Ester 9 - ŊMALƐ KRƆŊKRƆŊ LƐ

Yudafoi lɛ kpãtã amɛhenyɛlɔi ahiɛ

¹ Kɛkɛ ni nyɔŋ ni ji nyɔŋma kɛ enyɔ ni atsɛɔ lɛ Adar lɛ nɔ gbi ni ji nyɔŋma kɛ etɛ̃ lɛ bashɛ, ni ji gbi ni abaaye maŋtsɛ kitã kɛ akpɔ lɛ nɔ lɛ. Be mli ni Yudafoi lɛ ahenyɛlɔi lɛ ahiɛ kã nɔ akɛ amɛbaana Yudafoi lɛ anɔ hewalɛ lɛ, amɛhiɛnɔkãmɔ nɛɛ tsake ekroko, ni Yudafoi lɛ moŋ na hewalɛ yɛ amɛhenyɛlɔi lɛ anɔ.

² Yudafoi lɛ buabua amɛhe naa kuikui yɛ amɛkutsei lɛ amli yɛ Maŋtsɛ Ahashwerosh nɔyelihei lɛ amli majimaji lɛ amli akɛ amɛkɛ mɛi fɛɛ ni baatua amɛ lɛ baawu. Ni mɔ ko mɔ ko nyɛɛɛ amɛhiɛ adamɔ, ejaakɛ Yudafoi lɛ ahe ŋmiŋmi emɔmɔ maji lɛ fɛɛ.

³ Anɔkwa, shikpɔji lɛ anɔ onukpai lɛ kɛ amraloi lɛ kɛ lumɛi lɛ kɛ mɛi fɛɛ ni tsuɔ maŋtsɛ nii ye bua Yudafoi lɛ, ejaakɛ mɔ fɛɛ mɔ miishe Mɔdekai gbeyei.

⁴ Ejaakɛ nɛkɛ be mli lɛ Mɔdekai etsɔ̃ gbɔmɔ wulu yɛ maŋtsɛ we lɛ mli, ni daa gbi lɛ nɛkɛ ehewalɛ lɛ daa kɛyaa nɔ; ni egbɛi ehehe kɛkpele shikpɔji lɛ fɛɛ anɔ.

⁵ No hewɔ lɛ, Yudafoi lɛ fee amɛhenyɛlɔi lɛ bɔ ni amɛsumɔɔ. Amɛfã klante yɛ amɛhenyɛlɔi lɛ anɔ, ni amɛgbegbee amɛ, ni amɛkpãtã amɛhiɛ.

⁶ Yɛ Susa, ni ji maŋtsɛmaŋ lɛ, diɛŋtsɛ mli lɛ, Yudafoi lɛ kpãtã mɛi ohai enumɔ ahiɛ.

⁷ Amɛgbe Parshandata kɛ Dalfon kɛ Aspata,

⁸ kɛ Porata kɛ Adalia kɛ Aridata,

⁹ kɛ Parmashta kɛ Arisai kɛ Aridai kɛ Waizata,

¹⁰ ni ji Hamedata bi Haman, Yudafoi ahenyɛlɔi lɛ, bihii nyɔŋma lɛ fɛɛ hu. Shi Yudafoi lɛ ehaaa mɛi anii.

¹¹ Nakai gbi lɛ nɔŋŋ lɛ ayabɔ Maŋtsɛ Ahashwerosh mɛi ayibɔ ni agbe yɛ Susa ni ji maŋtsɛmaŋ lɛ mli lɛ.

¹² Kɛkɛ ni maŋtsɛ lɛ kɛɛ Maŋnyɛ Ester akɛ, “Yɛ Susa maŋtsɛmaŋ lɛ kɛkɛ mli lɛ, Yudafoi lɛ egbegbee mɛi ohai enumɔ kɛ Haman bihii nyɔŋma lɛ hu. Belɛ te amɛfee tɛŋŋ mɔ yɛ nɔyelihei lɛ fɛɛ hu? Kɛ̃lɛ mɛni oyɔɔ ni obaabi lolo? Mɛni otaoɔ ekoŋŋ, ni aaafee ahã bo!”

