Jajelɔ 9 - ŊMALƐ KRƆŊKRƆŊ LƐ

¹ Mikɛ mitsui fɔ̃ nibii nɛɛ anɔ, ni mitao fɛɛ mli. Nɔ ni mina ji akɛ jalɔi kɛ nilelɔi kɛ amɛnifeemɔi lɛ, Nyɔŋmɔ dɛŋ fɛɛ yɔɔ; suɔmɔ ni jio, nyɛɛ ni jio, gbɔmɔ ko leee. Nɔ fɛɛ nɔ ni kã gbɔmɛi ahiɛ lɛ yakanii ni,

² ejaakɛ jalɔ kɛ mɔ ni ejaaa, kɛ gbɔmɔ kpakpa kɛ gbɔmɔ fɔŋ, kɛ mɔ ni he tse kɛ mɔ ni he tseee, kɛ mɔ ni shãa afɔle kɛ mɔ ni eshãaa afɔle fɛɛ lɛ, amɛ fɛɛ lɛ amɛnaagbee kome. Nɔ ni baa gbɔmɔ kpakpa nɔ lɛ, no nɔŋŋ baa efɔŋfeelɔ nɔ, ni nakai nɔŋŋ baa mɔ ni kãa kitã kɛ mɔ ni kãaa kitã fɛɛ nɔ.

³ Nɔ ko ni ejaaa yɛ nii fɛɛ ni afeɔ yɛ je nɛɛŋ ji akɛ mɛi fɛɛ anaagbee afee ekome. Gbɔmɛi atsuiiaŋ eyimɔ obɔ̃bɔ̃ kɛ efɔŋ kɛ sɛkɛyeli nifeemɔi, beiaŋ ni amɛyɔɔ walaŋ, shi no sɛɛ lɛ amɛgboiɔ, ni amɛyaa gbohiiaje.

⁴ Shi mɔ ni hiɛ kã lɛ, eyɛ hiɛnɔkãmɔ ko kɛ̃ ejaakɛ gbee hiɛkãalɔ lɛ, ehi fe jata ni egbo.

⁵ Ejaakɛ hiɛkãalɔi lɛ amɛle akɛ amɛbaagboi, shi gbohii lɛ amɛleee nɔ ko nɔ ko, ni amɛbɛ nɔ ko hu ni amɛbaana dɔŋŋ, ni hiɛ kpaa amɛnɔ kwraa.

⁶ Amɛsuɔmɔ kɛ amɛnyɛɛ kɛ amɛwuŋayeli fɛɛ eho etee momo; ni kɛyaashi naanɔ lɛ, nɔ fɛɛ nɔ ni yaa nɔ yɛ je nɛɛŋ lɛ amɛhe bɛ mli dɔŋŋ.

⁷ Yaa nɔ oye oboloo kɛ miishɛɛ, ni onu owain hu kɛ mliflimɔ, ejaakɛ Nyɔŋmɔ ejɔɔ nɔ ni ofeɔ lɛ nɔ momo.

⁸ Hã otadei ahiɛ ayɛ be fɛɛ be; wo oyiteŋ mu be fɛɛ be hu.

⁹ Okɛ oŋa ni osumɔɔ lɛ ahi shi yɛ miishɛɛ mli, bei abɔ ni oyɔɔ yaka wala ni Nyɔŋmɔ eduro bo yɛ je nɛɛ mli lɛ mli lɛ, ejaakɛ deŋme ni ogbo yɛ je nɛɛŋ lɛ, ogbɛfaŋ nɔ ni ona yɛ jeŋ ji no.

¹⁰ Nɔ fɛɛ nɔ tsumɔ ni ooomɔ mli lɛ, tsu kɛ onyɛmɔ fɛɛ, ejaakɛ gbohiiaje he ni oyaa lɛ, nɔ ni atsɛɔ lɛ nitsumɔ loo yiŋshwiemɔ loo nilee loo jwɛŋmɔ lɛ eko bɛ jɛi.

¹¹ Asaŋ mina akɛ jeŋ ni ayɔɔ mli nɛɛ lɛ, jeee be fɛɛ be mɔ ni najiaŋ wa yeɔ foidamɔ mli kunim, aloo kãkãlɔ yeɔ ta mli kunim; aloo nilelɔ naa edaaŋŋmaa, aloo hiɛshikãlɔ tsɔ̃ɔ niiatsɛ, aloo mɔ ni he esa yɛ nitsumɔ ko mli hiɛ baa nyam; shi amɛ fɛɛ lɛ dromɔ naa kɛkɛ ni.

¹² Ejaakɛ gbɔmɔ adesa leee ebe. Kɛji be lɛ banina lɛ trukaa lɛ, etsɔ̃ɔ tamɔ faaŋ loo ni ahiɛ, loo loofɔji ni akɛ tsɔne edu amɛ.

Nilee kɛ Kwashiafeemɔ he susumɔ

¹³ Nilee sane ko hu ni mina yɛ jeŋ ni enɔ bɛ hã mi nɛ:

¹⁴ Be ko lɛ maŋtsɛ wulu ko tee akɛ eyaatua maŋ bibioo kɛ emli bii fioo ko. Maŋtsɛ nɛɛ sa maŋ bibioo lɛ yi, ni etswa kawoo gbogboi ekɛbɔle maŋ lɛ.

¹⁵ Nuu ohiafo ko yɛ maŋ bibioo lɛ mli, ni lɛ etsɔ̃ enilee nɔ ehere maŋ lɛ yiwala. Shi mɔ ko mɔ ko kaiii nuu ohiafo nɛɛ.

¹⁶ Shi nɔ ni mikɛɔ ji akɛ nilee hi fe hewalɛ, tsɛbelɛ abuuu ohiafo nilee, ni akɛ ewiemɔ efeee nɔ ko.

¹⁷ Nilelɔ wiemɔ ni ewieɔ lɛ ablɛbi lɛ, anuɔ, ni ehi fe bolɔmɔ ni nɔyelɔ bolɔɔ yɛ kwashiai ateŋ.

¹⁸ Nilee he yɛ sɛɛnamɔ fe tawuu nii; shi eshafeelɔ kome kpãtãa nii kpakpai babaoo hiɛ.