Efesobii 4 - ŊMALƐ KRƆŊKRƆŊ LƐ

Ekomefeemɔ yɛ Kristo gbɔmɔtso lɛ mli

¹ No hewɔ lɛ, mi ni mi ji gboklɛfonyo yɛ Nuŋtsɔ lɛ mli lɛ, miikpa nyɛ fai akɛ nyɛnyiɛ bɔ ni sa tsɛmɔ ni akɛtsɛ nyɛ lɛ.

² Nyɛnyiɛa kɛ heshibaa fɛɛ kɛ kpoofeemɔ fɛɛ kɛ tsuishitoo fɛɛ ni nyɛnanaa nyɛhã nyɛhe kɛ suɔmɔ.

³ Ni nyɛbɔa mɔdɛŋ ni nyɛkɛ hejɔlɛ kpãa ni fiɔ nyɛ lɛ ato ekomefeemɔ ni jɛɔ Mumɔ lɛ ŋɔɔ lɛ.

⁴ Gbɔmɔtso kome kɛ Mumɔ kome yɔɔ, tamɔ bɔ nɔŋŋ ni hiɛnɔkãmɔ kome ji nɔ ni yɔɔ tsɛmɔ ni atsɛ nyɛ lɛ mli lɛ.

⁵ Nuŋtsɔ kome, hemɔkɛyeli kome, baptisimɔ kome,

⁶ Nyɔŋmɔ kome, mɛi fɛɛ aTsɛ kome mɔ ni yɔɔ mɛi fɛɛ nɔ ni etsɔ̃ɔ mɛi fɛɛ mli ni eyɔɔ mɛi fɛɛ mli lɛ.

⁷ Shi wɔteŋ mɔ fɛɛ mɔ lɛ, akɛ dromɔ lɛ ehã lɛ yɛ Kristo nikeenii asusumɔ lɛ naa.

⁸ No hewɔ lɛ, ekɛɛ, “Ekwɔ kɛtee ŋwɛi, ni eŋɔ nomi anom, ni ekɛ nikeenii hã gbɔmɛi.”

⁹ Shi ni akɛɛ ekwɔ lɛ, te eshishiŋ, kɛjeee shi hu ekpeleke kɛtee shikpɔŋ lɛ shishiniiaŋ tsutsu lɛ?

¹⁰ Mɔ ni kpeleke shi lɛ, lɛ nɔŋŋ hu ji mɔ ni kwɔ kɛtee ŋwɛii fɛɛ ayiteŋ, koni eyi nii fiaa obɔ̃ lɛ.

¹¹ Ni lɛ nɔŋŋ ehã mɛi komɛi tsɔ̃mɔ bɔfoi, mɛi komɛi lɛ gbalɔi, mɛi komɛi hu Sanekpakpashiɛlɔi, ni mɛi komɛi hu nɔkwɛlɔi kɛ tsɔɔlɔi.

¹² Efee enɛ koni akɛsaa hetselɔi lɛ ahã sɔ̃ɔmɔ nitsumɔ lɛ kɛ Kristo gbɔmɔtso lɛ tswaa,

¹³ kɛyashi beyinɔ ni wɔ fɛɛ wɔɔshɛ ekomefeemɔ ni yɔɔ Nyɔŋmɔ Bi lɛ nɔ hemɔkɛyeli kɛ ehe nilee mli lɛ he. Ni wɔfee nuu ni eye emuu yɛ Kristo emuuyeli lɛ susumɔ naa;

¹⁴ koni wɔkakã he wɔfee abifabii ni tsɔ̃ɔmɔ fɛɛ tsɔ̃ɔmɔ hosoɔ amɛ tamɔ kɔɔyɔɔ hosoɔ nii, ni ekpalaa amɛ kɛyaa kɛbaa yɛ gbɔmɛi aŋaafɔŋtoo kɛ kutumpɔo ni akɛshishiuɔ mɛi lɛ naa.

¹⁵ Shi moŋ wɔfee anɔkwafoi yɛ suɔmɔ mli, ni wɔdara yɛ nibii fɛɛ gbɛfaŋ tamɔ Kristo ni ji yitso lɛ.

