Jajelɔ 2 - ŊMALƐ KRƆŊKRƆŊ LƐ

¹ Mikɛɛ mihe akɛ, “Agbɛnɛ maka nɔ ni ji mliflimɔ makwɛ; shwɛ oyinɔ!” Shi naa, enɛ hu lɛ yakanii ni.

² Mikɛɛ yɛ ŋmɔlɔ he akɛ, “Sɛkɛyeli ni”; ni mikɛɛ yɛ miishɛɛ hu he akɛ, “Mɛɛ sɛɛnamɔ yɔɔ he?”

³ Mikɛ mijwɛŋmɔ tao mli mikwɛ akɛ wain baahã mana miishɛɛ lo? Asaŋ mikɛ jwɛŋmɔ kɛ nilee tao mli bɔ ni mafee mamɔ buulufeemɔ koŋ mli kɛdamɔ shi kɛyashi beyinɔ ni mana nɔ ni hi hã gbɔmɛi abii akɛ amɛfee yɛ jeŋ, yɛ amɛwala be kukuoo lɛ mli.

⁴ Mitsu nitsumɔi wuji: mimamɔ shĩai mihã mi diɛŋtsɛ mihe, ni mifee waintromi hu mihã mihe;

⁵ mifee abɔi kɛ tromi mihã mi diɛŋtsɛ mihe, ni mitɛo aduawa tsei srɔtoi lɛ eko fɛɛ eko yɛ mli;

⁶ mije bukoi ni akɛ amɛmli nu shwieɔ tsei ni atɛo lɛ anɔ;

⁷ mihe hii nyɔji kɛ yei nyɔji fɛɛ, ni afɔfɔɔ nyɔji hu ahã mi yɛ miwe lɛ mli; mina toi kɛ tsinai fe mɛi fɛɛ ni etsɔ̃ mihiɛ amɛhi Yerusalɛm.

⁸ Mibua shika kɛ jwiɛtɛi kɛ mishishi maŋtsɛmɛi kɛ shikpɔji anɔ bii adɛŋ jwetri naa mihã mihe. Mina hii lalɔi kɛ yei lalɔi fɛɛ ni laa kɛjieɔ mihiɛtserɛ; ni miyɛ nuu tsuinaa nii ni ji shieŋnyɛmɛi babaoo hu.

⁹ Mibatsɔ̃ gbɔmɔ wulu, ni migbojee bakwɔ fe mɛi fɛɛ ni etsɔ̃ mihiɛ amɛhi Yerusalɛm dã lɛ, ni nilee hu ebɔɔɔ mi.

¹⁰ Nɔ fɛɛ nɔ ni fee mi akɔnɔ lɛ, mikamaaa mihe. Mitsiii mihe naa yɛ miishɛɛ ko miishɛɛ ko gbɛfaŋ, ejaakɛ mina nibii fɛɛ ni migbo amɛhe deŋme lɛ ahe miishɛɛ. Deŋme ni migbo lɛ he sɛɛnamɔ ji no.

¹¹ Shi be ni misusu nibii fɛɛ ni mikɛ minine etsu, kɛ tɔlɛ ni etɔ mi kɛtsu nii lɛ hu fɛɛ he lɛ, nɔ ni mina ji akɛ fɛɛ lɛ yakanii ni, ni etamɔ kɔɔyɔɔ abɔyeli. Anɔkwa, nɔ ko kwraa bɛ ni adesa naa he sɛɛ yɛ jeŋ.

¹² Ejaakɛ mɛni po maŋtsɛ ni ebaye maŋtsɛ kroko sɛɛ baanyɛ efee? Nɔ ni mɛi ni etsɔ̃ ehiɛ lɛ fee lɛ, no nɔŋŋ pɛ lɛ hu ebaafee. No hewɔ lɛ, agbɛnɛ, miku sɛɛ misusu nilee kɛ sɛkɛyeli kɛ kwashiafeemɔ he.

