Ester 3 - ŊMALƐ KRƆŊKRƆŊ LƐ

Haman to Yudafoi lɛ ehe yitso fɔŋ

¹ Saji nɛɛ asɛɛ lɛ Maŋtsɛ Ahashwerosh wo nuu ko ni atsɛɔ lɛ Haman lɛ maŋsɔ̃ɔlɔ nukpa ni fe fɛɛ. Haman nɛɛ tsɛ gbɛi ji Hamedata, ni ejɛ Agag seshi mli.

² Maŋtsɛ Ahashwerosh fã akɛ etsuji fɛɛ ni yɔɔ esɔ̃ɔmɔ mli lɛ akula shi ni amɛkoto Haman be fɛɛ be. Tsuji lɛ fɛɛ fee nakai, ja Mɔdekai pɛ ni kotooo Haman.

³ Kɛkɛ ni Maŋtsɛ Ahashwerosh tsuji krokomɛi lɛ bi Mɔdekai akɛ, “Mɛɛba otɔ̃ɔ maŋtsɛ kitã lɛ?”

⁴ Be ni tsuji lɛ kɛ Mɔdekai ewie gbii abɔ, shi fɛɛ lɛ Mɔdekai ekpɛlɛɛɛ akɛ eeekoto Haman lɛ, Mɔdekai kɛɛ tsuji lɛ akɛ Yudanyo ji lɛ ni no hewɔ lɛ, enyɛŋ ekoto Haman. Tsuji lɛ yabɔ Haman amaniɛ koni amɛkwɛ kɛji Haman baakpɛlɛ nɔ ehã Mɔdekai lo.

⁵ Ni be ni Haman na akɛ Mɔdekai kulãaa shi haaa lɛ, ni ekotooo lɛ lɛ, Haman mli fu naakpa.

⁶ Akɛni akɛɛ Haman akɛ Yudanyo ji Mɔdekai hu hewɔ lɛ, Haman to eyiŋ akɛ ekpãtãŋ Mɔdekai kome kɛkɛ hiɛ, shi moŋ ekɛ Mɔdekai he nu baaju Yudafoi fɛɛ ni yɔɔ Maŋtsɛ Ahashwerosh maŋtsɛyeli shikpɔji lɛ fɛɛ anɔ lɛ ahe.

⁷ Maŋtsɛ Ahashwerosh maŋtsɛyeli afi ni ji nyɔŋma kɛ enyɔ lɛ nɔ klɛŋklɛŋ nyɔŋ ni atsɛɔ lɛ Nisan lɛ nɔ lɛ, Haman hã abɔ̃i oshiki, ni ji Pur, fɔ̃ɔ daa gbi kɛtao gbi ni hi hã eyiŋtoo lɛ he nitsumɔ. Afɔ̃ oshiki nɛɛ aahu kɛyashi nyɔŋ ni ji nyɔŋma kɛ enyɔ, ni ji Adar nyɔŋ lɛ nɔ.

⁸ Kɛkɛ ni Haman kɛɛ maŋtsɛ Ahashwerosh akɛ, “Nii, Gbɔmɛi komɛi egbɛ eshwã omaŋtsɛyeli shikpɔji kɛ kpokpai fɛɛ anɔ, ni amɛ lɛ esoro amɛkusum kwraa yɛ maŋbii krokomɛi lɛ anɔ he, ni amɛyeee maŋtsɛ mlai lɛ anɔ hu. Enɛ lɛ esaaa akɛ Nii aŋmɛ amɛ gbɛ nakai.

⁹ Kɛji esa Maŋtsɛ hiɛ lɛ, no lɛ Nii awo akpɔ akɛ agbe amɛ. Kɛji maŋtsɛ kpɛlɛ̃ nɔ nakai lɛ, no lɛ miiwo shi akɛ mahã jwiɛtɛi ni tsiimɔ ji talentai akpei nyɔŋma koni akɛwo maŋ fotro lɛ mli koni akɛtsu maŋ lɛ he nii.”

¹⁰ Kɛkɛ ni maŋtsɛ lɛ jie ewolonaasɔomɔ waoga ni ewo lɛ yɛ enine, ni ekɛhã Hamedata bi Haman ni ji Yudafoi lɛ ahenyɛlɔ lɛ.

¹¹ Maŋtsɛ Ahashwerosh kɛɛ Haman akɛ, “Gbɔmɛi lɛ diɛŋtsɛ ni jio, shikai ni amɛyɔɔ lɛ ni jio, mikɛ fɛɛ ewo odɛ̃ŋ. Feemɔ amɛ bɔ ni osusuɔ akɛ esa.”

¹² No hewɔ lɛ, afi lɛ nɔ klɛŋklɛŋ nyɔŋ lɛ nɔ gbi ni ji nyɔŋma kɛ etɛ̃ lɛ nɔ lɛ, Haman kpee maŋtsɛ lɛ woloŋmalɔi lɛ fɛɛ, ni amɛnaa bakpe shi. Amɛŋma wolo lɛ bɔ pɛpɛɛpɛ ni Haman fã amɛ akɛ amɛŋma lɛ koni akɛyahã amraloi lɛ kɛ lumɛi ni kwɛɔ shikpɔŋ fɛɛ shikpɔŋ nɔ kɛ maŋ fɛɛ maŋ mli onukpa fɛɛ onukpa hu. Shikpɔŋ fɛɛ shikpɔŋ lɛ aŋma ewolo lɛ yɛ lɛ diɛŋtsɛ eniŋmãa mli, ni maŋ fɛɛ maŋ lɛ aŋma ewolo lɛ yɛ ewiemɔ mli. Aŋmala woji lɛ yɛ Maŋtsɛ Ahashwerosh gbɛi mli, ni akɛ ewolonaasɔomɔ waoga lɛ sɔo naa.

¹³ Kɛkɛ ni akɛ woji lɛ tsu bɔfoi kɛtee maŋtsɛ lɛ shishi shikpɔji lɛ fɛɛ anɔ. Wiemɔ ni yɔɔ woji lɛ amli ji akɛ gbi kome jenamɔ, ni ji nyɔŋ ni ji nyɔŋma kɛ enyɔ, ni ji Adar nyɔŋ lɛ nɔ, gbi ni ji nyɔŋma kɛ etɛ̃ lɛ nɔ lɛ, aplenee Yudafoi ni yɔɔ he fɛɛ he, oblahii jio, hiimeji jio, gbekɛbii jio, yei, jio agbe mɔ fɛɛ mɔ ni akɛbule amɛshishi ni asaŋ aha nibii ni amɛyɔɔ.

¹⁴ Wolo lɛ fã hu akɛ shikpɔŋ fɛɛ shikpɔŋ nɔ lɛ, ashiɛ akpɔ nɛɛ koni maji fɛɛ ana ale koni asaa he ato gbi ni ato lɛ.

¹⁵ Bɔfoi lɛ kɛ woji lɛ shi kɛ foi yɛ maŋtsɛ lɛ fãmɔ naa kɛtee shikpɔji lɛ anɔ. Ashiɛ akpɔ lɛ yɛ Susa ni ji maŋtsɛmaŋ lɛ mli hu. Kɛkɛ ni Maŋtsɛ Ahashwerosh kɛ Haman ho tara shi ni amɛnu dãa, be mli ni akpɔ lɛ ehã Susa maŋ lɛ fɛɛ ejijaa lɛ.