Ezra 4 - ŊMALƐ KRƆŊKRƆŊ LƐ

Atsi Sɔlemɔtsu lɛ maa naa

¹ Agbɛnɛ be ni Yuda kɛ Benyamin henyɛlɔi lɛ nu akɛ mɛi ni jɛ nomŋɔɔ mli ba lɛ miima Sɔlemɔtsu amɛha Yehowa, Israel Nyɔŋmɔ lɛ,

² amɛba Zerubabel kɛ tsɛmɛi awei lɛ onukpai lɛ aŋɔɔ, ni amɛbakɛɛ amɛ akɛ, “Nyɛhãa wɔkɛ nyɛ amãa; ejaakɛ nyɛ Nyɔŋmɔ ni nyɛjaa lɛ nɔŋŋ wɔ hu wɔjaa, ni lɛ nɔŋŋ wɔshãa afɔle wɔhãa kɛjɛ Esar-Hadon Asiria maŋtsɛ lɛ, ni ŋɔ wɔ kɛba biɛ lɛ yinɔ.”

³ Shi Zerubabel kɛ Yeshua kɛ Israel tsɛmɛi awei lɛ onukpai ni eshwɛ lɛ kɛɛ amɛ akɛ, “Kɛ wɔmiima shĩa wɔhã wɔNyɔŋmɔ lɛ, jeee wɔkɛ nyɛ sane ni; shi wɔ sɔŋŋ wɔɔɔma wɔhã Yehowa, Israel Nyɔŋmɔ lɛ, tamɔ bɔ ni maŋtsɛ Koresh, Persia maŋtsɛ lɛ ewo wɔ kitã lɛ.”

⁴ Kɛkɛ ni mɛi ni eba ebahi shi yɛ shikpɔŋ lɛ nɔ lɛ tao akɛ amɛhã Yudafoi lɛ anijiaŋ aje wui ni amɛwo Yudafoi lɛ ahe gbeyei koni amɛkama shĩa lɛ.

⁵ Amɛbɔ amralofoi apaa amɛwo Yudafoi lɛ koni amɛhã Yudafoi lɛ ayiŋtoo lɛ afee efolo kɛjɛ Koresh, Persia maŋtsɛ lɛ, be mli aahu kɛyashi Dario, Persia maŋtsɛ lɛ, yinɔ.

⁶ Be mli ni Ahashwerosh bɔ̃i maŋtsɛyeli lɛ, gbɔmɛi nɛɛ ŋmãa wolo kɛyafolɔɔ mɛi ni yɔɔ Yuda kɛ Yerusalɛm lɛ anaa.

⁷ Asaŋ Artashasta yinɔ lɛ Bislam kɛ Mitredat kɛ Tabeel kɛ enanemɛi ni eshwɛ lɛ ŋmã wolo yahã Artashasta, Persia maŋtsɛ lɛ. Aŋmã wolo lɛ yɛ Siriabii aniŋmãa mli, ni atsɔ̃ɔ shishi hu yɛ Siria wiemɔ mli.

⁸ Rehum, ajinafoiatsɛ lɛ, kɛ Shimshai, woloŋmalɔ lɛ ŋma Yerusalɛm he wolo amɛyahã maŋtsɛ Artashasta akɛ,

⁹ “Mɛi ni ŋmã wolo nɛɛ ji Rehum, ajinafoiatsɛ lɛ, kɛ Shimshai, woloŋmalɔ lɛ, kɛ mɛi fɛɛ ni fata amɛhe kɛtsuɔ nii lɛ kɛ, kojolɔi lɛ kɛ shikpɔŋ mlijai anɔyelɔi kɛ tsujinukpai kɛ mɛi ni jɛ Erek kɛ Babilon kɛ Susa, ni ji Elambii lɛ,

¹⁰ kɛ mɛi krokomɛi ni eshwɛ ni Osnapar gbɔmɔ wulu ni yɔɔ gbɛi lɛ loo amɛ ebato Samaria maji lɛ amli kɛ hei krokomɛi ni yɔɔ Eufrate Faa lɛ anaigbɛ biɛgbɛ lɛ.”

¹¹ Wolo lɛ mli sane nɛ, “Aaŋmã wolo nɛɛ ayahã maŋtsɛ Artashasta. Maŋtsɛ Artashasta tsuji ni yɔɔ Eufrate Faa lɛ anaigbɛ lɛ adɛŋ wolo nɛɛ jɛ.

