Ezekiel 12 - ŊMALƐ KRƆŊKRƆŊ LƐ

Gbalɔ lɛ yaba abo

¹ Yehowa kɛ mi wie akɛ,

² “Gbɔmɔ Adesa, mɛi ni toi egbo ateŋ oyɔɔ lɛ; shi amɛyɛ hiŋmɛii, shi amɛnaaa nii; amɛyɛ toii hu shi amɛnuuu nii, ejaakɛ maŋ ni toi egbo ji amɛ.”

³ No hewɔ lɛ, gbɔmɔ adesa, too onibii tamɔ mɔ ni aŋɔ lɛ nom, koni ofã shwane be ni amɛmiikwɛ bo. Jee he ni oyɔɔ lɛ kɛya he kroko ni amɛmiikwɛ bo. Eko lɛ amɛaakɔ nɔ ni ofeɔ lɛ sɛɛ, tsɛ, gbɔmɛi toigbolɔi ji amɛ.

⁴ Okɛ onibii ni tamɔ nomŋɔɔ jatsu lɛ aje kpo shwane yɛ amɛhiɛ; shi yi mli gbɛkɛ yɛ amɛhiɛ tamɔ nɔ ni ooya nomŋɔɔ mli.

⁵ Gbuu gbogbo lɛ mli yɛ amɛhiɛ koni otsɔ̃ jɛi kɛje kpo yɛ amɛhiɛ.

⁶ Kɛji hiɛ bu lɛ, wo ogbɛfaa jatsu lɛ otswa okɔŋ yɛ amɛhiɛ ni okɛje kpo. Haa ohiɛ koni okana shikpɔŋ ni oyaa nɔ lɛ. Mikɛ bo miito okadi mahã Israel we lɛ.

⁷ Kɛkɛ ni mifee bɔ ni Yehowa fã mi lɛ. Mikɛ minibii lɛ je kpo shwane tamɔ mɔ ni aŋɔ lɛ nom, ni gbɛkɛ mli lɛ mi diɛŋtsɛ migbu gbogbo lɛ mli; ni be ni hiɛ bu lɛ miwo mijatsu lɛ mitswa mikɔŋ ni mije kpo yɛ amɛhiɛ.

⁸ Ni enɔ jetsɛremɔ leebi lɛ, Yehowa kɛ mi wie akɛ,

⁹ “Gbɔmɔ Adesa, ani Israel we lɛ, ni ji toigbolɔi awe lɛ, biko bo akɛ, ‘Mɛni ofeɔ nɛɛ lo?’

¹⁰ Kɛɛmɔ amɛ akɛ, bɔ ni Nuŋtsɔ Nyɔŋmɔ kɛɛ nɛ, nɔ ni ofee nɛɛ gbalɛ ni; ni ekɔɔ lumɔ ni yeɔ nɔ yɛ Yerusalɛm lɛ, kɛ Israel we lɛ mli bii fɛɛ ni yɔɔ jɛi lɛ ahe.

¹¹ Kɛɛmɔ akɛ, ‘Nɔ ni ofee nɛɛ ji okadi hã amɛ; bɔ ni ofee otsɔ̃ɔ amɛ lɛ, nakai abaafee amɛ; abaaŋɔ amɛ nom, ni amɛbaatsɔmɔ nomii.’

¹² Amɛteŋ lumɔ lɛ ni yeɔ nɔ lɛ, lɛ ebaawo ejatsu etswa ekɔŋ kɛje kpo be mli ni hiɛ ebu. Ebaatsɔ̃ gbogbo ni agbu aha lɛ mli kɛje kpo. Ebaaha ehiɛ, ni ekana shikpɔŋ lɛ he ni eyaa lɛ kɛ ehiŋmɛi.

¹³ “Maŋmɛ miyaa lɛ, ni eeedu lɛ tamɔ tsɔne, ni mikɛ lɛ baaba Babilon maŋ wulu lɛ mli. Shi jɛi shikpɔŋ lɛ tete ehiŋmɛi enaŋ, tsɛbelɛ jɛi nɔŋŋ eeegbo yɛ.

¹⁴ Mɛi fɛɛ ni ebɔle lɛ kɛkpe lɛ, kɛ eyelikɛbualɔi lɛ kɛ etabilɔi lɛ fɛɛ lɛ, magbɛ amɛ mashwã kɔɔyɔŋ yɛ jeŋ koji ejwɛ lɛ fɛɛ nɔ ni magbala klante kɛnyiɛ amɛsɛɛ.”

