Ezekiel 4 - ŊMALƐ KRƆŊKRƆŊ LƐ

Ezekiel fee ehe tamɔ Yerusalɛm tualɔ

¹ Ni Nyɔŋmɔ kɛɛ akɛ, “Gbɔmɔ adesa, kɔ ntayaa ni okɛfɔ ohiɛ, ni otɛŋ Yerusalɛm maŋ lɛ yɛ nɔ.

² Tɛŋmɔ nibii nɛɛ kɛbɔle maŋ lɛ he kɛkpe: kawoo gbogbo kɛ mɔji kɛ kpoku kɛ tabilɔi ni baatua maŋ lɛ, kɛ gbogbokuumɔ nibii ni mamɔ he.

³ Okɛ dade ni atswia lɛ tɛtɛrɛɛ afee gbogbo koni efo bo okɛ maŋ lɛ teŋ; ni ojie ohiɛ oka lɛ. Ŋɔɔ lɛ akɛ atua maŋ lɛ, ni bo otuaa maŋ lɛ nɛɛ. Enɛ ji okadi hã Israelbii lɛ.

⁴ “Agbɛnɛ kã obɛku nɔ, ni okɛ Israelbii lɛ atɔ̃mɔ lɛ aŋmɛ onɔ ni gbii abɔ ni okã obɛku nɔ lɛ obaatere amɛtɔmɔ lɛ.

⁵ Miiŋɔ amɛ afii ohai etɛ̃ kɛ nyɔŋmai nɛɛhu toigbalamɔ be lɛ mafee gbii ohai etɛ̃ kɛ nyɔŋmai nɛɛhu mahã bo. Nɛkɛ be nɛɛ fɛɛ lɛ obaatere Israelbii lɛ atɔ̃mɔ lɛ.

⁶ Kɛ ogbe nakai gbii lɛ anaa lɛ, obaakã shi ekoŋŋ, nɔ ni ji shii enyɔ, agbɛnɛ lɛ kã oninejurɔ nɔ, ni okɛtere Yuda we lɛ tɔ̃mɔ lɛ. Mihao gbii nyɔŋmai ejwɛ ni okɛkã shi, ni gbi kome lɛ afi ni.

⁷ “Jiemɔ ohiɛ oka Yerusalɛm maŋ lɛ; ni ojie onine he efolo koni ogba oshi lɛ.

⁸ Mikɛ kpãi baafimɔ bo akpɛtɛ shi, ni onyɛŋ ohe otsɔ̃ kɛjɛ abɛku nɔ kɛya ninejurɔ nɔ kɛyashi be ni ooogbe okawoo gbii lɛ anaa dã.

⁹ “Agbɛnɛ, ŋɔɔ ŋmãa kɛ akoko kɛ akpatramɔ kɛ yɔɔ kɛ blɔfoakoko kɛ abele, ni okɛwo nɔ kome mli, ni okɛshã aboloo ohã ohe. Ye aboloo nɛɛ be ni okã obɛku nɔ gbii ohai etɛ̃ kɛ nyɔŋmai nɛɛhu lɛ.

¹⁰ Oniyenii ni obaaye lɛ ŋmɛɛ kiloi nyɔŋmai enyɔ gbi kome; ye nii shi kome daa gbi.

¹¹ Ni nu hu ni obaanu lɛ susumɔ kpuji enyɔ; nuu nu shi kome daa gbi.

¹² Ni okɛ gbɔmɔ wamɔ afee lai ni okɛshã akoko aboloo lɛ, ni oye yɛ amɛhiɛ.”

¹³ Kɛkɛ ni Yehowa kɛɛ akɛ, “Nakai pɛ Israelbii lɛ baaye amɛniyenii ni amɛhiɔ lɛ yɛ majimaji lɛ ateŋ hei, ni mashwie amɛ kɛya lɛ.”

¹⁴ Kɛkɛ ni mikɛɛ akɛ, “Ao, Nuŋtsɔ Yehowa, mibuleko mihe dã, kɛjɛ miblahiaŋ aahu kɛbashi amrɔ nɛɛ lɛ. Miyeko nɔ ko ni lɛ diɛŋtsɛ egbo loo kooloo ko tserɛ lɛ dã. Asaŋ hu loo ko ni ahiɔ esako minaa dã.

¹⁵ Ni Yehowa kɛɛ mi akɛ, “Kwɛ, mahã okɛ tsina wamɔ ashã oboloo lɛ yɛ gbɔmɔ wamɔ najiaŋ.”

¹⁶ Esaa ekɛɛ mi akɛ, “Gbɔmɔ Adesa, naa, mahã niyenii he asɛ̃ yɛ Yerusalɛm, ni amɛkɛ tsuiyeli baaŋmɛ aboloo amɛye, ni amɛkɛ hejaramɔ baasusu nu amɛnu.

¹⁷ Mafee enɛ koni aboloo kɛ nu he ahia amɛ, ni amɛbaakwɛkwɛɛ amɛhe kɛ hejɔ̃mɔ, ni amɛaatãra loo yɛ amɛtoigbalamɔ mli.”