¹⁶ Lɛ emli gbɔmɔtso muu lɛ fɛɛ tsɔ̃ɔ talɔ fɛɛ talɔ ni ahã lɛ lɛ nɔ emɔmɔɔ ehe eshimɔshimɔɔ ehe nɔ yɛ. Ni ehe mɔɔ ehe, ni kɛ henɔ fɛɛ henɔ miitsu enii jogbaŋŋ lɛ, ehãa gbɔmɔtso lɛ daa, ni emaa ehe yɛ suɔmɔ mli.

Wala hee yɛ Kristo mli

¹⁷ No hewɔ lɛ, miikɛɛ ni miima nɔ mi yɛ Nuŋtsɔ lɛ mli, akɛ nyɛkanyiɛ tamɔ bɔ ni jeŋbii lɛ nyiɛɔ yɛ amɛyaka jwɛŋmɔ lɛ mli lɛ dɔŋŋ,

¹⁸ ejaakɛ amɛjwɛŋmɔ mli ewo duŋ. Ni mɛi kpɔ̃ji ji amɛ yɛ Nyɔŋmɔ wala gbɛfaŋ, akɛni nilee ekaaa amɛ ni amɛtsui hu ekpliŋ lɛ.

¹⁹ Amɛbɛ henumɔnii dɔŋŋ hewɔ lɛ amɛŋɔ amɛhe amɛhã nyɛnyɛŋtswibɔɔ, ni amɛkɛ hiɛjoomɔ tsuɔ nyaŋemɔ nii fɛɛ kwa.

²⁰ Shi nyɛ lɛ, jeee nakai nyɛkase Kristo lɛ,

²¹ kɛji eyɛ mli akɛ nyɛnu ehe, ni atsɔ̃ɔ nyɛ nii yɛ emli hu, tamɔ bɔ ni ji anɔkwale yɛ Yesu mli lɛ,

²² akɛ nyɛshɛ nɔ ni ji gbɔmɔ momo yɛ nyɛsa jeŋba lɛ naa gbɔmɔ ni efite yɛ shishiumɔ sɛɛdii lɛ anaa lɛ nyɛfɔ̃.

²³ Ni nyɛtsɔ̃mɔ mɛi hei yɛ mumɔ ni nyɛkɛjwɛŋɔ lɛ gbɛfaŋ,

²⁴ ni nyɛwo gbɔmɔ hee ni abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli, tamɔ atade.

²⁵ No hewɔ lɛ, nyɛshɛa amale nyɛfɔa ni nyɛteŋ mɔ fɛɛ mɔ kɛ enaanyo awie anɔkwale, ejaakɛ gbɔmɔtso kome henii ji wɔ.

²⁶ Nyɛmli afũa, shi nyɛkafea esha; hulu akanyɔ shi yɛ nyɛmlifu lɛ nɔ.

²⁷ Asaŋ nyɛkaŋmɛa abonsam lɛ gbɛ.

²⁸ Mɔ ni juɔ lɛ ekaju dɔŋŋ, shi ebɔ mɔdɛŋ ni ekɛ lɛ diɛŋtsɛ eniji atsu nitsumɔ kpakpa, koni ena nɔ ko ni ekɛhã mɔ ni ehia lɛ lɛ.

²⁹ Wiemɔ sha ko wiemɔ sha ko akaje nyɛnaa kwraa; shi moŋ wiemɔ ni hi ni ehia koni ehã mɔ nane amɔ shi ni akɛduro mɛi ni nuɔ lɛ.

³⁰ Ni nyɛkafea Nyɔŋmɔ Mumɔ Krɔŋkrɔŋ lɛ nidɔɔnii; lɛ emli asɔo nyɛnaa yɛ ato kpɔ̃mɔ gbi lɛ.

³¹ Nyɛhãa mlijoomɔ kɛ mlila kɛ mlifu kɛ blɔmɔ kɛ oshekuyeli kɛ efɔŋ fɛɛ sɛɛ afoa yɛ nyɛteŋ.

³² Shi nyɛmli ahia ahãhãa nyɛhe, nyɛmusuŋ atsɔ̃tsɔ̃a nyɛ yɛ nyɛhe, nyɛkɛfafaa nyɛhe, tamɔ bɔ nɔŋŋ ni Nyɔŋmɔ kɛfa nyɛ yɛ Kristo mli lɛ.