¹² Wɔmiitao ni Maŋtsɛ ana ale akɛ Yudafoi lɛ ni jɛ oŋɔɔ ba wɔŋɔɔ nɛɛ ebahe shi yɛ Yerusalɛm, ni amɛmiito atuatselɔi amaŋ fɔŋ lɛ ekoŋŋ. Amɛtswa ehe gbogboi lɛ amɛgbe naa etã, ni amɛmiisaa eshishitoo lɛ hu.

¹³ Shi belɛ, Maŋtsɛ ana ale akɛ kɛji ato nɛkɛ maŋ nɛɛ ekoŋŋ ni agbe ehe gbogboi lɛ anaa lɛ, no lɛ maŋbii lɛ woŋ onia kɛ maŋ too kɛ gbɛjee too lɛ dɔŋŋ, ni be ni yi yaawula shi lɛ, ebaaye maŋtsɛ fotro lɛ awui.

¹⁴ No hewɔ lɛ, akɛni Nii dɛŋ nii wɔyeɔ hewɔ lɛ, esaaa akɛ wɔɔɔkwɛ ni Maŋtsɛ he guɔ agbo; ni no hewɔ wɔtsu koni abatswa Maŋtsɛ adafi nɛɛ,

¹⁵ koni atao yɛ otsɛmɛi awolo ni aŋmã nibii ni eba awo mli afɔ̃ shi lɛ mli. Kɛji akwɛ wolo nɛɛ mli lɛ, abaana yɛ mli akɛ nɛkɛ maŋ nɛɛ atuatselɔi amaŋ ni. Amɛwoɔ maŋtsɛmɛi kɛ shikpɔŋ mlijai anɔyelɔi anaagba; ni kɛjɛ teteete lɛ, mɛi ayiŋ amɛwoɔ koni atse atua. Enɛ nɔŋŋ hewɔ ajwa maŋ nɛɛ.

¹⁶ Wɔmiihã Maŋtsɛ ale akɛ kɛji ato nɛkɛ maŋ nɛɛ ekoŋŋ, ni atswa ehe gbogboi lɛ, no lɛ, bo Nii, onaŋ nɔyeli he ko yɛ Eufrate Faa lɛ anaigbɛ nɛɛ dɔŋŋ.”

¹⁷ Maŋtsɛ lɛ tsu akɛ hetoo ba akɛ, “Miiŋma wolo nɛɛ mayahã Rehum, ajinafoiatsɛ lɛ, kɛ Shimshai, woloŋmalɔ lɛ, kɛ amɛhefatalɔi ni eshwɛ ni yɔɔ Samaria kɛ hei krokomɛi yɛ Eufrate Faa lɛ anaigbɛ biɛ lɛ, miiŋa nyɛ.

¹⁸ “Wolo ni nyɛkɛtsu akɛbahã wɔ lɛ, akane shishitsɔɔmɔ atsɔ̃ɔ mi.

¹⁹ Mifã ni atao mli; ni ana akɛ kɛjɛ teteete lɛ maŋ nɛɛ teɔ shi ewoɔ maŋtsɛmɛi lɛ; atseɔ atua, yɛ mli, ni awoɔ mɛi ayiŋ yɛ nɔyelɔi lɛ ahe.

²⁰ Asaŋ maŋtsɛmɛi wuji hu ehi Yerusalɛm ni amɛye Eufrate Faa lɛ biɛgbɛ shikpɔŋ lɛ fɛɛ nɔ, ni atsuɔ onia kɛ maŋ too kɛ gbɛjee shika ahãa amɛ.

²¹ No hewɔ lɛ, nyɛwoa akpɔ koni nɛkɛ gbɔmɛi nɛɛ afɔ̃ɔ maŋ lɛ too, kɛyashi beyinɔ ni akpɔ aaajɛ miŋɔɔ aba.

²² Nyɛkɛ sane nɛɛ akashashaoa shi, koni nibii akabafite waa wo mi.”

²³ Be ni akane Maŋtsɛ Artashasta wolo ni eŋmã lɛ yɛ Rehum kɛ Shimshai, woloŋmalɔ lɛ, kɛ mɛi ni fata amɛhe kɛtsuɔ nii lɛ ahiɛ lɛ, amɛyiŋ kɛba Yerusalɛm oya, ni amɛbanina Yudafoi lɛ. Amɛkɛ hewalɛ kɛ nɔnyɛɛ tsi Yudafoi lɛ anaa.

Abɔ̃i Sɔlemɔtsu lɛ maa ekoŋŋ

²⁴ Kɛkɛ ni afɔ̃ɔ Nyɔŋmɔ We lɛ ni yɔɔ Yerusalɛm lɛ he nitsumɔ; ni ekã shi nakai kɛyashi Maŋtsɛ Dario, Persia maŋtsɛyeli afi ni ji enyɔ lɛ nɔ.