¹⁵ “Kɛji migbɛ amɛ mishwã majimaji kɛ shikpɔji lɛ anɔ lɛ no amɛkɛaale akɛ, mi mi ji Yehowa.

¹⁶ Shi kɛ̃lɛ mashi mɛi fioo ko ni amɛaaje klante kɛ hɔmɔ kɛ gbele hela gbele mli. Amɛaajaje nihiinii ni amɛfee lɛ fɛɛ amɛtsɔ̃ɔ yɛ majimaji ni amɛyaa mli lɛ anɔ, ni amɛaale akɛ mi, mi ji Yehowa.”

Gbalɔ ni miikpokpo lɛ

¹⁷ Yehowa saa ekɛ mi wie ekoŋŋ, ni ekɛɛ,

¹⁸ “Gbɔmɔ Adesa, ye nii; kɛji ooye lɛ, ha ohe akpokpo ni kɛji oonu nu lɛ, ha ohe ajo kɛ gbeyeishemɔ.

¹⁹ Kɛkɛ lɛ kɛɛmɔ shikpɔŋ lɛ nɔ bii lɛ akɛ, Bɔ ni Nuŋtsɔ Yehowa kɛɔ yɛ Yerusalɛmbii ni yɔɔ Israel shikpɔŋ lɛ nɔ lɛ ahe nɛ, amɛniyenii lɛ, tsuiyeli amɛkɛaaye, ni amɛnu lɛ hu, hejɔ̃mɔ amɛkɛaanu; ejaakɛ yiwalɛnii ni maŋ lɛ mli bii lɛ fɛɛ fee lɛ hewɔ lɛ, ahaŋ shikpɔŋ lɛ aba niyenii dɔŋŋ.

²⁰ Maji ni ahi mli dã lɛ fɛɛ baatsɔ̃ amaŋfɔ̃, ni shikpɔŋ lɛ hu aaatsɔ̃ shiaŋa, ni amɛkɛaale akɛ mi, mi ji Yehowa.”

Abɛi ni ale kɛ gbalɛ ni aleee

²¹ Yehowa kɛ mi wie, ni ekɛɛ,

²² “Gbɔmɔ Adesa, mɛni ji abɛ ni nyɛbuɔ yɛ Israel shikpɔŋ lɛ he akɛ, ‘Gbii miiho kɛmiiya, ni gbalɛ ko baaa mli lɛ?’

²³ No hewɔ lɛ, kɛɛmɔ amɛ akɛ, ‘Bɔ ni Nuŋtsɔ Yehowa kɛɛ nɛ, mibaha nɛkɛ abɛ ni abuɔ nɛɛ sɛɛ afo, ni abuŋ dɔŋŋ yɛ Israel.’ Shi moŋ kɛɛmɔ amɛ akɛ be ni eshɛ, ni gbalɛ fɛɛ gbalɛ baana aba mli.

²⁴ Ejaakɛ amale ninaa ko ejeŋ kpo dɔŋŋ, ni gbalɛ ni akɛlakaa mɔ ko hu baŋ mli dɔŋŋ yɛ Israel we lɛ.

²⁵ Shi mi, Yehowa, mibawie, ni wiemɔ ni mibawie lɛ baaba mli. Atsiŋ atoŋ dɔŋŋ. Ao! Nyɛ toigbolɔi awe, nyɛyinɔ nɛɛ mibawie, ni mibafee hu. Mi, Nuŋtsɔ Yehowa, mikɛɛ.”

²⁶ Yehowa kɛ mi wie ekoŋŋ ekɛɛ,

²⁷ “Gbɔmɔ Adesa, naa, Israelbii lɛ kɛɔ akɛ, ‘Oninaa lɛ yeɔ bei pii dani ebaa mli, ni ogbalɛi lɛ hu kɔɔ be ni yɔɔ shɔŋŋ he.’

²⁸ No hewɔ lɛ, kɛɛmɔ amɛ akɛ, bɔ ni Nuŋtsɔ Yehowa kɛɔ nɛ, atsiŋ miwiemɔ lɛ eko atoŋ dɔŋŋ, shi wiemɔ ni miwieɔ lɛ baaba mli. Mi, Nuŋtsɔ Yehowa mikɛɛ.”