Ezekiel 8 - ŊMALƐ KRƆŊKRƆŊ LƐ

GBALƆ EZEKIEL NINAA NI JI ENYƆ YƐ NYƆŊMƆ HE ( 8.1—10.22 ) Amãgãjamɔ yɛ Yerusalɛm

¹ Israelbii anomŋɔɔ afi ni ji ekpaa lɛ nɔ, nyɔŋ ni ji ekpaa lɛ nɔ, gbi ni ji enumɔ lɛ nɔ lɛ, be ni mita miwe lɛ, ni Yuda onukpai lɛ tara mihiɛ lɛ, Nuŋtsɔ Yehowa hewalɛ yi minɔ yɛ jɛi.

² Mikwɛ, ni naa, mina nɔ ko ni tamɔ gbɔmɔ. Kɛjɛ ehɛgbɛ kɛbaa eshishigbɛ su lɛ anaa lɛ tamɔ la; ni kɛjɛ ehɛgbɛ kɛyaa ŋwɛigbɛ su lɛ kpɛlɛɔ tamɔ akɔɔble ni asha he.

³ Ekpã nɔ ko ni esu tamɔ nine mli ni ekɛmɔ̃ miyiteŋ tsɔi ni efi tɔo lɛ mli. Mumɔ lɛ wo minɔ kɛtee shikpɔŋ kɛ ŋwɛi teŋ, ni ekɛ mi tee Yerusalɛm yɛ Nyɔŋmɔ he ninai lɛ amli. Ekɛ mi ba mligbɛ kpo lɛ nɔ agbo ni kwɛɔ kooyigbɛ shinaa lɛ naa, he ni amãgã ni hãa Nyɔŋmɔ yeɔ awuŋã lɛ ma lɛ.

⁴ Ni naa, Israel Nyɔŋmɔ lɛ anunyam lɛ kpɛ yɛ jɛi tamɔ ninaa ni mina yɛ Kebar Faa lɛ naa lɛ.

⁵ Kɛkɛ ni ekɛɛ mi akɛ, “Gbɔmɔ Adesa, wo ohiɛ nɔ ni okwɛ kooyigbɛ.” Ni miwo mihiɛ nɔ mikwɛ kooyigbɛ lɛ, ni naa, afɔleshãa latɛ ni yɔɔ kooyigbɛ agbo lɛ naa lɛ, nakai amãgã lɛ ni haa Nyɔŋmɔ yeɔ awuŋã lɛ ma jɛi.

⁶ Nyɔŋmɔ kɛɛ mi akɛ, “Gbɔmɔ Adesa, oona nɔ ni amɛfeɔ lɛ? Musubɔɔnii wuji ni Israelbii lɛ feɔ yɛ biɛ bɔ ni afee ni maje mihe krɔŋkrɔŋ lɛ kɛya sɛɛ shɔŋŋ. Osaa ooona musubɔɔnii wuji krokomɛi ni fe enɛ.”

⁷ Ekɛ mi ba kpo lɛ nɔ shinaa lɛ naa, ni be ni mikwɛ lɛ mina folɔ ko yɛ gbogbo lɛ mli.

⁸ Agbɛnɛ ekɛɛ mi akɛ, “Gbɔmɔ Adesa, gbuu gbogbo lɛ mli.” Ni be ni migbu gbogbo lɛ mli lɛ mina shinaa ko.

⁹ Ekɛɛ mi akɛ, “Botemɔ mli ni oyakwɛ nɔ musubɔɔnii ni amɛfeɔ yɛ biɛ.”

¹⁰ No hewɔ lɛ, mibote mli ni miyakwɛ; ni mina akɛ atɛŋ waamɔnii kɛ kooloi ni ahiɔ srɔtoi abɔ, kɛ Israel we lɛ wɔji lɛ fɛɛ amɛfonirii yɛ gbogbo lɛ he kɛbɔle kɛkpe.

¹¹ Ni Israel we lɛ mli hii onukpai nyɔŋmai kpawo damɔ wɔji lɛ ahiɛ, ni Shafan bi Yaazania damɔ amɛteŋ. Mɔ fɛɛ mɔ hiɛ etsofakɛŋmashaa ŋɛsu yɛ edɛŋ, ni tsofakɛŋma ni ashãa lɛ lasu lɛ teɔ shi kɛyaa ŋwɛi tamɔ atatu.

¹² Agbɛnɛ ekɛɛ mi akɛ, “Gbɔmɔ Adesa, oona nɔ ni Israel we lɛ onukpai lɛ feɔ yɛ dujiaŋ akɛ mɔ fɛɛ mɔ miija amãgãi yɛ esɛɛtsu mli lo? Nɔ ni amɛkɛɔ ji akɛ, ‘Yehowa enaaa wɔ. Yehowa ekwa shikpɔŋ lɛ.’ ”

¹³ Ekɛɛ mi ekoŋŋ akɛ, “Osaa ooona musubɔɔnii krokomɛi ni fe enɛ ni amɛfeɔ.”

¹⁴ Agbɛnɛ ekɛ mi ba Yehowa shĩa lɛ agbo lɛ shinaa ni yɔɔ kooyigbɛ lɛ naa; ni naa, yei tara jɛi ni amɛmiifo jemawɔŋ Tamuz.

¹⁵ Kɛkɛ ni ekɛɛ mi akɛ, “Gbɔmɔ Adesa, ona enɛ? Osaa ooona musubɔɔnii wuji ni fe enɛɛmɛi.”

¹⁶ Agbɛnɛ ekɛ mi ba Yehowa we lɛ mligbɛ kpo lɛ nɔ; ni naa, yɛ Yehowa Sɔlemɔ we lɛ shinaa lɛ naa yɛ koi lɛ kɛ afɔleshãa latɛ lɛ teŋ lɛ, hii aaafee nyɔŋmai enyɔ kɛ enumɔ yɛ jɛi, ni amɛtsɔmɔ amɛsɛɛ amɛhã Yehowa Sɔlemɔ we lɛ, be mli ni amɛhiɛiaŋ miikwɛ bokãgbɛ lɛ, amɛmiija hulu yɛ bokãgbɛ lɛ.

¹⁷ Kɛkɛ ni ekɛɛ mi akɛ, “Gbɔmɔ Adesa, ona enɛ? Ani nihiinii ni Yuda we lɛ feɔ yɛ biɛ nɛɛ lɛ efaaa ehãaa amɛ lo? Ni amɛhã yiwalɛ eyi shikpɔŋ lɛ nɔ obɔ̃ tɔ kɛmiiwo mimli la amɛfata he nɛɛ lo? Naa, amɛmaa mi gɔnti amɛjɛɔ mi.

¹⁸ No hewɔ lɛ, mikɛ amɛ baaye kɛ joomɔ yɛ mimlifu lɛ naa. Mihaŋ amɛŋɔ amɛhe amɛye; minaŋ amɛ mɔbɔ. Amɛaabolɔ amɛwo mitoiŋ kɛ gbee ni wa shi miboŋ amɛ toi.”