¹³ Ester to he ni ekɛɛ akɛ, “Kɛji Nii baasumɔ lɛ, aŋmɛ Yudafoi ni yɔɔ Susa maŋ nɛɛ mli lɛ agbɛ koni wɔ hu lɛ, amɛfee bɔ ni amɛfee ŋmɛnɛ yɛ mla lɛ naa lɛ ekoŋŋ; asaŋ akɛ Haman bihii nyɔŋma lɛ agbohii lɛ atsotsoro tso nɔ.”

¹⁴ Maŋtsɛ lɛ fee nakai. Awo mla yɛ Susa, ni ahole Haman bihii nyɔŋma lɛ agbohii lɛ, ni akɛ amɛ tsotsoro shi yɛ maŋ jara nɔ.

¹⁵ Kɛkɛ ni Yudafoi ni yɔɔ Susa maŋ lɛ mli lɛ bua amɛhe naa ekoŋŋ yɛ Adar nyɔŋ lɛ nɔ gbi ni ji nyɔŋma kɛ ejwɛ lɛ nɔ, ni amɛsaa amɛgbegbee mɛi ohai etɛ̃ yɛ Susa; shi moŋ amɛhaaa mɛi anii.

¹⁶ Yudafoi krokomɛi ni yɔɔ maŋtsɛ lɛ nɔyelihei krokomɛi lɛ anɔ lɛ hu buabua amɛhe naa kuikui ni amɛfã amɛwala he, ni amɛgbegbee amɛhenyɛlɔi lɛ ateŋ mɛi akpei nyɔŋmai kpawo kɛ enumɔ, ni amɛna hejɔlɛ yɛ amɛdɛŋ. Shi moŋ amɛhaaa mɛi anii.

¹⁷ Afee nii nɛɛ yɛ Adar nyɔɔŋ lɛ nɔ gbi ni ji nyɔŋma kɛ etɛ̃ lɛ nɔ. Gbi ni ji nyɔŋma kɛ ejwɛ lɛ nɔ lɛ, Yudafoi lɛ jɔɔ amɛhe ni amɛgbeee mɔ ko. Amɛye gbi lɛ akɛ gbijurɔ, ni amɛtsɛtsɛɛ okplɔ̃ kɛ nyamɔ.

¹⁸ Yudafoi ni yɔɔ Susa maŋ lɛ mli lɛ gbe amɛhenyɛlɔi lɛ yɛ gbi ni ji nyɔŋma kɛ etɛ̃ kɛ nyɔŋma kɛ ejwɛ lɛ anɔ, kɛkɛ ni amɛjɔɔ amɛhe yɛ gbi ni ji nyɔŋma kɛ enumɔ lɛ nɔ, ni amɛkɛfee okplɔŋmɛɛ kɛ nyamɔ gbijurɔ.

¹⁹ No hewɔ lɛ, Yudafoi ni yɔɔ akrowai amli, ni ji maji ni atswako gbogbo awoko amɛhe lɛ, yeɔ Adar nyɔŋ lɛ nɔ gbi ni ji nyɔŋma kɛ ejwɛ lɛ akɛ gbijurɔ kɛ okplɔŋmɛɛ kɛ nyamɔ, ni amɛkekeɔ amɛhe nii.

Purim Gbijurɔyeli lɛ

²⁰ Mɔdekai hã aŋmãla nɛkɛ saji nɛɛ, ni ekɛ woji tsu, ni akɛyahã Yudafoi fɛɛ ni yɔɔ Maŋtsɛ Ahashwerosh nɔyelihei lɛ fɛɛ, mɛi ni bɛŋkɛ kɛ mɛi ni yɔɔ shɔŋŋ fɛɛ,

²¹ ni ekɛfo efɔ̃ shi ehã Yudafoi lɛ akɛ amɛye Adar nyɔŋ lɛ nɔ gbi ni ji nyɔŋma kɛ ejwɛ kɛ gbi ni ji nyɔŋma kɛ enumɔ lɛ akɛ gbijurɔ daa afi,

²² ejaakɛ nɛkɛ gbii nɛɛ anɔ Yudafoi lɛ ahe jɔ amɛ kɛjɛ amɛhenyɛlɔi lɛ adɛŋ. Nyɔŋ nɛɛ nɔ amɛwerɛho lɛ tsɔ̃ miishɛɛ, ni amɛkɔmɔyeli lɛ tsɔ̃ nyamɔ. No hewɔ lɛ, amɛfee nɛkɛ gbii nɛɛ okplɔŋmɛɛ kɛ nyamɔ kɛ henikee kɛ ohiafoi anikee gbii.

