Ezra 1 - ŊMALƐ KRƆŊKRƆŊ LƐ

Koresh fã Yudafoi lɛ ni amɛku amɛsɛɛ kɛya amɛshikpɔŋ nɔ

¹ Koresh, Persia maŋtsɛ lɛ, yinɔ klɛŋklɛŋ afi lɛ nɔ lɛ, bɔ ni afee ni Yehowa wiemɔ ni ewie kɛtsɔ̃ Yeremia nɔ lɛ aba mli hewɔ lɛ, Yehowa kanya Koresh yɛ mumɔ mli, ni ehã aŋmã, ni ashiɛ yɛ emaŋtsɛyeli lɛ mli he fɛɛ he akɛ,

² “Bɔ ni Koresh, Persia maŋtsɛ lɛ, kɛɛ nɛ, ‘Yehowa ŋwɛi Nyɔŋmɔ lɛ etu shikpɔŋ lɛ nɔ maŋtsɛyelii fɛɛ ewo midɛŋ, ni efã mi akɛ miyama shĩa mihã lɛ yɛ Yerusalɛm yɛ Yuda shikpɔŋ lɛ nɔ.

³ Yehowa webii ni yɔɔ nyɛteŋ lɛ, Yehowa efã amɛteŋ mɔ fɛɛ mɔ koni efã kɛya Yerusalɛm yɛ Yuda, koni ayama Yehowa, Israel Nyɔŋmɔ lɛ, shĩa lɛ; lɛ Nyɔŋmɔ mɔ ni ajaa yɛ Yerusalɛm lɛ, we lɛ.

⁴ Mɔ fɛɛ mɔ ni eshwɛ yɛ nomii lɛ ateŋ lɛ, he fɛɛ he ni eyato gbɔ yɛ lɛ, jɛmɛbii lɛ aye abua lɛ kɛ jwiɛtɛi kɛ shika kɛ nibiinibii kɛ kooloi. Asaŋ amɛhã nikeenii yɛ tsuijurɔ naa yɛ Nyɔŋmɔ shĩa ni yɔɔ Yerusalɛm lɛ hewɔ.’ ”

⁵ Kɛkɛ ni Yuda kɛ Benyamin wekui lɛ ayitsei kɛ osɔfoi lɛ kɛ Levibii lɛ, mɛi fɛɛ ni Nyɔŋmɔ kanya amɛ yɛ mumɔ mli lɛ, fã koni amɛya ni amɛyasaa Yehowa shĩa lɛ ni yɔɔ Yerusalɛm lɛ amɛma.

⁶ Mɛi ni kɛ amɛ je shwieka lɛ fɛɛ wa amɛ kɛ jwiɛtɛi okpolui pɛmpɛbii kɛ shika kɛ nibiinibii kɛ kooloi kɛ nibii ni jara wa; ni asaŋ amɛhã nikeenii yɛ tsuijurɔ naa.

⁷ Yehowa we lɛ okpolui kɛ kpuji ni Nebukadnezar yaloo kɛjɛ Yerusalɛm kɛba ekɛbawo ejemawɔŋ lɛ we lɛ, Maŋtsɛ Koresh jie amɛ kpo.

⁸ Maŋtsɛ Koresh tu nibii nɛɛ ewo Mitredat, shikatolɔ lɛ dɛŋ; ni Mitredat kane ni eŋmala ewo wolo mli ehã Sheshbazar, Yuda lumɔ lɛ.

⁹ Nibii nɛɛ ayibɔ nɛ: shika okpolui nyɔŋmai etɛ̃, jwiɛtɛi okpolui akpe, ŋɛsui nyɔŋmai enyɔ kɛ nɛɛhu,

¹⁰ shika kpuji nyɔŋmai etɛ̃, jwiɛtɛi kpuji ohai ejwɛ kɛ nyɔŋma, kɛ kpuji krokomɛi akpe.

¹¹ Nibii lɛ fɛɛ, shikanii kɛ jwiɛtɛinii lɛ, feɔ akpei enumɔ kɛ ohai ejwɛ. Nibii nɛɛ fɛɛ lɛ, Sheshbazar ji mɔ ni kɛba be ni akɛ mɛi ni aŋɔ amɛ nom lɛ jɛ Babilon kɛba Yerusalɛm lɛ.