Efesobii 6 - ŊMALƐ KRƆŊKRƆŊ LƐ

Bii kɛ fɔlɔi

¹ Nyɛ bii lɛ, nyɛboa nyɛfɔlɔi lɛ atoi yɛ Nuŋtsɔ lɛ mli; ejaakɛ enɛ ja.

² “Wo otsɛ kɛ onyɛ,” no ji klɛŋklɛŋ kitã ni hiɛ shiwoo akɛ,

³ “Koni ahi ahã bo, ni otsɛ yɛ shikpɔŋ lɛ nɔ.”

⁴ Ni nyɛ tsɛmɛi lɛ, nyɛkawoa nyɛbii amli la, shi moŋ nyɛlɛa amɛ yɛ Nuŋtsɔ lɛ tsɔsemɔ kɛ ewiemɔkɛtsɔ̃ɔmɔ lɛ mli.

Tsuji kɛ nuŋtsɔmɛi

⁵ Nyɛ tsuji lɛ, nyɛboa nyɛheloo gbɛfaŋ nuŋtsɔmɛi lɛ atoi kɛ gbeyeishemɔ kɛ hekpokpomɔ kɛ tsui krɔŋŋ, tamɔ akɛ nyɛmiifee nyɛhã Kristo;

⁶ jeee kɛ hiɛiaŋhiɛiaŋ sɔ̃ɔmɔ tamɔ mɛi ni taoɔ gbɔmɛi ahiɛsalɛ, shi tamɔ Kristo tsuji ni jieɔ amɛmusuŋ amɛfeɔ Nyɔŋmɔ suɔmɔnaanii,

⁷ ni amɛkɛ tsuijurɔ sɔ̃mɔɔ akɛ Nuŋtsɔ lɛ amɛsɔ̃mɔɔ, shi jeee gbɔmɛi.

⁸ Ni nyɛle akɛ, mɔ fɛɛ mɔ lɛ, nyɔŋ ji lɛ jio, odehe jio, nɔ ekpakpa ni efeɔ lɛ, no he nyɔmɔwoo ebaana kɛjɛ Nuŋtsɔ lɛ dɛŋ.

⁹ Ni nyɛ nuŋtsɔmɛi lɛ, nyɛfea amɛ nakai nɔŋŋ ni nyɛfɔ̃a amɛhe gbeyeiwoo ni nyɛle akɛ nyɛ kɛ amɛ fɛɛ yɛ Nuŋtsɔ yɛ ŋwɛi, ni gbɔmɛi ahiɛiaŋkwɛmɔ ko bɛ egbɛfaŋ.

Nyɔŋmɔ tawuunii lɛ fɛɛ

¹⁰ Naagbee lɛ, minyɛmimɛi, nyɛhe awaa yɛ Nuŋtsɔ lɛ kɛ ehewalɛ nyɛmɔ lɛ mli.

¹¹ Nyɛwoa Nyɔŋmɔ tawuunii lɛ fɛɛ, koni nyɛnyɛ abonsam ŋaatsɔ̃i lɛ ana nyɛdamɔ.

¹² Ejaakɛ jeee gbɔmɛi wɔkɛna lɛ, shi moŋ wɔkɛ onukpayelii kɛ hegbɛi kɛ je nɛɛŋ duŋ lɛ mli lumɛi lɛ kɛ mumɔi fɔ̃ji ni yɔɔ ŋwɛiniiaŋ lɛ.

¹³ No hewɔ lɛ, nyɛkɔlɔa Nyɔŋmɔ tawuunii lɛ fɛɛ, koni nyɛnyɛ amɛnaa nyɛkpee yɛ gbi fɔŋ lɛ nɔ, ni be ni nyɛgbe fɛɛ naa lɛ nyɛnyɛ shi nyɛdamɔ.

¹⁴ No hewɔ lɛ, nyɛdamɔa shi ni nyɛkɛ anɔkwale afia nyɛhɛ ni nyɛwo jalɛ dama lɛ

¹⁵ ni nyɛkɛ hejɔlɛ Sanekpakpa lɛ awo nyɛnaji;

¹⁶ nɔ fɛɛ nɔ mli lɛ nyɛhiɛa hemɔkɛyeli tsɛŋ lɛ mli; no nyɛkɛaanyɛ mɔfɔŋ lɛ gãimlibii ni tsoɔ lɛ fɛɛ nyɛgbe lɛ;

¹⁷ ni nyɛŋɔa yiwalaheremɔ akɛ dadefai, kɛ mumɔŋ klante ni ji Nyɔŋmɔ Wiemɔ lɛ.

¹⁸ Ni nyɛkɛ sɔlemɔ kɛ faikpamɔ fɛɛ asɔlea be fɛɛ be yɛ mumɔ mli, ni enɛ hewɔ lɛ nyɛsaraa, ni nyɛkãa he daa nyɛkpaa fai nyɛhãa krɔŋkrɔŋbii lɛ fɛɛ

¹⁹ kɛ mi hu, koni kɛ migbele minaa lɛ, akɛ wiemɔ awo minaa ni mikɛ ekãa ajaje Sanekpakpa lɛ mli teemɔ sane lɛ

²⁰ ni mitsuɔ he nii akɛ bɔfo yɛ kɔsɔŋkɔsɔ mli nɛɛ. Nyɛkpaa fai koni yɛ ejajemɔ lɛ mli lɛ mawie kɛ ekãa bɔ ni sa akɛ mawie lɛ.

Naagbee ŋamɔ

²¹ Shi bɔ ni afee ni nyɛ hu nyɛle bɔ ni miyɔɔ kɛ nii ni mitsuɔ lɛ, wɔsuɔmɔ nyɛmi Tihiko ni ji sɔ̃ɔlɔ anɔkwafo yɛ Nuŋtsɔ lɛ mli lɛ aaagba nyɛ fɛɛ.

²² Ejaakɛ enɛ nɔŋŋ hewɔ mitsu lɛ nyɛŋɔɔ lɛ, bɔ ni afee ni nyɛle bɔ ni wɔyɔɔ, ni ehã nyɛtsui anyɔ nyɛmli.

²³ Hejɔlɛ ahã nyɛmimɛi lɛ, kɛ suɔmɔ kɛ hemɔkɛyeli ni jɛ Tsɛ Nyɔŋmɔ lɛ kɛ Nuŋtsɔ Yesu Kristo dɛŋ lɛ.

²⁴ Dromɔ kɛ mɛi fɛɛ ni sumɔɔ wɔNuŋtsɔ Yesu Kristo kɛ suɔmɔ ni sɛɛ efooo lɛ ahi shi. Amen!