Efesobii 3 - ŊMALƐ KRƆŊKRƆŊ LƐ

Paulo teemɔ sane lɛ bɔfo

¹ Enɛ hewɔ ni mi, Paulo, ni mi ji Kristo Yesu gboklɛfonyo hã nyɛ jeŋmajiaŋbii lɛ,

² kɛji nyɛnu akɛ Nyɔŋmɔ kɛ edromɔ ehã mi hã nyɛsɔ̃ɔmɔ lɛ,

³ kpojiemɔ nɔ etsɔ̃ ehã mile teemɔ sane lɛ, tamɔ bɔ ni miŋma nyɛ fioo momo lɛ.

⁴ Kɛji nyɛkane lɛ, nyɛaanyɛ nyɛyoo akɛ mina Kristo teemɔ sane lɛ shishi.

⁵ Teemɔ sane nɛɛ, yinɔi ni eho lɛ mli lɛ ahãaa gbɔmɛiabii ale, tamɔ bɔ ni agbɛnɛ ajie kpo atsɔ̃ɔ ebɔfoi krɔŋkrɔŋi kɛ gbalɔi lɛ kɛtsɔ̃ Mumɔ lɛ nɔ lɛ.

⁶ No ji akɛ jeŋmajiaŋbii lɛ hu niyelɔi lɛ ekomɛi kɛ gbɔmɔtso lɛ henii lɛ ekomɛi kɛ mɛi ni awo amɛ shi yɛ Kristo Yesu mli lɛ hu ekomɛi ji amɛ kɛtsɔ̃ Sanekpakpa lɛ nɔ.

⁷ No he sɔ̃ɔlɔ ji mi yɛ Nyɔŋmɔ dromɔ nikee nii ni atsɔ̃ ehewalɛ nitsumɔ nɔ akɛhã mi lɛ naa,

⁸ mi ni mi ji bibioo fe hetselɔi lɛ fɛɛ lɛ, akɛ nɛkɛ dromɔ nɛɛ ehã mi, akɛ mijaje Kristo nifalɛ ni anyɛɛɛ shishi ana lɛ he Sanekpakpa lɛ mitsɔ̃ɔ jeŋmaji lɛ.

⁹ Ni mihã mɛi fɛɛ ana teemɔ sane lɛ he gbɛjianɔtoo lɛ faŋŋ, teemɔ sane ni akɛtee kɛjɛ yinɔi ni eho lɛ amli kɛbashi amrɔ nɛɛ yɛ Nyɔŋmɔ mɔ ni bɔ nii fɛɛ lɛ mli lɛ,

¹⁰ koni agbɛnɛ atsɔ̃ asafo lɛ nɔ ahã onukpai kɛ mɛi ni yɔɔ hegbɛ yɛ ŋwɛiniiaŋ lɛ ale Nyɔŋmɔ nilee ni jieɔ ehe kpo yɛ gbɛi srɔtoi pii anɔ lɛ.

¹¹ Nyɔŋmɔ fee nii nɛɛ yɛ enaanɔ yiŋ ni eto yɛ Kristo Yesu, wɔNuŋtsɔ lɛ, mli lɛ naa.

¹² Kristo Yesu nɔ hemɔkɛyeli nɔ wɔtsɔ̃ ni wɔna ekãa ni wɔkɛyaa Nyɔŋmɔ hiɛ kɛ hewalɛ.

¹³ No hewɔ lɛ, miikpa nyɛ fai, ni nyɛnijiaŋ akaje wui yɛ mimanehului ni minaa yɛ nyɛhewɔ lɛ ahewɔ, ejaakɛ nyɛnunyam ni.

Kristo Suɔmɔ

¹⁴ Enɛ hewɔ ni miyaa minakutsei anaa yɛ Tsɛ lɛ hiɛ,

¹⁵ mɔ mli ni nɔ ni atsɛɔ lɛ akɛ “tsɛ” yɛ ŋwɛi kɛ shikpɔŋ lɛ nɔ lɛ fɛɛ jɛ lɛ.

¹⁶ Ni yɛ enunyam falɛ naa lɛ ehã nyɛtsɔ̃ eMumɔ lɛ nɔ nyɛhe awa kpiŋtiŋŋ yɛ nyɛmli gbɔmɔ lɛ gbɛfaŋ,

¹⁷ ni atsɔ̃ hemɔkɛyeli nɔ ni Kristo ahi shi yɛ nyɛtsuii amli, ni nyɛshishifã amɔ shi ni nyɛma shi shiŋŋ yɛ suɔmɔ mli.

¹⁸ Miisɔle ni nyɛna hewalɛ, ni nyɛkɛ mɛi krɔŋkrɔŋi lɛ fɛɛ ayoo Kristo suɔmɔ lɛ lɛɛmɔ kɛ ekɛlɛ kɛ enɔkwɔlɛ kɛ emlikwɔlɛ lɛ.

¹⁹ Ni nyɛle esuɔmɔ ni teke nilee fɛɛ lɛ, koni Nyɔŋmɔ obɔ̃yimɔ lɛ ayimɔ nyɛ fɛɛ obɔ̃bɔ̃.

²⁰ Shi mɔ ni nyɛɔ efeɔ kɛtekeɔ nɔ babaoo fe nii fɛɛ ni wɔkpaa he fai loo wɔjwɛŋɔ, yɛ ehewalɛ ni tsuɔ nii yɛ wɔmli lɛ naa lɛ,

²¹ lɛ aŋɔ anunyam ahã yɛ asafo lɛ mli kɛ Kristo Yesu mli yɛ yinɔi fɛɛ nɔ kɛyashi naanɔi anaanɔ. Amen!