Ester 4 - ŊMALƐ KRƆŊKRƆŊ LƐ

Mɔdekai bi Ester dɛŋ yelikɛbuamɔ

¹ Be ni Mɔdekai na le nibii fɛɛ ni afee lɛ, ekɛ awerɛho gbala ehe atadei lɛ, ni ekɔ kpekpe ebu; asaŋ eloo lamlu ewo eyiteŋ. Kɛkɛ ni eje kpo kɛbote maŋ lɛ mli kɛ yaafo gegeege.

² Etee eyawa maŋtsɛ we lɛ agbo lɛ naa; ejaakɛ mɔ ko mɔ ko bɛ hegbɛ akɛ ebuɔ kpekpe kɛboteɔ maŋtsɛ agbo lɛ mli.

³ Shikpɔŋ fɛɛ shikpɔŋ nɔ he ni maŋtsɛ lɛ kitã kɛ akpɔ lɛ yashɛ lɛ, ŋkɔmɔyeli kpeteŋkple bagbee shi yɛ jɛi Yudafoi lɛ ateŋ. Amɛhi ŋmãa, amɛye ŋkɔmɔ, amɛwo yara amɛfo, ni mɛi babaoo kɔlɔ kpekpe amɛbu, ni amɛho amɛkamɔ lamlu mli.

⁴ Be ni Ester ablawai lɛ kɛ epiafoi lɛ bagba lɛ nɔ ni Mɔdekai feɔ lɛ, Ester ye jaramɔ jogbaŋŋ diɛŋtsɛ. Etsu ni akɛ atadei tee yahã Mɔdekai koni ekɛtsake kpekpe lɛ yɛ ehe; shi Mɔdekai heee atadei lɛ.

⁵ Kɛkɛ ni Ester tsɛ Hatak, maŋtsɛ lɛ piafoi lɛ ateŋ mɔ kome ko ni ato akɛ esɔmɔ lɛ maŋnyɛ lɛ, ni etsu lɛ Mɔdekai ŋɔɔ koni eyatao nɔ sane ni eba lɛ kɛ nɔ ni kɛba hu.

⁶ Hatak tee Mɔdekai ŋɔɔ yɛ blohu ni yɔɔ maŋtsɛ agbo lɛ naa lɛ mli.

⁷ Mɔdekai gba lɛ sane ni eba enɔ lɛ, ni etsɔ̃ɔ lɛ shika hu ni Haman ewo shi akɛ ebaana ewo maŋ fotro lɛ mli kɛji ana aplenee Yudafoi lɛ.

⁸ Ekɛ mla ni awo yɛ Susa akɛ akpãtã Yudafoi lɛ ahiɛ lɛ nɔ wolo hã Hatak akɛ ekɛyatsɔ̃ɔ Ester. Asaŋ ekɛɛ lɛ akɛ eya maŋtsɛ lɛ ŋɔɔ, ni eyakpa lɛ fai, ni ewie he ehã emaŋbii Yudafoi lɛ.

⁹ Hatak tee ni eyabɔ Ester nɔ ni Mɔdekai kɛɛ lɛ lɛ.

¹⁰ Ester kɛ wiemɔ tsu Hatak koni eyakɛɛ Mɔdekai akɛ,

¹¹ “Mɔ fɛɛ mɔ, nuu ni jio, yoo ni jio, ni eeeya eyanina maŋtsɛ lɛ yɛ ewe lɛ mligbɛ kpo lɛ nɔ trukaa, be mli ni maŋtsɛ lɛ tsuko kɛ mɔ lɛ gbɛi tuuŋtu akɛ atsɛ mɔ lɛ ahã lɛ lɛ, mla ni kã shi ji akɛ abaagbe mɔ lɛ. Mla ni kã shi ni ale kɛjɛ maŋtsɛ tsuji anɔ aahu kɛyashi maŋbii fɛɛ anɔ ji enɛ. Shi kɛji maŋtsɛ lɛ wo eshika tsi lɛ nɔ etsɔ̃ɔ mɔ lɛ hiɛ lɛ no dani mɔ lɛ yi naa wala. Kɛjɛ gbii nyɔŋmai etɛ̃ sɔŋŋ nɛ lɛ, maŋtsɛ lɛ tsuko koni atsɛ mi ahã lɛ.”

¹² Be ni wiemɔ nɛɛ shɛ Mɔdekai dɛŋ lɛ,

¹³ Mɔdekai hu tsu kɛ hetoo nɛɛ koni akɛyahã Ester, “Kaasusu akɛ ni oyɔɔ maŋtsɛ we lɛ mli hewɔ lɛ bo lɛ ohe baaje Yudafoi fɛɛ asane nɛɛ mli.

¹⁴ Ejaakɛ kɛji omua onaa kɛta shi yɛ nɛkɛ be nɛɛ mli tete, yelikɛbuamɔ baajɛ he ko kɛ̃ aba ahã Yudafoi, ni abaahere amɛyiwala, shi bo kɛ otsɛ we lɛ hiɛ aaakpãtã. Namɔ aaale akɛ eko lɛ nɛkɛ be nɛɛ hewɔ ni ahã obatsɔ̃ maŋnyɛ nɛɛ lɛ.”

¹⁵ Ester kɛ hetoo nɛɛ tsu akɛyahã Mɔdekai.

¹⁶ “Yaa ni oyabua Yudafoi ni yɔɔ Susa maŋ lɛ mli fɛɛ anaa kɛkpe; ni nyɛhia ŋmãa, ni nyɛsɔlea nyɛhãa mi. Nyɛkayea nii, ni nyɛkanua nu hu shwaneshwane kɛ nyɔɔŋnyɔɔŋ gbii etɛ̃. Mi hu mi kɛ miblayei lɛ baahi ŋmãa nakai nɔŋŋ. Enɛ sɛɛ lɛ mibaya mayana maŋtsɛ lɛ, tsɛbelɛ mla eŋmɛɛɛ gbɛ nakai. Kɛji miyagbo yɛ no hewɔ po jiŋŋ efeee nɔ ko.”

¹⁷ Kɛkɛ ni Mɔdekai yiŋ etee, ni eyafee bɔ ni Ester kɛɛ eyafee lɛ pɛpɛɛpɛ.