Jajelɔ 3 - ŊMALƐ KRƆŊKRƆŊ LƐ

Nɔ fɛɛ nɔ yɛ ebe

¹ Nɔ fɛɛ nɔ kɛ ebe ni ato ahã lɛ; ni sane fɛɛ sane ni baa je nɛɛ mli yɛ ebe ni Nyɔŋmɔ eto.

² Fɔmɔ be yɛ, ni gbele be hu yɛ; nidumɔ be yɛ, ni nikpamɔ be hu yɛ.

³ Be yɛ ni agbeɔ, ni be yɛ hu ni atsaa; be yɛ ni akumɔɔ nɔ ni ama, ni be yɛ hu ni atswaa amaa shi.

⁴ Yaafo be yɛ, ni ŋmɔlɔ be hu yɛ; awerɛhoyeli be yɛ, ni be yɛ ni ajoɔ.

⁵ Be yɛ ni akɔlɔɔ tɛi ashɛrɛɔ ashwieɔ, ni be yɛ hu ni akɛbuaa tɛi anaa; be yɛ ni aloɔ mɔ atuu, ni be yɛ hu ni alooo mɔ atuu.

⁶ Be yɛ ni ataoɔ nii, ni be yɛ hu ni aŋmɛɔ nii ahe; be yɛ ni akɛ nii toɔ, ni be yɛ ni ashɛɔ nii afɔ̃ɔ.

⁷ Be yɛ ni atserɛɔ nii amli, ni be hu yɛ ni akpɛɔ nii; be yɛ ni afeɔ dioo, ni be hu yɛ ni awieɔ.

⁸ Suɔmɔ be yɛ, ni nyɛɛ be hu yɛ; ta be yɛ, ni toiŋjɔlɛ be hu yɛ.

⁹ Mɛɛ sɛɛ gbɔmɔ naa yɛ deŋme ni egboɔ he?

¹⁰ Mina nitsumɔ ni Nyɔŋmɔ kɛfɔ̃ adesai anɔ koni amɛgbo he deŋme lɛ.

¹¹ Ehãa nɔ fɛɛ nɔ feɔ akɔnɔ yɛ ebe mli, asaŋ ekɛ naanɔ he susumɔ ewo adesa mli, kɛ̃lɛ adesa nyɛŋ ena ele nɔ ni Nyɔŋmɔ etsu kɛjɛ jeŋ shishitoo kɛyaagbee naanɔ.

¹² No hewɔ lɛ, mina akɛ nɔ ko nɔ ko bɛ ni hi hã gbɔmɛi, beiaŋ ni amɛyɔɔ wala mli, fe akɛ amɛmii ashɛ amɛhe, ni amɛye jeŋ ŋɔɔmɔ lɛ eko, ni amɛshwɛ amɛyinɔ;

¹³ asaŋ akɛ Nyɔŋmɔ dɛŋ jɔɔmɔ ji akɛ mɔ fɛɛ mɔ aye, ni enu, ni ena deŋme ni egboɔ lɛ he miishɛɛ.

^14-15 Miyoo akɛ nɔ fɛɛ nɔ ni Nyɔŋmɔ fee lɛ, ehiɔ shi kɛyaa naanɔ; anyɛŋ akɛ nɔ ko afata he lɛ, anyɛŋ ajie nɔ ko kɛje mli hu. Nyɔŋmɔ efee nɔ lɛ nakai, bɔ ni afee ni gbɔmɔ adesa ashe lɛ gbeyei. Nɔ ni yɔɔ amrɔ nɛɛ lɛ, ebaho etee dã, ni nɔ hu ni baaba lɛ eba dã. Nyɔŋmɔ tiuɔ nɔ ni eba ni ewo lɛ gbɛ kɛtee momo lɛ sɛɛ.

Toikɔdɔmɔ saneyeli

¹⁶ Asaŋ mina akɛ je nɛɛ mli lɛ, afeɔ efɔŋ yɛ he ni akojoɔ yɛ tete, ni afeɔ yiwalɛ nii yɛ he ni esa akɛ ayeɔ jalɛ sane yɛ tete.

¹⁷ Mikɛɛ mihe akɛ, “Nyɔŋmɔ baakojo jalɔ lɛ kɛ mɔ fɔŋ lɛ fɛɛ, ejaakɛ eto be ehã sane fɛɛ sane kɛ nitsumɔ fɛɛ nitsumɔ.”

¹⁸ Mikɛɛ mihe akɛ, yɛ adesai agbɛfaŋ lɛ, Nyɔŋmɔ miika amɛ koni etsɔ̃ɔ amɛ akɛ amɛtamɔ kooloi nɔŋŋ.

¹⁹ Ejaakɛ adesa naagbee kɛ kooloo hu naagbee lɛ fɛɛ ekome; bɔ ni mɔ nɛ gboɔ lɛ, nakai nɔŋŋ mɔ nɛ hu gboɔ. Amɛ fɛɛ lɛ mumɔ kome amɛyɔɔ, ni gbɔmɔ ehiii fe kooloo, ejaakɛ amɛ fɛɛ lɛ yakanii ji amɛ.

²⁰ Amɛ fɛɛ lɛ he koome lɛ nɔŋŋ amɛyaa; amɛ fɛɛ lɛ su mli amɛjɛ, ni amɛ fɛɛ amɛbaatsɔ̃ su ekoŋŋ.

²¹ Namɔ aaanyɛ ekɛɛ akɛ adesa mumɔ lɛ eyaa ŋwɛi, ni kooloo mumɔ lɛ eyaa su mli?

²² No hewɔ lɛ, miyoo akɛ nɔ ko ehiii fe enɛ akɛ gbɔmɔ aye enitsumɔ mli ŋɔɔmɔ lɛ eko, ejaakɛ no ji egbɛfaŋ nɔ. Namɔ baanyɛ ekɛ adesa aku sɛɛ kɛba jeŋ koni ebana nɔ ni yaa nɔ yɛ egbele sɛɛ?