²³ Yudafoi lɛ kɔ fɔ̃ amɛnɔ ni amɛfee tamɔ bɔ ni Mɔdekai ŋmã akɛ amɛfee lɛ, kɛkɛ ni etsɔ̃ afiyeli ehã amɛ.

²⁴ Haman, Hamedata, Agagnyo lɛ bi lɛ, ni fee ehe Yudafoi lɛ fɛɛ ahenyɛlɔ tsɔ̃ ŋaa koni ekpãtã Yudafoi lɛ ahiɛ. Efɔ̃ oshiki, ni atsɛɔ lɛ Pur lɛ, koni ena gbi nɔ ni akpãtã Yudafoi lɛ ahiɛ kɛbule amɛshishi.

²⁵ Shi Ester yana maŋtsɛ lɛ, ni maŋtsɛ lɛ ŋmã wolo, ni naagbee mli lɛ ehã Yudafoi lɛ ayinɔ ŋaa fɔŋ ni Haman etsɔ̃ lɛ babua lɛ moŋ eyiteŋ, ni asɛŋ lɛ kɛ ebihii lɛ fɛɛ yɛ tso nɔ yɛ maŋ jara nɔ.

²⁶ No hewɔ lɛ, awo gbii nɛɛ gbɛi akɛ Purim yɛ gbɛi Pur lɛ hewɔ. Wolo ni Mɔdekai ŋmã lɛ mli saji lɛ kɛ nɔ ni amɛ, Yudafoi lɛ, diɛŋtsɛ hu na yɛ nɛkɛ sane nɛɛ mli, kɛ nɔ ni ba amɛnɔ lɛ fɛɛ ahewɔ lɛ,

²⁷ Yudafoi lɛ to gbii nɛɛ akɛ gbijurɔ. Amɛfo amɛŋmɛ shi amɛhã amɛhe kɛ amɛshwiei kɛ mɛi fɛɛ ni aaabadɔmɔ amɛ akɛ amɛye gbii enyɔ nɛɛ daa afi, yɛ be ni ato lɛ mli kɛbɔ hu ni ato akɛ aye amɛ ahã lɛ; ni ekaho amɛyi kɔkɔɔkɔ.

²⁸ Amɛfo akɛ Yudafoi aweku fɛɛ weku ni yɔɔ maŋ fɛɛ maŋ nɔ, yɛ shikpɔŋ fɛɛ shikpɔŋ nɔ, yɛ yinɔi fɛɛ amli hiɛ ahi nɛkɛ gbii enyɔ nɛɛ anɔ, ni amɛye Purim gbii nɛɛ, ni ekaho amɛyi kɔkɔɔkɔ. Amɛ kɛ amɛshwiei akai gbii nɛɛ kɛya yinɔi ayinɔi fɛɛ.

²⁹ Maŋnyɛ Ester, Abihail biyoo lɛ, kɛ Mɔdekai, Yudanyo lɛ, ŋma wolo yɛ hewalɛ ni amɛna lɛ naa, ni amɛkɛma Purim gbijurɔyeli lɛ he wolo ni Mɔdekai eŋmã lɛ nɔ aduatsɔ.

³⁰ Atsu ni akɛ wolo nɛɛ tee ayahã Yudafoi ni yɔɔ Maŋtsɛ Ahashwerosh nɔyelihei nyɔŋmai enyɔ kɛ kpawo lɛ fɛɛ anɔ lɛ. Akɛ wolo lɛ mli wiemɔ ba omanye ahã amɛ; asaŋ abi amɛ koni amɛhi shi yɛ toiŋjɔlɛ kɛ anɔkwale mli,

³¹ koni amɛ kɛ amɛshwiei aye Purim gbii lɛ yɛ be ni ato lɛ mli tamɔ bɔ ni amɛto be kɛ gbɛjianɔ ni amɛkɛhiɔ ŋmãa, ni amɛkɛfeɔ yara lɛ.

³² Maŋnyɛ Ester wolo ni eŋmã lɛ ma nɛkɛ Purim gbijurɔyeli kusum nɛɛ nɔ aduatsɔ ni aŋmã awo wolo mli afɔ̃ shi.