Ester 2 - ŊMALƐ KRƆŊKRƆŊ LƐ

Ester tsɔ̃ Maŋnyɛ

¹ Saji nɛɛ asɛɛ, be mli ni Maŋtsɛ Ahashwerosh mlila lɛ naa eba shi tete po lɛ, kɛfee lɛ ekaiɔ Vashti kɛ nɔ ni efee lɛ, kɛ nɔ hu ni afee lɛ lɛ.

² Kɛkɛ ni maŋtsɛ lɛ ŋaawolɔi lɛ ateŋ mɔ kome ko wo maŋtsɛ lɛ ŋaa ni ekɛɛ akɛ, “Maŋtsɛ, hã atao oblayei froi ni ahe yɔɔ fɛo lɛ ateŋ mɔ ko ahã bo.

³ Maŋtsɛ baanyɛ eto tsuji yɛ shikpɔŋ fɛɛ shikpɔŋ nɔ koni amɛbua oblayei froi ni ahe yɔɔ fɛo lɛ fɛɛ anaa kɛba yei awe lɛ mli yɛ Susa, ni ji maŋtsɛmaŋ lɛ mli. Atu oblayei nɛɛ awo Hegai ni ji maŋtsɛ piafonyo ni kwɛɔ yei asaji anɔ lɛ dɛŋ koni ekwɛ ni ahiɛ amɛ jogbaŋŋ.

⁴ Ni oblayoo ni baasa maŋtsɛ hiɛ lɛ, Maŋtsɛ aŋɔ lɛ akɛ maŋnyɛ ato Vashti najiaŋ.” Maŋtsɛ lɛ na akɛ ŋaawoo lɛ hi, ni no hewɔ lɛ, eye nɔ.

⁵ Nakai be mli lɛ Yudanyo ko yɛ Susa, maŋtsɛmaŋ lɛ mli, ni atsɛɔ lɛ Mɔdekai. Benyaminnyo Yair bi ji lɛ, ni efeɔ Shimei nabi kɛ Kish nanakansowa.

⁶ Eshi nomii ni fata Yuda Maŋtsɛ Yekonia he lɛ anɔ, be ni Babilon Maŋtsɛ Nebukadnezar yaŋɔ Yekonia nom kɛjɛ Yerusalɛm kɛba Babilon lɛ.

⁷ Be ni Mɔdekai baa lɛ ekɛ etsɛkwɛ̃ ko biyoo ko ba, ejaakɛ awusa ni. Oblayoo nɛɛ gbɛi ji Ester, shi Hebri mli lɛ atsɛɔ lɛ Hadasa. Oblayoo lɛ he yɛ fɛo, ni ehiɛŋtso yɛ akɔnɔ pam. Be ni enyɛ kɛ etsɛ fɛɛ gboi lɛ, Mɔdekai ŋɔ lɛ ekɛfee lɛ diɛŋtsɛ ebiyoo.

⁸ Be ni ashiɛ Maŋtsɛ Ahashwerosh kitã kɛ akpɔ lɛ, ni abua oblayei pii anaa kɛtee Susa mɔɔ lɛ mli lɛ, Ester fata he eko kɛtee, ni akɛ amɛ yahã Hegai yei akwɛlɔ lɛ.

⁹ Ester hiɛ ba nyam yɛ Hegai hiɛ. No hewɔ lɛ, etsɛɛɛ kwraa kɛkɛ ni Hegai kɛ mui kɛ niyenii kpakpai kuma Ester. Fee sɛɛ lɛ Hegai jie Ester ni ekɛ lɛ yato yei awe lɛ mli he ko ni hi fe fɛɛ lɛ, ni eje gbɛ hu ehala oblayei kpawo yɛ maŋtsɛ we lɛ mli ablawai lɛ ateŋ, ni ekɛ amɛ to Ester he koni amɛsɔmɔ lɛ.

¹⁰ Ŋaa ni Mɔdekai wo Ester hewɔ lɛ, Ester (kɛ ŋaawoo lɛ to eyiŋ) ni egbaaa mɔ ko mɔ ko emaŋ kɛ eweku mli ni ejɛ.

¹¹ Daa gbi lɛ Mɔdekai yasharaa shi yɛ yei awe lɛ kpo lɛ nɔ bɔ ni afee ni ele bɔ ni Ester yɔɔ, kɛ bɔ ni eyaa nɔ ehãa.

¹² Be ni ayeɔ akɛsaa oblayoo gbɔmɔtso ji nyɔji nyɔŋma kɛ enyɔ. Oblayoo lɛ kɛ mire mu gbɔleɔ egbɔmɔtso nyɔji ekpaa; ni ekɛ nyɔji ekpaa kroko hu kpaa krɔbɔo kɛ tsofakɛŋmai. Enɛ sɛɛ lɛ, atoɔ naa ni aŋɔɔ oblayoo fɛɛ oblayoo akɛyahãa Maŋtsɛ Ahashwerosh.

