Efesobii 5 - ŊMALƐ KRƆŊKRƆŊ LƐ

Nyɛnyiɛa tamɔ la bii

¹ No hewɔ lɛ, nyɛfea nyɛhe mɛi ni kaseɔ Nyɔŋmɔ, akɛ bii ni asumɔɔ.

² Ni nyɛnyiɛa yɛ suɔmɔ mli, tamɔ bɔ ni Kristo hu sumɔ wɔ ni ekɛ lɛ diɛŋtsɛ ehe hã yɛ wɔhewɔ akɛ nikeenii kɛ afɔle ni akɛhã Nyɔŋmɔ ni jeɔ ŋma krɔŋŋ lɛ.

³ Shi ajwamãŋbɔɔ kɛ nyaŋemɔ nitsumɔ fɛɛ loo hiɛjoomɔ lɛ akatsĩ tã tete yɛ nyɛteŋ, tamɔ bɔ ni sa mɛi krɔŋkrɔŋi.

⁴ Nakai nɔŋŋ akatsĩ hiɛgbejianitsumɔ kɛ kwashiai awiemɔ kɛ fɛoyeli ni ji nibii ni esaaa lɛ tã yɛ nyɛteŋ, shi moŋ nyɛ daa Nyɔŋmɔ shi.

⁵ Ejaakɛ nyɛnaa nyɛlea enɛ akɛ, ajwamãŋbɔlɔ ko ajwamãŋbɔlɔ ko loo hiɛjoolɔ ko ni ji wɔŋjalɔ bɛ gbɛfaŋ nɔ yɛ Kristo kɛ Nyɔŋmɔ maŋtsɛyeli lɛ mli.

⁶ Nyɛkahãa mɔ ko kɛ wiemɔi foji miishishiua nyɛ, ejaakɛ nii nɛɛ ahewɔ ni Nyɔŋmɔ mlifu baa toigbelebii lɛ anɔ lɛ.

⁷ Hewɔ lɛ nyɛkɛ nyɛhe akabɔa amɛhe.

⁸ Ejaakɛ sa lɛ duŋ ji nyɛ, shi agbɛnɛ lɛ nyɛtsɔ̃mɔ la yɛ Nuŋtsɔ lɛ mli; nyɛnyiɛa tamɔ la bii.

⁹ Ejaakɛ la lɛ yibii jeɔ kpo yɛ ekpakpafeemɔ kɛ jalɛ kɛ anɔkwale fɛɛ mli.

¹⁰ Nyɛkaa nyɛkwɛa ni nyɛna nɔ ni sa Nuŋtsɔ lɛ hiɛ;

¹¹ ni nyɛkatsua duŋ nitsumɔi ni wooo yibii lɛ eko, shi nyɛjiea amɛ shi.

¹² Ejaakɛ nibii ni amɛfeɔ amɛteɔ lɛ, eyɛ hiɛgbele akɛ aaatsi tã tete.

¹³ Shi nii fɛɛ ni akɛ la jieɔ amɛ shi lɛ, anaa lɛ faŋŋ; ejaakɛ nɔ fɛɛ nɔ ni anaa lɛ faŋŋ lɛ, la ni.

¹⁴ No hewɔ ni ekɛɛ, “Ohiɛ atsɛ̃, bo mɔ ni owɔɔ lɛ, ni ote shi kɛjɛ gbohii ateŋ ni Kristo aaatso ahã bo!”

¹⁵ No hewɔ lɛ, nyɛkwɛa jogbaŋŋ bɔ ni nyɛaanyiɛ nyɛhã, jeee tamɔ mɛi ni leee nii, shi moŋ tamɔ nilelɔi,

¹⁶ mɛi ni tsuɔ amɛbe he nii, ejaakɛ gbii nɛɛ gbii fɔ̃ji ni.

¹⁷ No hewɔ lɛ, nyɛkafea nyɛhe mɛi ni bɛ yitsoŋ, shi moŋ nyɛyoa nii ni ji Nuŋtsɔ lɛ suɔmɔnaanii lɛ.

