Ezra 5 - ŊMALƐ KRƆŊKRƆŊ LƐ

¹ Nakai be lɛ mli lɛ gbalɔ Hagai kɛ gbalɔ Zakaria, Ido bi lɛ, gba yɛ Israel Nyɔŋmɔ lɛ gbɛi mli amɛhã Yudafoi ni yɔɔ Yuda kɛ Yerusalɛm lɛ.

² Kɛkɛ ni Zerubabel, Shealtiel bi lɛ, kɛ Yeshua, Yozadak bi lɛ, te shi ni amɛbɔi Nyɔŋmɔ We lɛ ni yɔɔ Yerusalɛm lɛ mãa. Nyɔŋmɔ gbalɔi enyɔ lɛ fĩ amɛsɛɛ, ni amɛwa amɛ.

³ Nakai be lɛ mli nɔŋŋ lɛ, Tatnai ni ji amralo ni kwɛɔ Eufrate Faa lɛ anaigbɛ biɛgbɛ lɛ kɛ Shetar-Boznai kɛ amɛnanemɛi lɛ, ba mɛi ni maa tsu lɛ ŋɔɔ, ni nɔ ni amɛbi mɛi ni maa lɛ nɛ, “Namɔ fã nyɛ akɛ nyɛma nɛkɛ tsu nɛɛ ni nyɛgbe naa?”

⁴ Asaŋ amɛbi mɛi ni maa tsu lɛ akɛ, “Hii ni maa lɛ, te amɛgbɛii hu?”

⁵ Shi Yudafoi aNyɔŋmɔ lɛ hiŋmɛi kã Yudafoi onukpai lɛ ahe, ni mɛi ni ba lɛ, atsiii amɛ gbɛ kɛyashi beyinɔ ni sane lɛ yashɛ Dario ŋɔɔ ni eŋma hetoo kɛba.

⁶ Wolo ni Tatnai ni ji amralo ni yɔɔ Eufrate Faa lɛ anaigbɛ biɛgbɛ lɛ kɛ Shetar-Boznai kɛ mɛi ni fata amɛhe ni ji amralofoi ni yɔɔ Eufrate Faa lɛ biɛgbɛ lɛ tsu akɛyahã maŋtsɛ Dario lɛ mli lɛ, amɛbɔ lɛ amaniɛ, ni amaniɛ lɛ nɛ,

⁷ “Akɛ wolo nɛɛ miitsu ayahã Maŋtsɛ Dario. Nii hã manye!

⁸ Wɔmiitao ni Maŋtsɛ ana ale akɛ wɔyiŋ wɔtee Yuda shikpɔŋ lɛ nɔ, ni wɔtee Nyɔŋmɔ kpeteŋkple lɛ we lɛ. Aama kɛ tɛi kpeleikpelei, ni akɛ tsei eshwie egbogboi lɛ anɔ. Ahiɛ nɛkɛ nitsumɔ nɛɛ mli kɛ mɔdɛŋbɔɔ, ni eeya nɔ jogbaŋŋ yɛ mɛi ni tsuɔ nii lɛ adɛŋ.

⁹ Kɛkɛ ni wɔbi amɛnukpai lɛ mɔ ni fã amɛ akɛ amɛma nɛkɛ shĩa nɛɛ ni amɛsaa ehe kɛ emli amɛgbe naa lɛ.

¹⁰ Asaŋ wɔbibii amɛgbɛii hu, koni wɔŋmala amɛnukpai lɛ agbɛii ni wɔhã ole.

¹¹ Hetoo ni amɛhã wɔ nɛ, ‘Ŋwɛi kɛ shikpɔŋ Nyɔŋmɔ lɛ tsuji ji wɔ. Wɔmiisaa shĩa ni Israel maŋtsɛ agbo ko ma ni egbe naa jeeŋmɔ afii babaoo nɛ lɛ.

¹² Shi akɛni wɔtsɛmɛi lɛ wo ŋwɛi Nyɔŋmɔ lɛ mli la hewɔ lɛ, ehã Babilon maŋtsɛ, Nebukadnezar, Kaldeanyo lɛ, baye amɛnɔ kunim. Nebukadnezar kumɔ nɛkɛ shĩa nɛɛ, ni eŋɔ maŋbii lɛ nom kɛtee Babilon.

¹³ Shi Koresh, Babilon maŋtsɛ lɛ yinɔ klɛŋklɛŋ afi lɛ nɔ lɛ, ewo akpɔ akɛ abama nɛkɛ Nyɔŋmɔ We nɛɛ.

¹⁴ Shika ŋmiiŋmi kɛ jwiɛtɛi nibii ni Nebukadnezar baloo yɛ Sɔlemɔtsu lɛ ni yɔɔ Yerusalɛm lɛ mli ni ekɛyawo Sɔlemɔtsu ni yɔɔ Babilon lɛ mli lɛ, maŋtsɛ Koresh jie yɛ Babilon Sɔlemɔtsu lɛ mli. Etu ewo mɔ ko ni atsɛɔ lɛ Sheshbazar ko ní ewo lɛ amralo yɛ Yuda lɛ dɛŋ;

¹⁵ ni efã Sheshbazar koni ekɛ nibii nɛɛ aya ni ekɛyawo Sɔlemɔtsu lɛ ni yɔɔ Yerusalɛm lɛ mli koni ehã asaa ama Nyɔŋmɔ We lɛ yɛ eshimaahe lɛ.

¹⁶ Kɛkɛ ni nɛkɛ Sheshbazar nɛɛ ba ni ebato Nyɔŋmɔ We lɛ ni yɔɔ Yerusalɛm lɛ shishi. Kɛjɛ nakai be lɛ mli aahu kɛbashi amrɔ nɛɛ akã he aama, shi agbeko naa lolo.’

¹⁷ No hewɔ lɛ, kɛji esa Maŋtsɛ hiɛ lɛ, no lɛ ehã atao yɛ he ni akɛ saji ni aŋmala ashwie shi lɛ toɔ, yɛ Babilon lɛ, akɛ eyɛ mli akɛ Maŋtsɛ Koresh ewo akpɔ akɛ ayama nɛkɛ Nyɔŋmɔ We nɛɛ ekoŋŋ yɛ Yerusalɛm lo, koni Maŋtsɛ atsu ni abakɛɛ wɔ nɔ ni esumɔɔ ni afee yɛ sane nɛɛ he.”