¹³ Nɔ fɛɛ nɔ ni oblayoo lɛ biɔ lɛ ahãa lɛ yɛ yei awe lɛ mli ni ekɛ saa ehe kɛyaa maŋtsɛ lɛ ŋɔɔ.

¹⁴ Eyaa maŋtsɛ lɛ ŋɔɔ gbɛkɛ, ni enɔ leebi lɛ akpalaa lɛ kɛyaa yei awe kroko mli, ni akɛ lɛ yawoɔ Shaashgaz, maŋtsɛ piafonyo ni kwɛɔ maŋtsɛ hemɛi lɛ, dɛŋ. Oblayoo lɛ eyaaa maŋtsɛ lɛ ŋɔɔ ekoŋŋ bɛja maŋtsɛ lɛ ena ehe tsui ni etsu kɛ yoo lɛ gbɛi akɛ atsɛ lɛ ahã lɛ.

¹⁵ Agbɛnɛ ebashɛ Ester ni ji Mɔdekai tsɛkwɛ Abihail biyoo mɔ ni eŋɔ lɛ efee lɛ diɛŋtsɛ ebi lɛ nɔ, ni ebaaya maŋtsɛ lɛ ŋɔɔ. Ester diɛŋtsɛ biii nɔ ko nɔ ko koni ekɛsaa ehe kɛya. Nɔ ni Hegai, maŋtsɛ piafonyo ni kwɛɔ yei lɛ, kɔ hã lɛ lɛ, no Ester kɛsaa ehe. Ni Ester he fee mɛi fɛɛ ni na lɛ lɛ akɔnɔ pam.

¹⁶ Kɛkɛ ni aŋɔ Ester ayahã Maŋtsɛ Ahashwerosh yɛ emaŋtsɛyeli we lɛ mli. Maŋtsɛ Ahashwerosh maŋtsɛyeli afi ni ji kpawo lɛ mli Tebet nyɔŋ lɛ ni ji nyɔŋ ni ji nyɔŋma lɛ nɔ akɛ Ester yahã lɛ lɛ.

¹⁷ Maŋtsɛ lɛ sumɔ Ester fe oblayei krokomɛi lɛ fɛɛ. Ester hiɛ ba nyam jogbaŋŋ yɛ maŋtsɛ lɛ hiɛ fe yei fɛɛ; ni ena ehe miishɛɛ fe oblayei lɛ fɛɛ ni no hewɔ lɛ, ekɛ maŋnyɛyeli akekre lɛ fi Ester yitso kɛkɛ ni ewo lɛ maŋnyɛ yɛ Vashti najiaŋ.

¹⁸ Kɛkɛ ni Maŋtsɛ Ahashwerosh tsɛ okplɔ̃ kpeteŋkple ekɛwo Ester hiɛ nyam; ni ekpee eshishi lumɛi kɛ etsuji fɛɛ kɛba okplɔ̃ lɛ shishi. Ehã eshishi shikpɔji lɛ ye gbi ko akɛ hejɔɔmɔ gbi; ni ekekee mɛi nii babaoo bɔ ni sa maŋtsɛ.

Mɔdekai here Maŋtsɛ lɛ yiwala

¹⁹ Be ko hu be ni abua oblayei lɛ anaa ekoŋŋ nɔ ni ji shii enyɔ nɔ ahã maŋtsɛ lɛ, no mli lɛ Mɔdekai shi maŋtsɛ koishi onukpai lɛ anɔ.

²⁰ Nɛkɛ be mli fɛɛ lɛ Ester egbako mɔ ko kwraa akɛ Yudayoo ji lɛ, taakɛ bɔ ni Mɔdekai ewo lɛ kitã lɛ. Ejaakɛ Ester miiye Mɔdekai gbee nɔ pɛpɛɛpɛ tamɔ be mli ni Mɔdekai kwɛɔ enɔ lɛ nɔŋŋ.

²¹ Be mli ni Mɔdekai tsuɔ nii yɛ maŋtsɛ lɛ koishi lɛ, Bigtan kɛ Teresh, maŋtsɛ piafoi enyɔ komɛi ni shi mɛi ni buɔ maŋtsɛ we lɛ mli shinai anaa lɛ ahe lɛ, na maŋtsɛ lɛ he mlifu; ni amɛto amɛyiŋ akɛ amɛbaagbe Maŋtsɛ Ahashwerosh.

²² Be ni Mɔdekai na nu yiŋtoo nɛɛ lɛ, eyakɛɛ Maŋnyɛ Ester; ni Ester hu bɔ maŋtsɛ lɛ amaniɛ lɛ ni Mɔdekai ebabɔ lɛ lɛ.

²³ Be ni atao sane lɛ mli lɛ, ebakã shi faŋŋ akɛ eyɛ mli anɔkwale. No hewɔ lɛ, asɛŋ Bigtan kɛ Teresh yɛ tso nɔ, ni Maŋtsɛ Ahashwerosh fã, ni aŋma sane nɛɛ awo Yinɔ Asaji wolo lɛ mli yɛ maŋtsɛ lɛ diɛŋtsɛ hiɛ.