¹⁸ Ni nyɛkatɔrɔa dãa, nɔ mli ni yakayaka jeŋba yɔɔ lɛ, shi moŋ nyɛyimɔa obɔ̃ kɛ Mumɔ lɛ,

¹⁹ Nyɛkɛ nyɛhe awiewiea yɛ saŋkutswai kɛ yijiemɔ lalai kɛ mumɔŋ lalai amli, nyɛlaa ni nyɛtswaa saŋku yɛ nyɛtsuii amli nyɛhãa Nuŋtsɔ lɛ.

²⁰ Nyɛdaa Tsɛ Nyɔŋmɔ lɛ shi daa yɛ nii fiaa hewɔ yɛ wɔ Nuŋtsɔ Yesu Kristo gbɛi mli,

²¹ ni nyɛbabaa nyɛhe shi nyɛhãa nyɛhe yɛ Kristo gbeyeishemɔ mli.

Ŋamɛi kɛ wumɛi

²² Nyɛ yeigbãyei lɛ, nyɛbaa nyɛhe shi nyɛhãa nyɛ diɛŋtsɛ nyɛwumɛi lɛ, tamɔ akɛ Nuŋtsɔ lɛ nyɛfeɔ nyɛhãa.

²³ Ejaakɛ wu lɛ ji ŋa lɛ yitso, tamɔ bɔ ni Kristo hu ji asafo lɛ yitso, ni lɛ nɔŋŋ ji gbɔmɔtso ni ji asafo lɛ yiwalaherelɔ lɛ.

²⁴ Shi tamɔ bɔ ni asafo lɛ baa ehe shi ehãa Kristo lɛ, nakai nɔŋŋ yei lɛ hu afee ahã amɛwumɛi lɛ yɛ nɔ fɛɛ nɔ mli.

²⁵ Nyɛ wumɛi lɛ, nyɛsumɔa nyɛŋamɛi, tamɔ bɔ ni Kristo hu sumɔ asafo lɛ ni ekɛ lɛ diɛŋtsɛ ehe hã yɛ ehewɔ,

²⁶ koni ekɛ hejuu yɛ nu mli kɛ wiemɔ atsuu ehe ni ehã efee krɔŋkrɔŋ,

²⁷ koni eŋɔ lɛ edamɔ shi ehã lɛ diɛŋtsɛ ehe akɛ anunyam asafo ni kpa ko loo nɔ kũaikũai ko loo nakai nɔ ko bɛ ehe, shi moŋ efee krɔŋkrɔŋ ni shwamɔ ko bɛ ehe lɛ.

²⁸ Nakai sa akɛ wumɛi hu asumɔ amɛŋamɛi, tamɔ amɛ diɛŋtsɛ amɛgbɔmɔtsei. Mɔ ni sumɔɔ eŋa lɛ, lɛ diɛŋtsɛ ehe esumɔɔ.

²⁹ Ejaakɛ mɔ ko enyɛko lɛ diɛŋtsɛ eheloo dã, shi moŋ elɛɔ lɛ ni ehiɛɔ lɛ dɔdɔɔdɔ, tamɔ bɔ ni Nuŋtsɔ lɛ hiɛ asafo lɛ;

³⁰ ejaakɛ egbɔmɔtso henii ji wɔ.

³¹ “Enɛ hewɔ ni nuu aaashi etsɛ kɛ enyɛ, ni eeekpɛtɛ eŋa he, ni amɛyi enyɔ lɛ fɛɛ amɛaatsɔ̃mɔ heloo kome.”

³² Teemɔ sane ni tsii nɛ; mi lɛ mikɛtoɔ Kristo kɛ asafo lɛ he.

³³ Shi ekɔɔ nyɛ hu nyɛhe ekomekome; esa akɛ nyɛteŋ mɔ fɛɛ mɔ asumɔ eŋa, tamɔ lɛ diɛŋtsɛ ehe; koni ŋa lɛ ashe ewu.