Ezekiel 3 - ŊMALƐ KRƆŊKRƆŊ LƐ

¹ Kɛkɛ ni gbee lɛ kɛɛ mi akɛ, “Gbɔmɔ adesa, nɔ ni akɛhã bo lɛ ye; ye wolokpo nɛɛ, ni oya ni okɛ Israel we lɛ ayawie.”

² Kɛkɛ ni migbɛ midaaŋ, ni ekɛ wolokpo lɛ hã mi ni maye.

³ Ekɛɛ mi akɛ, “Gbɔmɔ adesa, ye wolokpo ni mikɛhã bo lɛ; ye, ni okɛwo omusu obɔ̃ tɔ.” Kɛkɛ ni miye; ni eŋɔɔ yɛ midaaŋ tamɔ wo.

⁴ Kɛkɛ ni ekɛɛ mi akɛ, “Gbɔmɔ adesa, yiŋ ni oya Israelbii lɛ aŋɔɔ ni okɛ miwiemɔ lɛ ayahã amɛ;

⁵ ejaakɛ mɛi aŋɔɔ ni mitsuɔ bo lɛ, amɛjeee mɛi ni wieɔ maŋsɛɛ wiemɔ ko ni wa; shi moŋ miitsu bo Israelbii aŋɔɔ.

⁶ Amɛjeee majimaji babaoo ni wieɔ maŋsɛɛ wiemɔ ni wa, ni onuuu shishi. Anɔkwa, kɛji nakai gbɔmɛi aŋɔɔ tete po mitsu bo lɛ, amɛaabo bo toi.

⁷ Shi Israel we lɛ boŋ bo toi, ejaakɛ amɛsumɔ̃ɔɔ akɛ amɛboɔ mi toi; ejaakɛ Israelbii lɛ akuɛŋ ti ni amɛtsui hu wa.

⁸ Naa, mihã ohiɛ etsii hu fe amɛhiɛ, ni ohiɛ hu ewa fe amɛhiɛ.

⁹ Bɔ ni daiamɔnd wa fe tswɛrɛbo lɛ, nakai mihã ohiɛ ewa fe amɛhiɛ. Kaashe amɛ gbeyei, ni kaahã hiŋmɛi ni amɛkɛbaakwɛ bo lɛ miihao bo; ejaakɛ atuatselɔi amaŋ ni.”

¹⁰ Gbee lɛ saa ekɛɛ mi ekoŋŋ akɛ, “Gbɔmɔ adesa, bo miwiemɔi fɛɛ ni mikɛ bo wieɔ lɛ toi, ni okɛto otsuiŋ.

¹¹ Agbɛnɛ yi mli ni oya omaŋbii ni yɔɔ nomŋɔɔ mli lɛ aŋɔɔ, ni oyakɛɛ amɛ akɛ, ‘Nɔ ni Nuŋtsɔ Yehowa kɛɛ nɛ. Amɛbo bo toi jio, amɛbooo bo toi jio bo lɛ okɛɛ amɛ.’ ”

¹² Agbɛnɛ lɛ Mumɔ lɛ wo mi, ni minu gbee kpeteŋkple ko gbɛɛmɔ yɛ misɛɛgbɛ tamɔ shikpɔŋ hosomɔ, ni gbee lɛ kɛɛ, “Jiemɔ miijie Yehowa ni yɔɔ ŋwɛi lɛ anunyam lɛ yi yɛ eshihilɛhe lɛ.”

¹³ Nibii ni hiɛ gbɔmɔ su lɛ afiji ni saa eko kɛ eko he lɛ agbɛɛmɔ kɛ kokolontoi ni yɔɔ amɛŋmawuiaŋ lɛ amli gbɛɛmɔ lɛ hu tamɔ shikpɔŋ hosomɔ kpeteŋkple.

¹⁴ Yehowa hewalɛ lɛ ba minɔ, ni ewo mi kɛtee. Mitee kɛ mlila ni naawa naakpa.

¹⁵ Kɛkɛ ni miba nomii ni yɔɔ Kebar Faa lɛ naa yɛ Tel-Abib lɛ aŋɔɔ; ni miho mita shi yɛ amɛteŋ, ni minaa ekpɛ mihe gbii kpawo sɔŋŋ.

