Ester 1 - ŊMALƐ KRƆŊKRƆŊ LƐ

Maŋnyɛ Vashti tse Maŋtsɛ Ahashwerosh hiɛ atua

¹ Maŋtsɛ Ahashwerosh ye shikpɔji oha kɛ nyɔŋmai enyɔ kɛ kpawo anɔ akɛ maŋtsɛ kɛjɛ India aahu kɛyashi Etiopia.

² Susa maŋ lɛ mli ji he ni emaŋtsɛ sɛi lɛ yɔɔ, ni jɛi ejɛɔ ni eyeɔ maji lɛ anɔ.

³ Emaŋtsɛyeli afi ni ji etɛ̃ lɛ nɔ lɛ, Maŋtsɛ Ahashwerosh ŋmɛ okplɔ̃ ehã elumɛi kɛ etsuji fɛɛ yɛ maŋtsɛ we lɛ mli. Mɛi okplɔ̃ ni eŋmɛ lɛ ji Persia kɛ Media shikpɔji lɛ anɔ tatsɛmɛi lɛ kɛ amralofoi lɛ.

⁴ Maŋtsɛ Ahashwerosh kɔ nyɔji ekpaa, ni ekɛjie emaŋtsɛyeli lɛ he nibii ni woɔ ehiɛ nyam, asaŋ ni tsɔ̃ɔ egbojee lɛ kpo etsɔ̃ɔ maŋ.

⁵ Be ni akɛ nibii lɛ etsɔ̃ɔ agbe naa lɛ, Maŋtsɛ Ahashwerosh tsɛ mɛi wujiwuji kɛ mɛi bibii hu fɛɛ ni yɔɔ Susa maŋ lɛ mli nakai beiaŋ lɛ okplɔ̃, gbii kpawo yɛ trom ko ni yɔɔ maŋtsɛ we lɛ he lɛ kpo teŋ lɛ mli.

⁶ Bɔ ni awula kpo teŋ lɛ mli ahã nɛ. Akɛ tɛi eŋɔlii kɛ tɛi yɛji kɛ tɛi bluu kɛ tɛi diji eka kpo lɛ nɔ; ni akɛ tɛi yɛji akulashiŋi emamɔ tɛi ni aka lɛ anɔ. Jwiɛtɛi gai yɛ akulashiŋi nɛɛ ahe. Akɛ kpãa yɛŋ fɛɛfɛo kɛ kpãa afaseo emɔmɔ mamai yɛji fɛɛfɛji kɛ mamai bluu lɛ hu anaa; kɛkɛ ni akɛŋmɔlɔ jwiɛtɛi akulashiŋi lɛ ahe gai lɛ, ni ehã mamai lɛ tsotsoro shi. Mlikpãmɔ saatsei pɛmpɛbii ni akɛ shika kɛ jwiɛtɛi fee mamɔ kpo teŋ lɛ mli hei komɛi.

⁷ Gbi lɛ awo dãa yɛ shika kpuji srɔtoisrɔtoi amli. Maŋtsɛ lɛ hã awo mɛi ni ekpee lɛ lɛ diɛŋtsɛ edãa ni enuɔ lɛ eko babaoo, bɔ ni ewo ehiɛ nyam akɛ maŋtsɛ.

⁸ Maŋtsɛ lɛ wo ewe lɛ mli tsuji lɛ mla akɛ ahã mɔ fɛɛ mɔ dãa bɔ ni mɔ lɛ baanyɛ anu; mɔ ni enuuu lɛ akɛkafi enɔ; ni mɔ ni baanu lɛ akakama lɛ.

⁹ Nakai be lɛ mli nɔŋŋ lɛ Maŋnyɛ Vashti ŋmɛ yei sɔŋŋ hu okplɔ̃ yɛ maŋtsɛ we lɛ mli diɛŋtsɛ.

¹⁰ Gbi ni ji kpawo lɛ nɔ be ni dãa lɛ ehã maŋtsɛ lɛ mli efili lɛ lɛ, etsɛ epiafoi kpawo ni sɔmɔɔ lɛ diɛŋtsɛ lɛ. Amɛ ji Mehuman kɛ Bizta kɛ Harbona kɛ Bitha kɛ Abagta kɛ Zeter kɛ Karkas.

¹¹ Kɛkɛ ni efã amɛ akɛ amɛya koni amɛyaŋɔ Maŋnyɛ Vashti kɛba ehiɛ; ebu emaŋnyɛ fai lɛ kɛba. Anɔkwa emaŋnyɛ lɛ he yɛ fɛo jogbaŋŋ, ni Maŋtsɛ Ahashwerosh miitao akɛ egbɔi lɛ ana emaŋnyɛ lɛ he fɛo lɛ.

