Ezekiel 2 - ŊMALƐ KRƆŊKRƆŊ LƐ

Nyɔŋmɔ tsɛ Ezekiel koni efe gbalɔ

¹ Ni be ni mina enɛ lɛ miho migbee shi, ni mikɛ mihiɛ bu shi, kɛkɛ ni minu mɔ ko gbee ni miiwie akɛ, “Gbɔmɔ Adesa, tee shi odamɔ shi, mikɛ bo baawie.”

² Be ni ekɛ mi wie lɛ, Nyɔŋmɔ Mumɔ lɛ bote mimli, ni ewo minɔ edamɔ shi, ni minu ni ekɛ mi miiwie. Ekɛɛ mi akɛ,

³ “Gbɔmɔ adesa, miitsu bo Israelbii, ni ji maŋ atuatselɔi ni etse mihiɛ atua lɛ, aŋɔɔ. Amɛ kɛ amɛtsɛmɛi lɛ etɔ̃ minɔ kɛbashi ŋmɛnɛ gbi nɛɛ.

⁴ Maŋbii lɛ akuɛŋ ti, ni amɛbuuu mi hu. Miitsu bo amɛŋɔɔ ni oyakɛɛ amɛ akɛ, ‘Bɔ ni mi, Nuŋtsɔ Yehowa, mikɛɛ nɛ;

⁵ ni akɛni toigbolɔi ji amɛ nɛɛ, amɛbo toi jio, amɛbooo toi jio, amɛaana amɛle kɛ̃ akɛ gbalɔ ko ebahi amɛteŋ.’

⁶ ‘Ni bo, gbɔmɔ adesa, kaashe amɛ gbeyei, ni kaashe amɛwiemɔi lɛ hu gbeyei. Eyɛ mli akɛ oyɛ ŋmei kɛ kpitikpitii ateŋ, ni ota nyɔŋmɔŋkrakroi anɔ moŋ nɛ, shi kɛ̃lɛ, kaashe amɛdaaŋ wiemɔi gbeyei ni kaahã hiŋmɛi ni amɛkɛbaakwɛ bo lɛ miihao bo; ejaakɛ atuatselɔi amaŋ ni.

⁷ Bo lɛ ŋɔɔ miwiemɔ lɛ ohã amɛ; amɛbo toi jio, amɛbooo toi jio, na ole akɛ toigbolɔi ji amɛ.’ ”

⁸ “Shi, bo gbɔmɔ adesa, bo nɔ ni mikɛɔ bo lɛ toi; kaafee ohe toigbolɔ tamɔ nakai toigbolɔi amaŋbii lɛ; gbɛɛ odaaŋ ni oye nɔ ni mikɛhãa bo nɛɛ.”

⁹ Ni be ni mikwɛ lɛ mina nine ni akpã mli ni hiɛ wolokpo ni aŋma nii yɛ mli ni akɛmiihã mi.

¹⁰ Egbele mli elɛɛ shi yɛ mihiɛ. Aŋma nii yɛ ehiɛ kɛ esɛɛ fɛɛ; ni aŋma yaafo kɛ awerɛho kɛ ŋkɔmɔyeli wiemɔi yɛ mli.