Jajelɔ 5 - ŊMALƐ KRƆŊKRƆŊ LƐ

Kaawo shi oya

¹ Kwɛmɔ jogbaŋŋ kɛji ooya Nyɔŋmɔ We lɛ. Kɛji ooya jɛi oyabo wiemɔ toi lɛ, ehi fe oooya jɛi oyashã afɔle ni kwashiai yaa amɛyashãa lɛ; ejaakɛ amɛleee akɛ amɛmiifee nɔ fɔŋ.

² Kaahã onaa miifee blɛblɛ, ni kaahã otsui miihã osha ohe owie yɛ Nyɔŋmɔ hiɛ. Ejaakɛ Nyɔŋmɔ lɛ ŋwɛi eyɔɔ, ni bo lɛ shikpɔŋ lɛ nɔ oyɔɔ; no hewɔ lɛ, kaahã owiemɔ miifa.

³ Ejaakɛ kɛji odi lamɔ sɛɛ lɛ, okɛ nitsumɔ pii shwieɔ onɔ; wiemɔ pii akɛyoɔ kwashia.

⁴ Kɛ owo Nyɔŋmɔ shi lɛ, kaahã shiwoo lɛ nɔyeli sɛɛ miitsɛ, ejaakɛ Nyɔŋmɔ bɛ kwashiai ahe tsui; shi ni owo lɛ ye nɔ.

⁵ Faŋ nɔ ni owooo shi kwraa, fe nɔ ni owo shi ni oyeee nɔ.

⁶ Kaaŋmɛ onaabu gbɛ ni ehã ofee esha; ni kaakɛɛ yɛ bɔfo lɛ hiɛ akɛ onaa ni etɛ shi. Mɛni hewɔ esa akɛ Nyɔŋmɔ mli afu yɛ owiemɔ hewɔ ni efite oninenaa nitsumɔ lɛ?

⁷ Kɛji lamɔi fa pɛ, wiemɔi hu efa; shi bo lɛ oshe Nyɔŋmɔ gbeyei.

Wala lɛ yaka nɔ ko ni

⁸ Kɛji ona akɛ aawa ohiafo ko yi, asaŋ aatsɔ̃ jalɛ saneyeli hiɛ aaabu shi, ni afeee nɔ ni ja yɛ shikpɔŋ ko nɔ lɛ, kaahã enɛ miifee bo naakpɛɛ, ejaakɛ tsulɔnukpa lɛ, tsulɔnukpa ko ni fe lɛ yɛ ni kwɛɔ enɔ, ni tsulɔi krokomɛi hu yɛ lolo ni amɛgbɛnaa kwɔlɔ fe klɛŋklɛŋ tsulɔi lɛ.

⁹ Shi enɛ fɛɛ sɛɛ lɛ maŋtsɛ he yɛ sɛɛnamɔ kɛ̃ yɛ shikpɔŋ ni ŋmɔji yɔɔ nɔ nɔ.

¹⁰ Mɔ ni sumɔɔ shika lɛ, etɔɔɔ shika; ni mɔ ni sumɔɔ ninamɔ etɔɔɔ ninamɔ. Enɛ hu lɛ yakanii ni.

¹¹ Kɛ ninamɔ fa lɛ, naabui ni yeɔ nii lɛ hu faa. Mɛɛ sɛɛ nɔtsɛ lɛ naa? Sɛɛ ni enaa ji akɛ kɛji ekɛ ehiŋmɛi kwɛ enii lɛ, enaa miishɛɛ.

¹² Apaafonyo na nii babaoo eye jio, fioo ena eye jio, ewɔɔ kɛ miishɛɛ; shi niiatsɛ nii ni ena lɛ he jwɛŋmɔ hãaa ena wɔ ewɔ.

¹³ Awerɛho sane ko ni mina yɛ jeŋ nɛ: gbɔmɔ adesa tiaa nii naa ehãa ehe, shi no nɔŋŋ moŋ ni yeɔ lɛ awui.

¹⁴ Nii nɛɛ fɛɛ hiɛ kpãtãa kɛji akɛtee jarayeli. Gbɔmɔ nɛɛ yɛ bi nɛ, shi nɔ ko nɔ ko bɛ edɛŋ ni ebaashi ehã ebi lɛ.

¹⁵ Bɔ ni ejɛ enyɛ musuŋ eba kɛ ehe yayai lɛ, nakai nɔŋŋ eeeku esɛɛ kɛaatee bɔ ni eba lɛ, ni ekɔŋ edeŋmegbomɔ lɛ mli nɔ ko nɔ ko kɛyaŋ.

¹⁶ Awerɛho sane nɛ: bɔ pɛ ni eba lɛ, nakai nɔŋŋ eeetee. Mɛɛ sɛɛ ena fe akɛ egbo deŋme folo;

¹⁷ ni ewala gbii fɛɛ amli lɛ, ehi duŋ kɛ awerɛho kɛ mlila kpele kɛ hela mli, ni jeŋshihilɛ je etsine?

¹⁸ Naa, nɔ ni mikpa shi mina akɛ ehi, ni esa hã gbɔmɔ adesa feemɔ ji akɛ eye, ni enu; ni deŋme fɛɛ ni egboɔ yɛ ewala kukuoo ni Nyɔŋmɔ ehã lɛ yɛ je nɛɛ mli lɛ, eye emli ŋɔɔmɔ koni ena miishɛɛ, ejaakɛ no ji egbɛfaŋ nɔ.

¹⁹ Mɔ fɛɛ mɔ hu ni Nyɔŋmɔ ehã ena shika kɛ nii kɛ hewalɛ koni eye eninamɔ lɛ mli ŋɔɔmɔ lɛ, emɔ egbɛfaŋ nɔ lɛ mli, ni emii ashɛ edeŋmegbomɔ he. Nyɔŋmɔ dromɔ nikeenii ni.

²⁰ Ejaakɛ esusuŋ ewala gbii lɛ ahe tsɔ̃, ejaakɛ Nyɔŋmɔ ehã etsui eyi obɔ kɛ miishɛɛ.