¹² Shi Maŋnyɛ Vashti kwa, ni eyaaa tsɛmɔ ni maŋtsɛ lɛ tsu piafoi lɛ akɛ abatsɛ lɛ lɛ. No hewɔ lɛ, maŋtsɛ lɛ mli fu naakpa ni emli wo la.

¹³ Kɛji sane ko ba nɛkɛ lɛ, Maŋtsɛ Ahashwerosh sumɔɔ akɛ ebi ŋaawoo yɛ nilelɔi kɛ mɛi ni le shikpɔŋ lɛ nɔ mlai amli kɛ saneyeli mli jogbaŋŋ lɛ adɛŋ. Enɛ hewɔ lɛ, etsɛ eŋaawolɔi lɛ.

¹⁴ Mɛi adɛŋ ŋaawoo ni efɔɔ bimɔ ji Karshena kɛ Shetar kɛ Admata kɛ Tarshish kɛ Meres kɛ Marsena kɛ Memukan ni ji Persia kɛ Media lumɛi ni hiɛ gbɛnai wujiwuji yɛ emaŋtsɛyeli lɛ mli lɛ.

¹⁵ Ekɛɛ ŋaawolɔi nɛɛ akɛ, “Mɛni, yɛ mla lɛ naa, esa akɛ afeɔ Maŋnyɛ Vashti akɛni mi, Maŋtsɛ Ahashwerosh, mitsu piafoi kɛ wiemɔ kɛtee eŋɔɔ, ni ekwa, ni eyeee wiemɔ lɛ nɔ lɛ?”

¹⁶ Kɛkɛ ni Memukan kɛɛ maŋtsɛ lɛ kɛ elumɛi lɛ akɛ, “Jeee Maŋtsɛ kɛkɛ nɔ Maŋnyɛ Vashti etɔ̃ lɛ, shi moŋ etɔ̃ lumɛi fɛɛ kɛ majimaji fɛɛ ni yɔɔ Maŋtsɛ Ahashwerosh shishi shikpɔji fɛɛ anɔ lɛ mli bii lɛ anɔ.

¹⁷ Ejaakɛ kɛji ayagba akɛ, ‘Naa, Maŋtsɛ Ahashwerosh fã akɛ ayatsɛ Maŋnyɛ Vashti abahã lɛ lɛ, maŋnyɛ lɛ baaa lɛ,’ sane lɛ baagbɛ eshwã yei fɛɛ ateŋ, ni ebaahã yei awumɛi ahe guɔ agbo yɛ amɛŋamɛi ahiɛ.

¹⁸ Ŋmɛnɛ gbi nɛɛ nɔŋŋ lɛ Persia kɛ Media lumɛi lɛ aŋamɛi ni baanu nɔ ni maŋnyɛ lɛ efee lɛ baabɔ amɛwumɛi amaniɛ. Wumɛi ahe guɔ baagbo yɛ ŋamɛi ahiɛ, ni enɛ kɛ mlifu babaoo baaba.

¹⁹ No hewɔ lɛ, kɛji Maŋtsɛ miisumɔ lɛ, Maŋtsɛ awo akpɔ, ni aŋma ashi Persia kɛ Media mlai lɛ anɔ, (asaŋ ni akɛɛ hu) akɛ Maŋnyɛ Vashti akana Maŋtsɛ Ahashwerosh hiɛ dɔŋŋ. No sɛɛ lɛ, Nii, okɛ emaŋnyɛyeli lɛ ahã yoo kroko ni fe lɛ.

²⁰ Kɛji ashiɛ Maŋtsɛ dɛŋ akpɔ nɛɛ yɛ omaŋtsɛyeli shikpɔŋ kpeteŋkple nɛɛ heihei fɛɛ lɛ, ebaahã yeigbãyei fɛɛ ahiɛ asɔ amɛwumɛi, mɛi wuji kɛ mɛi bibii fɛɛ.”

²¹ Ŋaawoo lɛ sa Maŋtsɛ Ahashwerosh kɛ elumɛi lɛ ahiɛ, ni no hewɔ lɛ, maŋtsɛ lɛ fee nɔ ni Memukan kɛɛ lɛ.

²² Kɛkɛ ni Maŋtsɛ Ahashwerosh tsu kɛ woji kɛtee eshikpɔji lɛ fɛɛ anɔ. Aŋma shikpɔŋ fɛɛ shikpɔŋ wolo lɛ yɛ shikpɔŋ lɛ diɛŋtsɛ niŋmaa kɛ ewiemɔ mli akɛ, “Nuu fɛɛ nuu lɛ, lɛ eye ewe nɔ; ni nɔ ni lɛ ebaakɛɛ lɛ, no afee naagbee.”