Yehowa to Ezekiel bulɔ

¹⁶ Gbii kpawo lɛ sɛɛ lɛ Yehowa kɛ mi wie ni ekɛɛ mi akɛ,

¹⁷ “Gbɔmɔ Adesa, mito bo bulɔ mihã Israel we lɛ; ni be fɛɛ be ni ooonu minaa wiemɔ lɛ, obɔ amɛ kɔkɔ ohã mi.

¹⁸ “Kɛji mikɛɛ efɔŋfeelɔ akɛ, gbo ooogbo, ni obɔɔɔ lɛ kɔkɔ, ni osaa owieee otsɔ̃ɔɔ efɔŋfeelɔ lɛ ni eje egbɛ fɔŋ lɛ nɔ, koni ehere eyiwala lɛ, nakai efɔŋfeelɔ lɛ baagbo yɛ ehe esha lɛ hewɔ, shi elá lɛ, bo odɛ̃ŋ mabi shi yɛ.

¹⁹ Shi kɛji obɔ efɔŋfeelɔ lɛ kɔkɔ, ni ekpaaa efɔŋ lɛ feemɔ, ni ejeee egbɛ fɔŋ lɛ nɔ lɛ, ebaagbo yɛ ehe esha lɛ mli nɛ, shi bo lɛ ohere oyiwala.

²⁰ “Miikɛ bo ekoŋŋ akɛ, kɛji mɔ ni feɔ nɔ ni ja kpa ejalɛ nifeemɔi lɛ, ni efee nɔ ni ejaaa lɛ, ni mito lɛ pampi lɛ, ebaagbo; ejaakɛ obɔɔɔ lɛ kɔkɔ; no hewɔ lɛ, ebaagbo yɛ ehe esha lɛ hewɔ, ni ejalɛ nii ni efee pɛŋ lɛ akaiŋ; shi elá lɛ, bo odɛ̃ŋ mabi shi yɛ.

²¹ “Shi kɛ̃lɛ, kɛji obɔ mɔ ni feɔ jalɛ nii lɛ kɔkɔ koni ekafee esha, ni efeee esha lɛ, no lɛ eyi baana wala ejaakɛ ebo kɔkɔbɔɔ toi, ni bo hu ohere oyiwala.”

Ezekiel baatɔ mu

²² Kɛkɛ ni Yehowa hewalɛ lɛ ba minɔ, ni ekɛɛ mi akɛ, “Tee shi ni oya jɔɔ lɛ mli, ni jɛi mikɛ bo aya wie yɛ.”

²³ Hewɔ lɛ mite shi ni mitee jɔɔ lɛ mli, ni naa, Yehowa anunyam lɛ ni tamɔ anunyam ni mina yɛ Kebar Faa lɛ naa lɛ yɛ jɛi. Kɛkɛ ni miho migbee shi ni mikɛ mihiɛ bu shi.

²⁴ Shi Mumɔ lɛ babote mimli ni ewo minɔ edamɔ shi, ni ekɛ mi wie, ni ekɛɛ mi akɛ, “Yaa ni oyaŋa oyi owo owe lɛ.

²⁵ Ni bo, gbɔmɔ adesa naa, akɛ kpãi baashwie onɔ ni akɛfi bo, koni okanyɛ oje kpo otee mɛi ateŋ.

²⁶ Asaŋ mahã olilɛi akpɛtɛ odaaŋ, ni otɔ mu bɔ ni afee ni okanyɛ okã amɛ; tsɛbelɛ toigbolɔi amaŋbii ji amɛ.

²⁷ Shi kɛji mikɛ bo bawie ekoŋŋ lɛ, magbele onaa ni okɛɛ amɛ akɛ, ‘Bɔ ni Nuŋtsɔ Nyɔŋmɔ kɛɛ nɛ: Mɔ ni sumɔ akɛ enu lɛ, ebo toi, ni mɔ ni sumɔɔɔ akɛ enu lɛ, ekabo toi; ejaakɛ toigbolɔi amaŋbii ji amɛ.’ ”