¹³ Mina akɛ nilee hi fe kwashiafeemɔ, tamɔ bɔ ni la hi fe duŋ lɛ,

¹⁴ ni nilelɔ lɛ enyiɛɔ kɛ hiɛshikãmɔ; shi kwashia lɛ, enyiɛɔ duŋduŋ tamɔ mɔ ni nyiɛ duŋ mli; shi kɛ̃lɛ amɛ fɛɛ amɛshɛɛ mli ekome.

¹⁵ Kɛkɛ ni mikɛɛ mihe akɛ, “Sane koome ni baa kwashia nɔ lɛ, no nɔŋŋ ni baaba minɔ. Nɛgbɛ mɔ mikɛ nilee pii nɛɛ yaa?” Mikɛɛ mihe akɛ, “Enɛ hu lɛ yakanii ni.”

¹⁶ Ejaakɛ bɔ ni akaiii kwashia kɛyaa naanɔ lɛ, nakai akaiii nilelɔ bei fɛɛ, ejaakɛ be ni wɔsɛɛ ko baashɛ lɛ hiɛ ekpa amɛ fɛɛ amɛnɔ jeeŋmɔ. Bɔ ni nilelɔ gboɔ lɛ, nakai nɔŋŋ kwashia hu gboɔ.

¹⁷ No hewɔ lɛ, jeŋshihilɛ je mitsine, ejaakɛ nɔ fɛɛ nɔ ni afeɔ yɛ jeŋ hao mi, ejaakɛ fɛɛ lɛ yakanii ni, ni etamɔ kɔɔyɔɔ abɔyeli.

¹⁸ Deŋme fɛɛ ni migbo yɛ jeŋ je mitsine, ejaakɛ mina akɛ mibashi fɛɛ kwa mibahã mɔ ni baaba ebaye misɛɛ.

¹⁹ Gbɔmɔ nɛɛ baafee nilelɔ jio, kwashia ni jio, namɔ le? Ni kɛ̃lɛ nii fɛɛ ni migbo he deŋme ni mina yɛ nilee naa, yɛ je nɛɛ mli lɛ, lɛ ebaaye. Enɛ hu yakanii ni.

²⁰ No hewɔ lɛ, minijiaŋ je wui akɛ migbo deŋme kɛtsu nii nɛkɛ yɛ je nɛɛ mli;

²¹ ejaakɛ bei komɛi lɛ mɔ ko ni egbo deŋme kɛ nilee kɛ jwɛŋmɔ kɛ ŋaa shiɔ egboshinii lɛ ehãa mɔ ni gboko nii lɛ he deŋme ko, ni ebayeɔ. Enɛ hu lɛ yakanii kɛ nɔ fɔŋ kpele ni.

²² Mɛni ji nɔ ni gbɔmɔ naa yɛ deŋme ni egboɔ kɛ etɔlɛ he yɛ je nɛɛ mli?

²³ Ejaakɛ ewala gbii fɛɛ lɛ piŋmɔ ni, ni enitsumɔ fɛɛ lɛ mlifu sɔŋŋ tɔ, ni nyɔɔŋnyɔɔŋ fɛɛ tete ewɔɔɔ kɛ jwɛŋmɔ sɔŋŋ. Enɛ hu yakanii ni.

²⁴ Nɔ ko bɛ hã gbɔmɔ adesa fe akɛ nii ni egbo he deŋme ni ena lɛ, eye eko, ni enu eko, ni ena ehe miishɛɛ. Enɛ hu mina akɛ Nyɔŋmɔ dɛŋ ejɛ,

²⁵ ejaakɛ namɔ ji mɔ ni baanyɛ eye nii aloo ena miishɛɛ ko kɛji Nyɔŋmɔ nine bɛ mli?

²⁶ Ejaakɛ gbɔmɔ ni feɔ nɔ ni Nyɔŋmɔ sumɔɔ lɛ, Nyɔŋmɔ duroɔ lɛ nilee kɛ jwɛŋmɔ kɛ miishɛɛ fɛɛ; shi eshafeelɔ lɛ Nyɔŋmɔ hãa ebuaa, ni etĩaa nii anaa emaa shi, shi Nyɔŋmɔ kɛhãa mɔ ni feɔ esuɔmɔnaanii lɛ. Enɛ hu lɛ yakanii ni, ni etamɔ kɔɔyɔɔ abɔyeli.