe shĩa lɛ naa yɛ Maŋtsɛ Dario maŋtsɛyeli afi ni ji ekpaa lɛ nɔ, yɛ Adar nyɔŋ lɛ nɔ gbi ni ji etɛ̃ lɛ nɔ.

¹⁶ Kɛkɛ ni Israelbii lɛ, osɔfoi kɛ Levibii lɛ kɛ mɛi ni eshwɛ ni aŋɔ amɛ nom lɛ ye gbi ni agbeleɔ Nyɔŋmɔ We lɛ naa lɛ akɛ gbijurɔ. Amɛye lɛ kɛ mliflimɔ.

¹⁷ Ni Nyɔŋmɔ We lɛ naagbelemɔ lɛ mli lɛ amɛkɛ tsinai oha, ojwɛnii ohai enyɔ, toobii ohai ejwɛ shã afɔle; ni amɛkɛ too kpakpoi nyɔŋma kɛ enyɔ shã shãa afɔle amɛhã Israel muu lɛ fɛɛ yɛ Israel akutsei lɛ ayibɔ lɛ naa.

¹⁸ Ni amɛto osɔfoi lɛ kɛ amɛsafokui lɛ, kɛ Levibii yɛ amɛmlijai lɛ anaa amɛhã Nyɔŋmɔ sɔ̃ɔmɔ nitsumɔ ni yɔɔ Yerusalɛm lɛ, taakɛ bɔ ni aŋmã yɛ Mose wolo lɛ mli lɛ.

Hehoo lɛ

¹⁹ Kɛkɛ ni mɛi ni aŋɔ amɛ nom ni amɛku amɛsɛɛ amɛba lɛ ye Hehoo Gbijurɔ lɛ yɛ klɛŋklɛŋ nyɔŋ lɛ nɔ gbi ni ji nyɔŋma kɛ ejwɛ lɛ nɔ.

²⁰ Osɔfoi lɛ kɛ Levibii lɛ bluublu etsɔ̃ hiɛ amɛtsuu amɛhe, ni amɛ fɛɛ amɛhe etse. Amɛgbe Hehoo toobii lɛ amɛhã mɛi ni aŋɔ amɛ nom lɛ fɛɛ kɛ amɛnyɛmimɛi osɔfoi lɛ kɛ amɛ diɛŋtsɛ amɛhe.

²¹ Israelbii lɛ ni jɛ nomŋɔɔ mli ba lɛ ye Hehoo toobi lɛ. Mɛi krokomɛi hu ni ye ji mɛi fɛɛ ni etse amɛhe yɛ nii ni buleɔ mɔ ni shikpɔŋ lɛ nɔ wɔŋjalɔi feɔ lɛ ahe, ni amɛkɛ amɛhe ebabɔ Israelbii lɛ ahe koni amɛtao Yehowa, Israel Nyɔŋmɔ lɛ, sɛɛgbɛ lɛ.

²² Amɛkɛ nyamɔ ye Akpiti Gbijurɔ lɛ gbii kpawo; ejaakɛ Yehowa ehã amɛmli efili amɛ, akɛni ehã Asiria maŋtsɛ lɛ tsui emɔ amɛ koni ewo amɛ hewalɛ yɛ Nyɔŋmɔ ni ji Israel Nyɔŋmɔ lɛ We lɛ he nitsumɔ lɛ mli lɛ.